<p><strong>जळगाव - Jalgaon - प्रतिनिधी :</strong></p><p>मू.जे. महाविद्यालय परिसरात दुकानदारांनी तब्बल 20 ते 25 फुटांचे शेड उभारुन अतिक्रमण केले होते. </p>.<p>स्वतःहून शेड काढण्याबाबत संबंधीत दुकानदारांना आठ दिवसांपुर्वी सूचित केले होते. मात्र स्वतःहून न काढल्याने आज उपायुक्त संतोष वाहुळे यांच्या नेतृत्वाखाली पथकाने जेसीबीव्दारे जवळपास 20 ते 25 दुकानांसमोरील शेड हटविले. दरम्यान, कारवाईला विरोध करणार्या तीन जणांविरुध्द रामानंदनगर पोलिसात गुन्हा दाखल करण्यात आला आहे.</p><p>मू.जे. महाविद्यालय परिसरात अतिक्रमण निर्मुलनाची कारवाई करतांना तीन दुकानदारांनी कारवाईला विरोध करत महानगरपालिकेच्या कर्मचार्यांशी वाद घातला. </p><p>त्यामुळे संजय पवार यांनी दिलेल्या फिर्यादीवरुन गौरव लवंगळे, तर ज्ञानेश्वर कोळी यांनी दिलेल्या फिर्यादीवरुन विशाल मेघानी, नारायण मेघानी यांच्याविरुध्द रामानंदनगर पोलीस ठाण्यात गुन्हा दाखल करण्यात आला आहे.</p>.<p><strong>विनापरवानगी फलक काढले</strong></p><p>ओंकारेश्वर मंदिर परिसरात काही खासगी क्लासेसचे विनापरवानगी लावलेले फलक दिसून आले. </p><p>दरम्यान, महानगरपालिकेच्या पथकाने कारवाई करत 25 ते 30 फलक काढले. विनापरवानगी फलक लावणार्यांविरुध्द फौजदारी गुन्हा दाखल करण्यात येणार असल्याची माहिती उपायुक्त संतोष वाहुळे यांनी दिली.</p><p><strong>दाणाबाजारातून तीन पिकअप व्हॅन जप्त</strong></p><p>दाणाबाजारात वाहतूकीला अडथळा ठरत असल्यामुळे मालवाहू वाहनांना केवळ 10 च्या पुर्वी आणि सायंकाळी 5 नंतर परवानगी आहे. </p><p>तीन दिवसांपुर्वी दोन मालवाहू ट्रक जप्त केले होते. आज पुन्हा तीन पीकअप व्हॅन जप्त करण्याची कारवाई करण्यात आली.</p>
