<p><strong>जळगाव - Jalgaon - प्रतिनिधी :</strong></p><p> महापौर जयश्री महाजन यांनी सोमवारी दुपारी महापौरपदाचा पदभार स्वीकारला. त्यानंतर लागलीच दुपारी त्यांनी करोनाच्या पार्श्वभूमीवर आढावा घेतला. </p>.<p>सध्या करोनाबाधितांची संख्या वाढू लागली आहे. शासकीयसह खाजगी रुग्णालयात बेड उपलब्ध नसल्यामुळे रुग्णांसह नातेवाईकांची फरपट सुरु आहे.</p><p>त्यामुळे मनपाच्यावतीने जास्तीत जास्त बेड वाढविण्याच्या सूचना केल्या आहे. तसेच लसीकरणाचे केंद्रे देखील लवकरात लवकर वाढविण्याचेही महापौर जयश्री महाजन यांनी सांगितले.</p>.<p>महापौर जयश्री महाजन यांनी 17 व्या मजल्यावरील महापौर दालनात कोरोनाचा आढावा घेण्यासाठी बैठक आयोजित केली.</p><p>यावेळी उपमहापौर कुलभूषण पाटील, आयुक्त सतिष कुलकर्णी, स्थायी समिती सभापती राजेंद्र पाटील, जेष्ठ नगरसेवक नितीन लढ्ढा, सभागृह नेते ललित कोल्हे, रियाज बागवान, प्रशांत नाईक, सहाय्यक आयुक्त पवन पाटील, शहर अभियंता अरविंद भोसले, प्रमुख वैद्यकीय अधिकारी डॉ.राम रावलानी, डॉ.संजय पाटील, बाबा साळुंखे, डॉ.विजय घोलप यांच्यासह सर्व वैद्यकीय अधिकारी उपस्थित होते.</p>.<p><strong>महापौरांनी घेतला आढावा</strong></p><p>महापौर जयश्री महाजन यांनी सर्वप्रथम करोना रुग्णांसाठी सध्या असलेल्या व्यवस्थेची माहिती आणि सोयसुविधांचा आढावा घेतला. </p><p>कोविड सेंटर आणि शहर मनपाकडून केल्या जाणार्या उपायांची महापौरांनी माहिती घेतली.शहर मनपाकडून शासकीय अभियांत्रिकी महाविद्यालयाच्या वसतिगृहासह इतर ठिकाणी कोविड केअर सेंटर उभारण्यात आले आहे. </p><p>करोना पॉझिटिव्ह रुग्णांची संख्या दररोज वाढत असून त्यादृष्टीने जास्तीत जास्त बेडची संख्या वाढवावी, शक्य असल्यास आणखी काही कोविड सेंटर सुरू करावे लागले तर तशी तयारी देखील ठेवा, अशा सूचना महापौर जयश्री महाजन यांनी केल्या.</p>.<p><strong>एक खिडकी योजना सुरू करा</strong></p><p>जळगाव मनपाच्या कोविड सेंटरमध्ये उपचारार्थ आणि तपासणीसाठी आलेल्या रुग्णांची कोणतीही गैरसोय होऊ नये यासाठी सर्व कोविड सेंटरने आपसात समन्वय ठेवावा.</p><p>जर आपल्याकडे जागा शिल्लक नसेल तर त्यांना खाजगी मोफत कोविड सेंटरला पाठविण्यात यावे, असेही महापौरांनी सांगितले. नागरिकांची आणि नातेवाईकांची फिराफिर होऊ नये यासाठी एक खिडकी योजना कार्यान्वित करा अशा सूचना महापौर जयश्री महाजन यांनी केल्या.</p><p>जळगाव ग्रामीणचे काही रुग्ण देखील मनपाच्या कोविड सेंटरमध्ये दाखल आहेत, ग्रामीणच्या रुग्णांसाठी स्वतंत्र कोविड सेंटर असावे याबाबत जिल्हाधिकार्यांशी चर्चा झाली असून ते तशी व्यवस्था करणार असल्याची माहिती मनपा आयुक्तांनी दिली.</p><p><strong>गर्दी नियंत्रणासाठी कार्यवाहीच्या सूचना</strong></p><p>जळगावात कोरोनाने मृत्यू होणार्यांची संख्या वाढत आहे. गेल्यावर्षी नेरीनाका स्मशानभूमी केवळ कोरोनाने मृत्यू झालेल्यांसाठी राखीव होती. पुन्हा आता तशी परिस्थिती आली असून त्यादृष्टीने व्यवस्था करावी. करोनाने मृत्यू होणारे आणि सामान्य व्यक्तींसाठी स्वतंत्र अंत्यसंस्कार व्यवस्था करावी. अंत्यसंस्कारप्रसंगी होणारी गर्दी अद्यापही नियंत्रणात येत नसून त्यासाठी कार्यवाही करावी, असेही महापौर जयश्री महाजन यांनी सांगितले.</p>
