<p><strong>जळगाव - Jalgaon</strong></p><p>जिल्हा प्रशासन व प्रादेशिक पर्यटन संचालनालय यांच्या संयुक्त विद्यमाने मार्च 2021 मध्ये पर्यटन महोत्सवांचे आयोजन करण्यात येणार आहे.</p>.<p>त्यानुसार उपसंचालक पर्यटन संचालनालयामार्फत विभागात नाशिक जिल्ह्यात पक्षी महोत्सव, नांदूर मध्यमेश्वर पक्षी अभयारण्य 25 व 26 मार्च, 2021 रोजी ग्रेप हार्वेस्टिंग महोत्सव, ग्रेप पार्क रिसॉर्ट, नाशिक येथे 27 व 28 मार्च रोजी तर अहमदनगर जिल्ह्यात भंडारदर महोत्सव, भंडारदरा, तालुका अकोले याठिकाणी 6 व 7 मार्च रोजी तर धुळे येथे लळिंग किल्ला महोत्सव, लळिंग किल्ला, धुळे याठिकाणी 14 मार्च 2021 रोजी आयोजित करण्यात आलेला आहे.</p><p>विभागात आयोजित महोत्सवांमध्ये स्थानिक शेतकरी व आदिवासी यांनी उत्पादित केलेल्या वस्तूंचे प्रदर्शन व विक्री, ट्रेकिंग, विविध विषयावरील मार्गदर्शनपर व्याख्याने, छायाचित्र व चित्रकला स्पर्धा, किल्ले बनविण्याची स्पर्धा, ऐतिहासिक पोवाडा पर्यटनस्थळांची टूर, फॅशन शो, वाईन क्वीन स्पर्धा, पक्षी निरीक्षण, कृषी पर्यटन धोरणाबाबत मार्गदर्शन, शेती व त्यापासून विविध पदार्थ बनविणे, स्थानिक कलासंस्कृती, खाद्यपदार्थ व हस्तकला यांचे प्रदर्शन व विक्री, सांस्कृतिक कार्यक्रम इत्यादी विविध कार्यक्रमांची मेजवानी पर्यटकांना अनुभवता येणार आहे.</p><p> तरी याठिकाणी त्यादिवशी पर्यटकांनी या महोत्सवाचा आस्वाद घ्यावा, असे आवाहन नितीनकुमार मुंडावरे, उपजिल्हाधिकारी तथा उपसंचालक पर्यटन संचालनालय, नाशिक यांनी एका प्रसिध्दी पत्रकान्वये केले आहे</p>
