<p><strong>नंदुरबार | प्रतिनिधी - NANDURBAR</strong></p><p>जिल्ह्यात कोरोना आजाराचा वाढता प्रादुर्भाव लक्षात घेता वाढलेल्या रुग्ण संख्येमुळे रेमडीसीवर इंजेक्शनचा तुटवडा जाणवत आहे. त्या पार्श्वभूमीवर माजी आमदार चंद्रकांत रघुवंशी यांनी पाठपुरावा करून शहर व ग्रामीण भागातील रुग्णांना रेमडीसीवर इंजेक्शन उपलब्ध करून देण्याबाबत जिल्हाधिकार्यांकडे मागणी केली व त्याचा पाठपुरावा केला.</p>. <p>त्याची दखल घेत १००० रेमडीसीवर इंजेक्शन नंदुरबार शहरातल्या सर्व शासन मान्य हॉस्पिटलमध्ये दाखल असलेल्या व आरटी-पीसीआर कोरोना पॉझिटिव्ह रिपोर्ट असलेल्या व ऑक्सिजनवर असलेल्या गरजू रुग्णांना मा.आ.चंद्रकांत रघुवंशी व रोटरी वेलनेस रिटेल यांच्या वतीने फक्त ५५० रुपयात उपलब्ध करून दिलेले आहेत.</p><p>अत्यल्प दरांमध्ये रुग्णांना रोटरी सेंटरच्या माध्यमातून इंजेक्शन पुरविण्यात येणार आहेत. सदर मागणीचे पत्र जिल्हाधिकारी डॉ.राजेंद्र भारूड, जिल्हा शल्य चिकित्सक डॉ. आर.डी.भोये यांना देण्यात आले.</p><p>यावेळी माजी आ.चंद्रकांत रघुवंशी, ऍड.राम रघुवंशी, विनय श्रॉफ, सुनील चौधरी उपस्थित होते. यासंदर्भात त्यांनी तात्काळ इंजेक्शनचा पुरवठा केला व रोटरी सेंटरला १००० इंजेक्शन सुपूर्त केले.</p>
