नंदुरबार | प्रतिनिधी NANDURBAR
नंदुरबार जिल्ह्यातील अनुसूचित क्षेत्राबाहेर येणार्या शहादा तालुक्यातील ३५ व नंदुरबार तालुक्यातील ४१ अशा एकुण ७६ ग्रामपंचायतींच्या सरपंच पदाची आरक्षण सोडत तालुकास्तरावर २९ जानेवारी रोजी शहादा व नंदुरबार तहसिल कार्यालयात काढण्यात येणार आहे.
तर ५९५ ग्रामपंचायतींमधील महिला सरपंच पदाची आरक्षण सोडत ४ फेब्रुवारी २०२१ रोजी सकाळी ११ वाजता जिल्हाधिकारी कार्यालयाच्या बिरसामुंडा सभागृहात काढण्यात येणार आहे.
नंदुरबार जिल्ह्यातील अनुसूचित क्षेत्रात समाविष्ट असलेल्या एकुण ५१९ ग्रामपंचायती व अनुसूचित क्षेत्राबाहेरील ७६ ग्रामपंचायती अशा एकूण ५९५ ग्रामपंचायतींमधील महिला सरपंच पदाची आरक्षण सोडत ४ फेब्रुवारी २०२१ रोजी सकाळी ११ वाजता जिल्हाधिकारी कार्यालय नंदुरबार येथील बिरसामुंडा सभागृहात काढण्यात येणार आहे.
सदर आरक्षण हे १ एप्रिल २०२० ते ३१ मार्च २०२५ या पाच वर्षाच्या कालावधीत सार्वत्रिक निवडणूका होऊन गठित होणार्या ग्रामपंचायतीसाठी लागू राहणार आहे.
कोविड-१९ च्या पार्श्वभूमीवर सदर आरक्षण काढतांना घेण्यात येणार्या सभेत सार्वजनिक आरोग्य विभाग व मदत व पुर्नवसन विभाग तसेच जिल्हाधिकारी नंदुरबार यांनी वेळोवेळी दिलेल्या आरोग्यविषयक सुचना व आदर्श कार्यप्रणाली संहिता या बाबींचे पालन होण्याबाबत कटाक्षाने काळजी घेण्यात यावी, असे आवाहन उपजिल्हाधिकारी बबन काकडे यांनी केले आहे.