<p><strong>भुसावळ - प्रतिनिधी - Bhusawal :</strong></p><p>रेल्वेत विनातिकीट प्रवास करणार्या प्रवाशांची तपासणी करीत असताना संबंधित प्रवाशांनी तिकीट निरीक्षकांना घेराव घालून मारहाण केल्याची घटना लोकमान्य टिळक गोदान एक्सप्रेसमध्ये भुसावळ स्थानकावर घडली. </p>.<p>याबाबत रेल्वे लोहमार्ग पोलीस ठाण्यात तीन संशयितांविरुद्ध गुन्हा दाखल करण्यात आला असून त्यांना पोलिसांनी ताब्यात घेतले आहे.</p><p>लोहमार्ग पोलिसांकडून मिळालेल्या माहितीनुसार, गाडी क्र. ०१०६० लोकमान्य टिळक गोदान एक्सप्रेस सकाळी ७.४० वाजेच्या सुमारास रेल्वे स्थानकावरून सुटल्यानंतर गाडीमध्ये तिकीट निरीक्षक सतीश कुमार रामस्वरूप आणि धीरज कुमार हे प्रवाशांची तिकीट तपासणी करीत होते. </p>.<p>या दरम्यान गाडीतील एस.१० डब्यात जाऊन सीट क्र. ९ ते १४ वरील प्रवाशांना तिकीटांची विचारणा केली असता, या सीटवरील जवळपास १० ते १५ प्रवाशांनी सतीश कुमार आणि धीरजकुमार यांना घेराव घातला.</p><p>तसेच त्यांना मारहाण करीत त्यांना या डब्यातच घेराव करून डांबून ठेवल्याचे अधिकार्यांनी सांगितले. यावेळी सतीश कुमार यांनी रेल्वे कंट्रोल अधिकार्यांशी संपर्क साधून घटनेची माहिती दिली.</p><p>त्यावेळी चाळीसगाव रेल्वे स्थानकावर गाडी थांबवण्यात आली. मात्र पोलिस पथकास उशिर झाल्याने गाडी लवकर निघाली. त्यामुळे जीआरपी पथक माघारी परतले.</p>.<p>यानंतर मनमाड रेल्वेस्थानकावर दूरध्वनीद्वारे संपर्क करून या ठिकाणी गाडी थांबवण्यात आली. तेव्हा जीआरपी आणि आरपीएफ पोलिसांच्या पथकाने गाडीत जाऊन या तिकीट निरीक्षकांना सुखरूप बाहेर काढले.</p><p>यावेळी संबंधित प्रवाशांना देखील ताब्यात घेण्यात आले असून, त्यांना मनमाड येथून भुसावळ येथे लोहमार्ग पोलीसांकडे सुपूर्द करण्यात आले आहे.</p><p>याबाबत लोहमार्ग पोलिसात चल टिकट निरीक्षक सतीश कुमार यांच्या फिर्यादीवरून आसमा शरीफा खान (मुंबई), शहबाज अली अनवर अली, मोहम्मद दिलशाद मोहम्मद वैस (सर्व रा. मुंबई) यांच्या विरुद्ध गुन्हा दाखल करण्यात आला. तपास पोउनि अनिल चंपतराव हे करीत आहे</p>
