<p><strong>धुळे | प्रतिनिधी</strong></p><p>शहरातील चाळीसगाव रोड चौफुलीवर पोलिसांनी दुचाकीवर नशेच्या गोळ्या घेवून जाणार्या दोघांना पकडले. त्यांच्याकडून ५ हजार ४०० रूपयांच्या नशेच्या गोळ्या व दुचाकी असा एकुण ४५ हजार ४०० रूपयांचा मुद्येमाल जप्त करण्यात आला आहे. </p>.<p>आज मध्यरात्री सव्वा बारा वाजेच्या सुमारास ही कारवाई करण्यात आली. याप्रकरणी शाम नारायण साळे (वय ५२ रा. देवपूर) यांच्या फिर्यादीवरून दोघांवर चाळीसगाव रोड पोलिसात गुन्हा दाखल झाला आहे.</p><p>मुंबई-आग्रा महामार्गाजवळील चाळीसगाव चौफुलीवर सपोनि संदीप पाटील यांच्यासह पथकाने मध्यरात्री सव्वा बारा वाजेच्या सुमारास सापळा लावून दुचाकीस्वारांना पकडले. त्यांच्याजवळील चारही बॉक्समध्ये मानवी आरोग्यावर परिणाम करणारे तसेच नशा व झोप आणणार्या औषधी गोळ्याचा साठा मिळून आला. </p><p>त्यामुळे जमालउद्दीन शेख मुजबउद्दीन शेख (वय २१ रा. कुबा मशिद जवळ, धुळे) व शेख राहील गुलाम हुसैन (वय २३ रा. गरीब नवाज नगर, धुळे) या दोघांना ताब्यात घेण्यात आले. त्यांच्याकडून ५ हजार ४०० रूपये किंमतीच्या २ हजार २५० गोळ्या व ४० हजारांची दुचाकी (क्र. एमएच १८ यु ९४५७) असा एकुण ४५ हजार ४०० रूपयांचा मुद्येमाल जप्त करण्यात आला.</p><p>याबाबत शाम नारायण साळे (वय ५२ रा. देवपूर) यांनी दिलेल्या फिर्यादीवरून वरील दोघांवर चाळीसगाव रोड पोलिसात गुन्हा दाखल झाला आहे. तपास पीएसआय योगेश ढिकले करत आहेत.</p>
