<p><strong>नाशिकरोड । Nashik</strong></p><p>प्रभाग समितीची सभा सभापती जयश्री खर्जुल यांच्या अध्यक्षतेखाली आज महापालिकेच्या नाशिकरोड विभागीय कार्यालयात झाली.</p> .<p>दसक-पंचक येथील गोदावरी नदीत पानवेली वाढल्याने परिसरात डासांचे साम्राज्य वाढले आहे. त्यामुळे नागरिक त्रस्त झाले असून आजारी पडत आहे. प्रशासनाला वारंवार सांगूनही या पानवेली काढल्या जात नाही. त्यामुळे प्रभाग क्रमांक १८ च्या नगरसेविका मीरा हांडगे यांनी सभागृहामध्ये मच्छरदाणी लावून त्यामध्ये बसून आंदोलन केले.</p><p>अधिकारी इथे येऊन पाहणी करत नाही व पानवेली कधी काढणार याचे ठोस आश्वासन देत नाही तोपर्यंत मच्छरदाणीत बाहेर येणार नाही असा पवित्रा नगरसेविका मीरा हांडगे यांनी घेतला. त्यामुळे प्रशासनाची एकच तारांबळ उडाली. सोमवारी पानवेली काढायला सुरुवात करू असे आश्वासन विभागीय अधिकारी डॉ. दिलीप मेनकर यांनी दिला. सोमवारी पानवेली काढल्या नाही तर त्या पानवेलीमध्येच आंदोलन करू असा इशारा मीरा हांडगे यांनी दिला.</p><p>नगरसेवक सूर्यकांत लवटे यांनी विभागीय कार्यालयात व नवीन बिटको रुग्णालयांमध्ये मास्क घातलेल्यानांच प्रवेश द्यावा, अशी सूचना केली. महापालिकेचे काही अधिकारी व कर्मचारी मास्क वापरत नाही. त्यांच्यावर कारवाई करावी अशी मागणी त्यांनी केली.</p><p>करोना काळामध्ये डॉ. जितेंद्र धनेश्वर यांनी उत्तम काम केले. त्यांचा वाढदिवस असल्याने सभागृहांमध्ये त्यांचा सत्कार करण्यात आला. तसेच ज्योती खोले स्थायी समितीवर निवड झाल्याबद्दल सत्कार करण्यात आला.</p><p>करोनाची संकट असताना लोकप्रतिनिधी सभेला उपस्थित राहून आरोग्य व इतर प्रश्न मांडतील अशी नागरिकांची अपेक्षा होती. मात्र, सभेला फक्त पाच नगरसेवक उपस्थित होते. सभापती जयश्री खर्जुल, विभागीय अधिकारी डॉ. मानकर, नगरसेवक जगदीश पवार, सूर्यकांत लवटे, पंडित आवारे, मीरा हांडगे, ज्योती खोले याचा त्यात समावेश होता. काही नगरसेवक आनलाईन सहभागी झाले होते.</p>
