<p><strong>कवडदरा । Kawaddara </strong></p><p>इगतपुरी तालुक्यातील कवडदरा, घोटी खुर्द, साकूर, पिंपळगाव परिसरातील शेतकऱ्यांच्या शेतातील ऊसाला ऊसतोड न मिळाल्याने तुरे आले आहेत. कारखान्यांचा गळीत हंगाम मोठ्या दिमाखात सुरू झाला. </p>.<p>हंगाम संपत आला तरी कार्यक्षेत्रातील ऊस उत्पादक शेतकऱ्यांच्या उसाला टोळी मिळत नसल्याने शेतकरी हवालदिल झाले आहेत. वारंवार ऊस नोंदणीबाबत दूरध्वनीवरून संपर्क साधूनही टोळी मिळत नसल्याने शेतकरी हतबल झाले आहेत. करोना महामारीचे सावट असल्याने कारखान्याकडील ऊसतोड कमी प्रमाणात आल्याने हा सगळा सावळा गोंधळ सध्या सुरू आहे.</p><p>कवडदरा परीसरात यंदा ऊसाचे उत्पादन मोठ्या प्रमाणात शेतकऱ्यांनी घेतले आहे. पाऊसही चांगला झाल्याने उसाची लागवड मोठ्या प्रमाणात करण्यात आली आहे. सध्या पूर्वीपासून ज्या भागात उसाचे प्रमाण जास्त आहे त्या भागात सध्या ऊसतोड सुरू आहे.तसेच परीसरात शेजारी कारखाना नसल्याने नगर जिल्ह्यातील अगस्ती, संगमनेर कारखान्याला ऊस जातो. शेतात ऊस चौदा महीन्याचा होवूनही अजुनही शेतात उभा आहे. इतर पिकांपेक्षा एकरकमी पैसे मिळणारे पीक म्हणून उसाकडे बघितले जाते. एकगठ्ठा पैसे येतील या आशेनेच इतर पिकांना बगल देत ऊस लागवड केली आहे.</p><p>आडसाली हंगामानुसार लागवड करून ऊस मोठ्या जोमात आणला आहे; परंतु कारखान्याच्या ढिसाळ कारभाराचा फटका मात्र या शेतकऱ्यांना बसण्यास सुरुवात झाली आहे. उसाची टोळी द्यावी यासाठी शेतकऱ्यांचे जथेच्या जथे कारखान्यावर जात आहेत; मात्र ऊस नोंदणी अधिकारी यांच्याकडून कोणतेही शाश्वत उत्तर मिळत नसल्याने शेतकऱ्यांत संभ्रमावस्था आहे. संबंधित अधिकारीही कुठलेही ठोस आश्वासन देत नसल्याने आपल्या उसाला तोड कधी मिळेल याकडे सगळ्यांचे लक्ष लागले आहे.</p><p>परतीच्या पावसामुळे झालेल्या अतिवृष्टीमुळे उसाला आगाप तुरे पडण्यास सुरू झाल्यामुळे उसाची हिरवीगार दिसणारी शेती पांढरी दिसण्यास सुरुवात झाल्याने शेतकरी चिंताग्रस्त झाले आहेत. उसाला तोड यावी यासाठी सध्या धडपड सुरू आहे. नोंदणी केलेल्या उसाला ऊसतोड द्यावी, अशी मागणी शेतकरी करू लागले आहेत.</p><p>ऊस तोडण्यासाठी उसाचे फड पेटवा अन्यथा ऊस तोडणार नसल्याची भूमिका घेतली जात आहे.काही शेतकऱ्यांनी वारंवार कारखान्यात येऊन ऊस तोडणीची मागणी करुनही ऊसाला तोड येत नाही. ऊस उत्पादक शेतकरी पुरते अडचणीत सापडले आहेत. शेतकऱ्यांना ऊसाला तोड येत नसल्याने शेतकरी चिंतेत आहे.</p><p>- सचिन वाकचौरे, शेतकरी क्रांती संघटना नेते</p>
