<p><strong>इंदिरानगर । वार्ताहर Indira Nagar</strong></p><p>करोनाच्या प्रादुर्भावामुळे मागील पाच महिन्यांपासून शाळा बंद असतानाही शुल्कवाढ केली. </p>.<p>वसुलीसाठी पालकांवर दबाव टाकणार्या विज्डम हाय इंटरनॅशनल स्कूलवर कारवाई करण्याची मागणी शिवसेना विभागप्रमुख निलेश साळुंखे व पालकांच्या वतीने करण्यात आली असून याबाबत शिक्षण उपसंचालकांना निवेदन देण्यात आले.</p><p>कोविड-19 संकटामुळे आर्थिक परिस्थिती खालावल्यामुळे शाळेची फी भरण्यास पालक असमर्थ आहेत. तरीही शाळा प्रशासन व संस्था संचालकांनी पालकांवर नियमबाह्यपणे फी भरण्यास दबाव आणत आहेत. सध्या पालकांची बिकट आर्थिक परिस्थिती पाहता या बाबी पालकांनी शाळा प्रशासन व संस्था चालकांसमोर मांडल्या.</p><p>परंतु शाळा व्यवस्थापनाच्या आडमुठे धोरणामुळे कोणतीही तडजोड करण्यास शाळा प्रशासन व संस्थाचालक तयार नाही. तसेच पालकांना मामुली सवलत दाखवून तत्काळ फी भरण्यासाठी तगादा लावत आहे, असे निवेदनात नमूद केले आहे.</p><p>संबंधित शाळांवर त्वरित कार्यवाही करण्यात यावी अन्यथा शाळेच्या विरोधात आंदोलन उभारण्यात येईल असा इशारा शिवसेनेचे विभागप्रमुख व नाशिक पालक संघटनेचे अध्यक्ष निलेश साळुंखे यांनी निवेदनाद्वारे दिला. यावेळी प्रदीप यादव, सुषमा गोराने आदींसह पालक उपस्थित होते.</p>
