<p>हरसूल l देवचंद महाले.</p><p>त्र्यंबकेश्वर तालुक्यातील खुताडवस्ती-वांगणपाडा (भासवड) येथील शिवराम तुळशीराम खुताडे (४८) हा इसम वाघ नदीच्या पुराच्या पाण्यात वाहून गेला आहे.</p><p> शेतीकामासाठी आणलेला बैल सोडून करवळी या गावाहून येत असतांना (दि २१) रोजी संध्याकाळी पाच वाजेच्या सुमारास ही घटना घडली. नदीचा पाण्याचा अंदाज न आल्याने पाय सरकून वाहून गेला आहे. </p><p>घटनेची माहिती मिळताच हरसुल पोलीस स्टेशनचे सहाय्यक पोलीस निरीक्षक विशाल टकले यांनी खुताडवस्ती व वाघ नदी परिसरात तपासणी केली. दरम्यान २४ तासांपासून तपास सुरु असून अद्याप मृत्यूदेह सापडलेला नाही. परिसरातील गावकरी नदीपात्रात शोधमोहीम राबवत असून, मृत्यूदेहाचा शोध घेत आहेत. </p><p>ऐन गणेशोत्सवात खुताडे यांच्या पुराच्या पाण्यात वाहून जाण्याने खुताडवस्ती व परिसरात शोककळा पसरली आहे.</p>
