<p><strong>जळगाव - Jalgaon</strong></p><p>शहरातील सुप्रीम कॉलनी परिसरात अयान सुलतान पटेल वय १२ या मुलाचा दुचाकीवरुन खड्डयात पडल्याने डोक्याला गंभीर दुखापत होवून मृत्यू झाल्याची घटना आज गुरुवारी दुपारी १२.३० वाजेच्या सुमारास सुप्रिम कॉलनीत घडली.</p>.<p>दरम्यान याठिकाणी उभी दुचाकी सुरु करून अयानसह दोघेही मित्र फिरायला गेले. याचदरम्यान दुचाकीवरुन नियंत्रण सुटल्याने हा अपघात झाल्याची माहिती मिळाली आहे. याप्रकरणी संध्याकाळी उशिरापर्यंत एमआयडीसी पोलीस स्थानकात अकस्मात मृत्यूची नोंद करण्यात आली आहे.</p><p>यासंदर्भात नातेवाईकांनी दिलेल्या माहितीनुसार, आयान सुलतान पटेल (वय १२) रा.सुप्रीम कॉलनी हा आज दुपारी १२.३० वाजता घराच्या अंगणात गल्लीतील १४ वर्षीय मित्रासोबत खेळत होता. त्याचवेळी आपण दोघे दुसर्याच्या दुचाकीवरून एक चक्कर मारू या उद्देशाने आयान दुचाकीवर मागे बसला. </p><p>दरम्यान सुप्रीम कॉलनीच्या ईदगाह मैदान जवळ एक मोठ्या खड्ड्या समोर आल्याने पुढे चालवणार्या १४ वर्षीय मुलाचा दुचाकीवरील ताबा सुटला, त्यात दोघे खड्ड्यात पडले. यात मागे बसलेला आयान पटेल यांच्या डोक्याला गंभीर दुखापत झाल्याने त्याचा जागीच मृत्यू झाला. घटनेची माहिती मिळताच परिसरातील नागरिकांनी तातडीने त्यांना जिल्हा वैद्यकीय महाविद्यालयात दाखल केले व वैद्यकीय अधिकारी यांनी तपासणी केली असता मयत घोषित केले. या प्रकरणी एमआयडीसी पोलिसात अकस्मात मृत्यूची नोंद करण्यात आली. </p><p>मयत आयन पटेल यांचे वडील सुलतान फकीरा पटेल हे हमालीचे काम करतात तर आई रेश्मा पटेल या गृहिणी आहेत. मोठा भाऊ तौहिद हा शिक्षण घेत आहे. अपघातात आयानचा मृत्यू झाल्यामुळे हळहळ व्यक्त होत आहे. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे.</p>
