<p><strong>जळगाव - Jalgaon - प्रतिनिधी :</strong></p><p>शहरातील शासकीय वैद्यकीय महाविद्यालयात गेल्या दिड महिन्यापासून नॉन कोविड रुग्णांसाठी ओपीडी सुरु करण्यात आली आहे. </p>.<div><blockquote>शासकीय वैद्यकीय महाविद्यालय व रुग्णालयात अद्ययावत सोयीसुविधा सुरू झालेल्या आहे. नागरिकांनी अधिकाधिक वैद्यकीय सेवेचा लाभ घेण्यासाठी कोरोना काळामध्ये नागरिकांनी उपस्थिती द्यावी. </blockquote><span class="attribution">डॉ.जयप्रकाश रामानंद, अधिष्ठाता</span></div>.<p>दिड महिन्यात रुग्णालयात विविध विभागात 11 हजार जणांची तपासणी करुन त्यांच्यावर उपचार घेतले असून 215 जणांवर यशस्वी शस्त्रक्रिया करण्यात आली आहे.</p><p>कोरोनाच्या प्रादुर्भाावामुळे शासकीय वैद्यकीय महाविद्यालय व रुग्णालय हे कोविड रुग्णालय म्हणून 5 एप्रिल 2020 पासून घोषित झाले होते. </p><p>जिल्हाधिकारी तथा आपत्ती व्यवस्थापन प्राधिकरण अधिकारी अभिजित राऊत यांनी बुधवारी 16 डिसेबर पासून हे रुग्णालय कोरोना व्यतिरिक्त सेवा देण्यासाठी सुरु करण्याची घोषणा केल्यावर गुरुवारी 17 डिसेंबर पासून कोरोना व्यतिरिक्त व्याधींसाठी वैद्यकीय सेवा प्रारंभ झाली.</p>.<p>रुग्णालयात औषधांचा साठा देखील मुबलक उपलब्ध आहे. दिवसभरात स्त्री रोग, बालरोग, दुखापती, सर्दी-खोकला, ताप, डोळे तपासणी, नाक-कान-घसा, लसीकरण, मधुमेह, हृदयरोग, दंतचिकीत्सा, किडनी आजार, प्राण्यांचे चावे, सोनोग्राफी, अस्थिविकार, मलेरिया, डेंग्यू, फुफ्फुस संबंधित, कुटुंब नियोजन, मनोविकार, त्वचारोग, मणका-सांध्याचे आजार याबाबत उपचार घेण्यासाठी तसेच ईसीजी, एक्सरे करण्यासाठी रुग्ण दवाखान्यात दररोज येत आहेत. </p><p>सकाळी 8. 30 वाजेपासून 1 वाजेपर्यंत ओपीडी सेवेची वेळ आहे. जिल्ह्यातील एकूण 6 हजार 237 पुरुष व 5 हजार 121 महिला अशा 11 हजार 358 रुग्णांनी ओपीडीतील वैद्यकीय सेवांचा गेल्या दीड महिन्यात लाभ घेतला आहे.</p>.<p><strong>जानेवारीत सर्वाधिक शस्त्रक्रिया</strong></p><p>रुग्णालयात शस्त्रक्रिया विभाग अद्ययावत झालेला आहे. याठिकाणी गेल्या दीड महिन्यात 215 लहान-मोठ्या प्रकारच्या शस्त्रक्रिया यशस्वी झालेल्या आहेत. त्यात डिसेंबरमध्ये 15 दिवसात 42, जानेवारी महिन्यात 173 शस्त्रक्रिया झालेल्या आहेत. गरजूंना वैद्यकीय सेवा देण्यासाठी महात्मा फुले जनआरोग्य योजना कार्यालय सुरु झालेले आहे.</p>
