<p><strong>जळगाव - Jalgaon - प्रतिनिधी :</strong></p><p>करोनाच्या लसीकरणा संदर्भात आज जिल्ह्यात चार ठिकाणी ड्राय रनची चाचणी घेण्यात आली. या चाचणीत आठ टप्पे पार करीत प्रत्येक केंद्रावर 25 आरोग्य कर्मचार्यांना डमी लस देवून ही चाचणी यशस्वी करण्यात आली.</p>.<p>यावेळी जिल्ह्याचे पालकमंत्री ना. गुलाबराव पाटीलांसह जिल्हाधिकार्यांनी या ड्राय रनचा आढावा घेतला.</p><p>कोविड 19 लसीकरणाच्या पार्श्वभूमीवर शासकीय वैद्यकीय महाविद्यालय व रुग्णालयाच्या नर्सिंग महाविद्यालयात कोरोना लसीकरणाचा ड्राय रन आज पार पडला.</p><p> यावेळी पालकमंत्री गुलाबराव पाटील, जिल्हा शल्यचिकित्सक डॉ. चव्हाण, अधिष्ठाता डॉ. रामानंद, जिल्हा आरोग्य अधिकारी डॉ. जमादार, प्रशासकीय अधिकारी डॉ. उत्तम तासखेडकर, नोडल अधिकारी डॉ. विलास मालकर, वैद्यकीय अधीक्षक डॉ. वैभव सोनार, जिल्हा माता व बालसंगोपन अधिकारी डॉ. समाधान वाघ उपस्थित होते. सुरुवातीला पालकमंत्री ना. पाटील यांना ड्राय रनच्या पूर्व तयारीची माहिती देण्यात आली.</p>.<p><strong>अशी झाली लसीकरणाची प्रक्रिया</strong></p><p>लसीकरणाच्या ड्राय रनला सुरुवातव झाल्यानंतर सुरुवातीला आरोग्य कर्मचारी मिलिंद निवृत्ती काळे यांना पहिली, तर राकेश अरुण पाटील यांच्यावर लसीकरणाची दुसरी चाचणी करण्यात आली. यावेळी अधिपरिचारक संपत मल्हार यांनी त्यांची संगणकावर नोंद केल्यावर परिचारिका कुमुद जवंजाळ यांनी मिलिंद काळे व राकेश पाटील यांना प्रातिनिधिक लस टोचली. त्यानंतर त्यांना निरीक्षण कक्षात डॉ. डॅनियल साझी यांच्या निरीक्षणात ठेवण्यात आले.</p><p><strong>पालकमंत्र्यांनी केला गौरव</strong></p><p>पालकमंत्री ना. पाटील यांच्या हस्ते मिलिंद काळे व राकेश पाटील यांचा शाल व श्रीफळ देऊन सत्कार करण्यात आला. तसेच त्यांनी शासकीय वैद्यकीय महाविद्यालयाच्या नर्सिंग कॉलेज इमारतीची रचना, पाहणी करून समाधान व्यक्त केले. लसीकरणासाठी डॉ. योगिता बाविस्कर, डॉ. जितेंद्र सुरवाडे, डॉ. गणेश लोखंडे, डॉ. संदीप सूर्यवंशी, अधिसेविका कविता नेतकर परिचारिका जयश्री वानखेडे, कर्मचारी अनिल बागलाणे आदींनी परिश्रम घेतले.</p>.<p><strong>जिल्हाधिकार्यांनी दिली अचानक भेट</strong></p><p>कोरोना लसीकरणाच्या ड्राय रन च्या पार्श्वभूमीवर जिल्हाधिकारी अभिजित राऊत यांनी धामणगाव येथील प्राथमिक आरोग्य केंद्रास अचानक भेट देवून तेथील ड्रायरनची पाहणी केली. तसेच आरोग्य यंत्रणेस याबाबत मार्गदर्शन व महत्वपूर्ण सुचनाही केल्यात. जिल्हा प्रशासन कोविड 19 लसीकरणासाठी सज्ज आहे. या सज्जतेेचा एक भाग म्हणून आज जिल्ह्यात चार ठिकाणी प्रत्येकी 25 व्यक्तींवर लसीकरणाची रंगीत तालीम घेण्यात आली असून ती यशस्वीपणे पार पडल्याचे त्यांनी यावेळी सांगितले.</p><p><strong>याठिकाणी झाले ड्राय रन</strong></p><p>जिल्ह्यातील शासकीय वैद्यकीय महाविद्यालय, जळगाव महापालिकेचे शिवाजीनगरातील डी.बी. जैन हॉस्पीटल, जळगाव तालुक्यातील धामणगाव प्राथमिक आरोग्य केंद्र तर जामनेर येथील उपजिल्हा रुग्णालयात ड्राय रनची चाचणी घेण्यात आली. यात शीतगृहापासून व्हॅक्सिन कॅरिअरमधून लसीकरण केंद्रापर्यंत लस पोहचविण्यापर्यंत लागणार्या वेळेची नोंद देखील करण्यात आली आहे.</p>
