<p><strong>नाशिक । Nashik</strong></p><p> नाशिक जिल्हा परिषदेच्या आरोग्य विभागात नोकरीचे अमिष दाखवून बनावट शिक्के व कागदपत्रांचा वापर करून नियुक्तीपत्र देवून बेरोजगार तरुणांची लाखो रूपयांची फसवणूक केल्याचा प्रकार उघडकीस आला आहे. </p> .<p>उमेश बबन उदावंत (रा. जेलरोड) असे या प्रकरणातील संशयिताचे नाव असून त्यांच्याविरुद्ध गुन्हा दाखल करण्यात आला आहे. जिल्हा परिषदेच्या आरोग्य विभागात कोणतीही भरती नसताना बनावट जाहिरात काढून, बनावट नियुक्तीपत्र, लोक आयुक्त यांचे पत्र व ओळख पत्र देऊन कामावर रुजू करण्याचा प्रयत्न उदावंत याने केला. मात्र जिल्हा परिषदेच्य अधिकार्यांच्या सतर्कतेने हा प्रयत्न यशस्वी होऊ शकला नाही.</p><p>यातील संशयित उदावंत याने सुशिक्षित बेरोजगारांच्या असाह्यतेचा गैरफायदा घेतानाच या प्रकराणत शासनाचीही फसवणूक करण्याचा प्रयत्न करण्यात आला आहे. जिल्हा परिषदेत बोगस कर्मचारी भरती करताना बनावट राजमुद्रेचा देखील गैरवापर झाला असून तत्कालिन मुख्याधिकारी डॉ. नरेश गिते व भूवनेश्वरी एस यांच्या बनावट स्वाक्षर्यांही करण्यात आल्या.</p><p> या कागद पत्रांसह हितेंद्र मनोहर नायक व त्यांची पत्नी अक्षदा परमसिंह बटवाडा या जिल्हा परिषदेत रुजू करून घेण्याचा प्रयत्न करण्यात आला. ही कागदपत्र तयार करणारा संशयित उमेश बबन उदावंत याच्या विरोधात जिल्हा परिषदेचे प्रभारी प्रशासन अधिकारी शिवाजी थेटे यांनी फिर्याद दिली आहे. </p><p>त्यानुसार संशयितावर बनावट शासकीय कागद पत्र तयार करणे व फसवणूकी प्रकरणी भद्रकाली पोलीस ठाण्यात गुन्हा दाखल करण्यात आला आहे.</p>
