वीज पडून शेतकऱ्याचा मृत्यू

सुरगाणा | प्रतिनिधी | Surgana

येथील सराड (Sarad) येथे वीज पडून (lightning) ७० वर्षीय शेतकऱ्याचा (Farmer) दुर्दैवी मृत्यू (Death) झाल्याची घटना घडली आहे. त्यामुळे हळहळ व्यक्त होत आहे...

याबाबत अधिक माहिती अशी की, सावळीराम निंबा भोये (वय ७०) असे मृत्यू झालेल्या शेतक-याचे नाव आहे. भोये हे रविवार (दि.१९) रोजी आपल्या शेतात (Farm) घरातील कुणालाही न सांगता सरपण गोळा करण्यासाठी गेले होते. त्याचवेळी वादळी वारा व विजांच्या कडकडाटासह अवकाळी पावसाला (Unseasonal Rain) सुरुवात झाली होती. मात्र, पाऊस थांबल्यानंतर ते घरी परत न आल्याने सायंकाळच्या सुमारास कुटुंबियांनी (Family) शेतात व परिसरात शोधाशोध केली असता ते सापडले नाही.

तसेच यावेळी कुटुंबियांनी त्यांना भजनाचा छंद असल्याने ते भजनात गेले असावेत सकाळी घरी परत येतील असा अंदाज व्यक्त केला होता. मात्र, सोमवार (दि.२०) रोजी सकाळी आठ वाजेच्या सुमारास शेतात शोध घेतला असता शेतातील आंब्याच्या झाडाजवळील खोल खड्डयातील गवताच्या झुडपात त्यांचा मृतदेह (Dead Body) आढळून आला. यावेळी भोये यांच्या डोक्यावर व अंगावर वीज पडून भाजल्याचे आढळून आले.

दरम्यान, यानंतर पोलिसांनी ( Police) तपासणी करत पंचनामा करून मृतदेह शवविच्छेदनासाठी पाठविला. त्यानंतर मृतदेहावर अंत्यसंस्कार करण्यात आले. तर मृत सावळीराम भोये हे पंचायत समितीचे माजी सभापती जनार्दन भोये यांचे वडील होते.