<p><strong>नाशिक । प्रतिनिधी</strong></p><p>शहरात लॉकडाऊन शिथील झाल्यानंतर करोनाचा वाढता संसर्ग लक्षात घेऊन हा प्रादुर्भाव रोकण्यासाठी आता सहा विभागातील मार्केट, शॉपींग, भाजीपाला मार्केट, बस स्थानक सार्वजनिक ठिकाणी व गर्दीच्या ठिकाणी मास्क न वापणार्यांविरुध्द दंडाची जोरदार मोहीम महापालिका प्रशासनाकडुन सुरू करण्यात आली होती. </p>.<p>आता दुसर्या करोना लाटेची शक्यता लक्षात घेऊन महापालिका प्रशासनाकडुन पुन्हा एकदा धडक कारवाईची तयारी केली आहे. महापालिका प्रशासनाने जुन पासुन ते 19 नोव्हेंबर या कालावधीत 3 हजारावर नागरिकांवर केसेस करीत संबंधीतांकडुन 6 लाखाच्यावर रुपयांचा दंड वसुल करण्यात आला आहे.</p><p>गेल्या जुन महिन्यात राज्य शासनाने लॉकडाऊनमधील अनेक आस्थापने सुरू करण्याचे आदेश दिल्यानंतर नागरिकांची अनेक ठिकाणी गर्दी दिसुन आली, परिणामी करोनाचा मोठा संसर्ग नाशिक महापालिका क्षेत्रात दिसुन आले होते. यामुळे मास्क न वापरणारे व रस्त्यावर व सार्वजनिक जागेवर थुंकणार्यावर दंडात्मक कारवाई करण्यास प्रारंभ करण्यात आला होता.</p><p>महापौर सतिश कुलकर्णी व आयुक्त कैलास जाधव यांनी मास्क न वापरणारे व रस्त्यावर थुंकणारे यांच्यावर कडक दंडात्मक कारवाई करण्याचे आदेश दिले होते. त्यानंतर शहरात मोंठ्या प्रमाणात दंडाची कारवाई करण्यात आली. मध्यंतरी व दिवाळीच्या काळात ही कारवाई थंडावली गेली होता. आता थंडीच्या दिवसात करोनाच्या दुसर्या लाटेची शक्यता असल्याने आता पुन्हा एकदा आयुक्तांनी विभागप्रमुखांच्या बैठकीत विभागीय अधिकार्यांना मास्कसंदर्भातील कारवाई करण्याचे आदेश दिले आहे.</p><p>प्रत्येक विभागातील डीएसआय व एसआय यांच्या पथकाने गर्दीच्या ठिकाणी मास्क न वापरणार्याविरुध्द व सार्वजनिक ठिकाणी रस्त्यावर थुंकणार्याविरुध्द धडक दंडात्मक कारवाई आता सुरू झाली आहे. गेल्या जुन ते आक्टोंबर अशा पाच महिन्याच्या काळात 2 हजार 915 व्यक्तीवर दंडाची कारवाई करीत त्यांच्याकडुन 5 लाख 83 हजार रुपये वसुल करण्यात आला होता.</p><p> आता दंड वसुलीचा आकडा 6 लाखांवर गेला असुन तीन हजारावर नागरिकांवर केसेस करण्यात आल्या आहे. 12 ते 19 नोव्हेंबर या आठवडाभरात मास्कबाबत 19 केसेस करण्यात येऊन 3 हजार 800 रुपये दंड वसुल करण्यात आला असुन या कारवाईला वेग देण्यात आला आहे.</p>
