<p><strong>जळगाव । प्रतिनिधी Jalgaon</strong></p><p>भुसावळ रोडवरील हॉटेल कमल पॅरेडाईज येथे लग्नाच्या समारंभातून वधूचेच अडीच लाख रूपये रोकड व सोन्याचे दागिने असा एकूण सुमारे 16 लाख 10 हजार रूपये किंमतीचा मुद्देमाल लांबविल्याची धक्कादायक घटना 15 फेब्रुवारी रोजी घडली.</p>.<p>अवघ्या 15 मिनिटात चोरट्यांनी ही हातसफाई केल्याचे समोर आले असून दोन अल्पवयीन मुलासह एक संशयित सीसीटीव्ही कॅमेर्यात कैद झाला आहे. सीसीटीव्ही फुटेज शनिपेठ पोलिसांनी जप्त केले असून त्यानुसार पोलीस संशयितांच्या शोधार्थ कामाला लागले आहेत.</p><p>युवराज विश्वनाथ नेमाडे (वय-53) रा. बाविसे गल्ली, रावेर यांच्या मुलीचे लग्न जळगाव-भुसावळ रोडवरील हॉटेल कमल पॅरेडाईज येथे सोमवारी 15 फेब्रुवारी रोजी आयोजित करण्यात आले होते. त्यानिमित्ताने त्यांचे नातेवाईकांसह आणि परिवारासह लग्नाला आलेले होते. नवरी मुलीचे सर्व दागीने तिच्या मावशीकडे संभाळायला ठेवण्यात आले होते.</p><p>दुपारी 1.43 ते 2 वाजेच्या दरम्यान अज्ञात चोरटे यात एक व्यक्ती आणि दोन लहान मुलांनी लग्न समारंभात वर्हाडी व्यस्त असतांना पिशवीतून अडीच लाख रूपयांची रोकड, 1 लाख रूपये किंमतीची दोन तोळ्याची सोन्याची दोन चैन, 55 हजार रूपये किंमतीची सोन्याची अंगठी, 55 हजार रूपये किंमतीची 1 तोळ्याची सोन्याची चैन, 4 लाख रूपये किंमतीचा सोन्याचा हारसेट त्यात कानातील रिंगा, अंगठी, ब्रेसलेट, 42 हजार रूपये किंमतीचे सोन्याचे</p><p>मंगळसुत्र, 4 लाख रूपये किंमतीच्या सोन्याच्या बांगड्या, 70 हजार रूपये किंमतीचे सोन्याचे झुमके, 42 हजार रूपये किंमतीचा सोन्याची गॅम वजनाची बिंदी, 42 हजार रूपये किंमतीची 8 ग्रॅम वजनाचे कानातील लोमटे, 1 लाख 12 हजार रूपये किंमतीचे सोन्याचे मोराचे पॅन्डल असलेले पैंडल असा एकूण 16 लाख 10 हजार रूपये किंमतीचा मुद्देमाल लंपास केला आहे.</p><p><strong>एक अनोळखी व्यक्ती आणि दोन मुले कैद</strong></p><p>युवराज विश्वनाथ नेमाडे हे शेतकरी असून व्यापारी देखील आहे. हॉटेल कमल पॅरडाईज येथे लग्नाच्या हॉलमध्ये चोहीबाजूने सीसीटीव्ही बसविण्यात आले आहे. दरम्यान, चोरटे हे सीसीटीव्हीत कैद झाले आहेत. यात एक अनोळखी व्यक्ती आणि त्याच्यासोबत दोन लहान मुले असल्याचे दिसून येत आहे. युवराज नेमाडे यांनी तत्काळी सोमवारी सायंकाळी 8 वाजता शनीपेठ पोलीसात धाव घेवून घटनेची माहिती दिली.</p><p> घटनास्थळी सहाय्यक पोलीस अधिक्षक कुमार चिंथा, पोलीस निरीक्षक विठ्ठल ससे यांनी धाव घेवून घटनेची माहिती जाणून घेतली. याप्रकरणी युवराज नेमाडे यांच्या फिर्यादीवरून अज्ञात तिघांवर शनीपेठ पोलीस ठाण्यात गुन्हा दाखल करण्यात आला आहे. हॉटेल कमल पॅरेडाईज येथील सीसीटीव्हीत कैद झालेल्या तिन जणांचा शोध घेण्याचे काम सुरू आहे.</p>
