जिल्ह्यात 136 खासगी रुग्णालयांना 760 रेमडेसिविरचा पुरवठा

उपलब्ध रेमडेसिविरच्या साठ्यापैकी 10 टक्के साठा फ्रंटलाइन वर्कर्ससाठी राखीव
जिल्ह्यात 136 खासगी रुग्णालयांना 760 रेमडेसिविरचा पुरवठा

जळगाव - Jalgaon - प्रतिनिधी :

कोरोना बाधित रूग्णांवर उपचारासाठी आज जिल्ह्यातील 136 खाजगी हॉस्पिटल्सना 760 रेमडेसिवीर इंजेक्शन्सच्या व्हायल्सचे वितरण करण्यात आले.

त्यामुळे खासगी रुग्णालयात रुग्णाच्या नातेवाईकांची होणारी फरफट काही अंशी थांबली आहे.औषध निर्मात्या कंपनीकडून शनिवारी जिल्ह्याला 760 रेमडेसिवीर इंजेक्शनच्या व्हायल्स प्राप्त झाल्या आहेत.

त्यानुसार जिल्ह्यातील कोविड उपचार करणा-या 117 खाजगी रुग्णालयांना ऑक्सीजन बेडच्या संख्येनुसार 315 रेमडेसिवीर इंजेक्शन्सच्या व्हायल्स या महानगरपालिका, नगरपालिका, नगरपरिषदा व ग्रामीण क्षेत्रातील हॉस्पिटल्सला वितरीत करण्यात आल्या आहेत.

तर 19 कोविड हॉस्पिटलला 436 व्हायल्स कंपनीकडून घाऊक विक्रेत्यांमार्फत परस्पर वितरण होत आहे. तर प्राप्त साठ्यापैकी 10 टक्के साठा हा फ्रंटलाईन वर्कर्ससाठी राखीव ठेवण्यात येत आहेत.

रुग्णालयात होतेय इंजेक्शनचे वितरण

कोविड रूग्णालयांनी सदरचा औषध साठा प्राप्त करून घेणेकामी रूग्णालयाच्या लेटर हेडवर सही शिक्क्यासह प्राधिकारपत्र व प्राधिकृत व्यक्तीचे फोटो ओळखपत्र घाऊक विक्रेत्याकडे सादर करणे आवश्यक आहे. याबाबतची खातरजमा करून घाऊक विक्रेत्यांनी औषधाचे सुयोग्य वितरण सदर आदेशाचे दिनांकास मुदतीत व शासकीय, वाजवी दरात करण्याबाबत सुचना देण्यात आल्या आहेत. त्यामुळे सर्व कोविड हॉस्पिटलमध्ये रुग्णांना थेट साठा उपलब्ध होत असल्याने रुग्णाच्या नातेवाईकांची होणारी फरफट काही अंशी कमी झाली आहे.

भरारी पथकाडून काळ्याबाजावर नियंत्रण

जिल्ह्यातील रेमडेसिवीर इंजेक्शनचा तुटवडा व होणारा काळाबाजार लक्षात घेता सहाय्यक आयुक्त, अन्न व औषध कार्यालय हे रेमडेसिवीर नियंत्रण कक्ष कार्यान्वित करण्यात आला आहे.

रेमडेसिवीरचा काळाबाजार रोखण्याच्या अनुषंगाने शहरी व ग्रामीण भागात भरारी पथके प्रांताधिकारी व तहसिलदार यांचे नियंत्रणाखाली स्थापन करण्यात आली असून त्यांचेमार्फत रुग्णालये, स्टॉकिस्ट व वितरक यांचेकडील रेमडेसिवीरची उपलब्धता व सुयोग्य वापर यावर नियंत्रण ठेवण्यात येत आहे.

त्यासोबतच महानगरपालिका, नगरपालिका प्रशासन व नगर पंचायतसह आयुक्त औषध व प्रशासन यांनी प्राधिकृत केलेल्या आरोग्य अधिकारी यांनी नियंत्रण करणेबाबतही सुचना देण्यात आल्या आहेत.

रुग्णालय निहाय इंजेक्शनचे वाटप

रेमडेसिवीर इंजेक्शनचा काळाबाजार होऊ नये याकरीता दररोज जिल्ह्याला प्राप्त होणार्‍या रेमडेसिवीर इंजेक्शनचे रूग्णालय निहाय वाटप केले जात आहे. वाटप केलेल्या इंजेक्शनची हॉस्पिटलनिहाय रेमडेसिवीर इंजेक्शन्सच्या संख्येसह व वितरकाच्या नाव व मोबाईल क्रमांकासह यादी देखील केली जात असल्याने यामध्ये सुसूत्रता आली असल्याचे जिल्हाधिकारी राऊत यांनी सांगितले.

Latest Marathi News, Marathi News Paper, Breaking News In Marathi, Marathi Batmya Live
www.deshdoot.com