<p><strong>जळगाव - Jalgaon - प्रतिनिधी :</strong></p><p>शहरातील मनपाच्या शासकीय अभियांत्रिकी महाविद्यालयाच्या वस्तीगृहात कोविड केअर सेंटरमध्ये बाधिताकडे दारुच्या बाटल्या व गुटखा आढळून आल्याचा प्रकार उघडकीस आला.</p>.<p>हा प्रकार महापौरांना समजताच त्यांनी त्या बाधिताला दम देत त्याची कानउघडणी केली. यावेळी त्या तरुणाने महापौरांना आत्महत्या करण्याची धमकी दिली असता त्या तरुणाविरुद्ध रामानंदनगर पोलिसात गुन्हा दाखल करण्यात आला आहे.</p><p>शहरात दररोज रुग्ण संख्या वाढत असल्याने मनमाचे कोविड सेंटरमध्ये बेड शिल्लक नसल्याची परिस्थिती निर्माण झाली आहे. </p><p>महापौर सर्व सेंटरमधील रुग्णांची विचारपुस करीत त्याठिकाणावरील कामकाजाचा आढावा घेत असतात. आज नेहमीप्रमाणे महापौर आढावा घेत असतांना अविनाश पाटील नामक एक मद्यपी गोंधळ घालत असल्याची माहिती महापौर भारती सोनवणे यांना मिळाली. </p><p>त्यांनी तात्काळ त्याठिकाणी दाखल होत सर्व प्रकार जाणून घेतला. योवळी नगरसेवक कैलास सोनवणे, डॉ.विजय घोलप यांच्यासह इतर अधिकारी व कर्मचारी उपस्थित होते.</p>.<p><strong>आतून कडी लावत देत होता धमकी</strong></p><p>महापौर त्या बातिधाला खडसावत असतानाही त्याने मद्यप्राशन केलेले होते. महापौरांनी त्याला जाब विचारल्यानंतर त्याने टेबलावर ठेवलेली गुटख्याची पुडी उचलून वर पळ काढला आणि स्वतःच्या खोलीत जात आतून कडी लावून घेतली. मद्यपी इतक्यावरच थांबला नाही तर खोलीतून तो पुन्हा पुन्हा आत्महत्येची धमकी देत होता.</p><p><strong>तिघांविरुद्ध गुन्हा दाखल</strong></p><p>मनपा कोविड केअर सेंटरमध्ये दारू पिऊन गोंधळ घालणार्या अविनाश अरुण पाटील याच्यासह कोविड केअर सेंटरच्या बाहेर जाऊन परत येणार्या गजानन विजय काकडे, प्रसन्न प्रदीप सराफ यांच्याविरुद्ध रामानंद नगर पोलिसात डॉ.विजय घोलप यांच्या फिर्यादीवरून अदखलपात्र गुन्हा दाखल करण्यात आला आहे. नियमांचे उल्लंघन करणार्यांवर गुन्हे दाखल करण्याचे आदेश महापौर भारती सोनवणे यांनी दिले आहे.</p>
