<p><strong>जळगाव - Jalgaon - प्रतिनिधी :</strong></p><p>कामावरुन दुचाकीने घरी जात असलेल्या तरुणाने रस्त्यावर उभ्या असलेल्या ट्रकला मागून जोरदार धडक दिल्याची घटना पाचोरा-खेडगार दरम्यान घडली. </p>.<p>धडक इतकी जोरदार होती की दुचाकीस्वार तरुण या अपघातात गंभीर जखमी झाला. या तरुणाला जिल्हा रुग्णालयात दाखल केले असता त्याच्यावर उपचार सुरु असतांनाा त्याचा बुधवारी रात्री 11 वाजेच्या सुमारास मृत्यू झाला.</p><p>याबाबत पोलिसांकडून मिळालेली माहिती अशी की, जळगाव तालुक्यातील पाथरी येथील देवेंद्र हिरामण चौधरी (वय 28) हा तरुण पाचोरा येथे एका कापड दुकानावर कामाला आहे. </p>.<p>दररोज तो या (एमएच 19 बीडी 9971) क्रमांकाच्या दुचाकीने पाथरी वराड ते पाचोरा ये-जा करीत होता. नेहमीप्रमाणे 24 मार्च रोजी रात्री 8 वाजता कामावरून दुचाकीने पाथरी येथे जाण्यासाठी निघाला.</p><p>पाचोरा -खेडगाव रस्त्यादरम्यान मुख्य रस्त्यावरून जात असतांना रस्त्यावर उभा असलेला (एमएच 04 एफपी 1542) क्रमांकाच्या ट्रकला दुचाकीने मागून धडक दिली. यात देवेंद्र चौधरी गंभीररित्या जखमी झाला.</p>.<p><strong>उपचार सुरु असतांना मालवली प्राणज्योत</strong></p><p>तरुणाने दुचाकीला धडक दिल्याचे बघताच नागरिकांनी त्याला तात्काळ खासगी वाहनाने शासकीय वैद्यकीय महाविद्यालयात दाखल केले. याठिकाणी त्याच्यावर उपचार सुरु असतांना रात्री 11 वाजेच्या सुमारास त्याची प्राणज्योत मालवली.</p><p><strong>मयत देवेंद्र हा एकुलता एक मुलगा</strong></p><p>मयत दवेंद्र याच्या पश्चात आई उषाबाई, विवाहित बहिण आणि वडील असा परिवार आहे. घरातील एकुलता एक मुलगा गेल्याने गावात शोककळा पसरली असून हळहळ व्यक्त केली जात आहे. याप्रकरणी शनीपेठ पोलीसात झीरोनंबरने अकस्मात मृत्यूची नोंद करण्यात आली आहे.</p>
