<p><strong>नवापूर - Navapur - श.प्र. :</strong></p><p>तालुक्यातील विसरवाडी येथे ऑईल फिल्टर विक्रीच्या कारखान्यासह आजुबाजूच्या चार ते पाच घरांना आग लागल्याने लाखो रुपयांचे नुकसान झाले आहे. </p>.<p>विसरवाडी ग्रामपंचायतीच्या मागील गल्लीत दिनेश प्रकाश जयस्वाल यांच्या राहत्या घराच्या पुढील भागात जुने ऑईल फिल्टर विक्री करण्याचा व्यवसाय सुरु केला आहे. </p><p>रहिवासी परिसरात त्यांनी हा कारखाना सुरु केला आहे. दरम्यान, आज दुपारी 1 वाजेच्या दरम्यान अचानक आग लागल्याने क्षणभरात आगीने रौद्ररुप धारण केले. यामुळे कारखाना घरासह जळून खाक झाला आहे.</p>.<p>आज विसरवाडी गावात आठवडे बाजार असल्याने मोठ्या प्रमाणावर गर्दी होती. आगीचे रौद्र रूप बघून बाजारासाठी आलेले लोक सैरावैरा पळत सुटले. </p><p>आजुबाजुच्या चार ते पाच घरांना आगीने विळखा घातल्याने परिसरातील राहणारे लोक जीव वाचवण्यासाठी पळत सुटले. </p><p>अग्निशमन दलाला फोन करुनही लवकर हजर न झाल्याने आग सर्वत्र पसरली. सहाय्यक पोलीस निरीक्षक संदिप पाटील, कॉ.प्रदिप वाघ, अतुल पानपाटील, दिनेश चिते, देवरे, भगवान गुटे यांनी मिळेल तेथून पाणी आणून आग विझवण्याचे प्रयत्न केले.</p><p> परंतु आगीचे रौद्र रूप पाहता लाखो रुपयांची हानी झाली असल्याचे प्रथमदर्शनी दिसून येत आहे. ग्रामपंचायत कर्मचारीही आग विझवण्याचा प्रयत्न करत होते. </p><p>आगीमुळे वीज पुरवठा लाईन केबल जळून खाक झाले असून या आगीमुळे विसरवाडी परिसरात खळबळ उडाली आहे</p>
