आर.सी. पटेल अभियांत्रिकीतील प्राध्यापकांच्या संशोधनाला ऑस्ट्रेलियन सरकारचे पेटंट

शिरपूर - Shirpur - प्रतिनिधी :

येथील आर.सी. पटेल अभियांत्रिकी महाविद्यालयातील प्राध्यापकांनी मशीन लर्निंग या विषयात केलेल्या संशोधनाला ऑस्ट्रेलियन सरकारने इनोव्हेशन पेटंट म्हणून मान्यता दिली असल्याची माहिती प्राचार्य डॉ.जे.बी. पाटील यांनी दिली.

. पारंपारिक सोल्यूशन्सच्या तुलनेत मशीन लर्निंग सोल्यूशन्सची चाचणी घेणे सामान्यत: कठीण असते, ते सोपे व सरळ करण्याच्या दृष्टीने हे संशोधन उपयुक्त ठरेल.

यात त्यांनी मशीन लर्निंग पद्धतीने बनविलेल्या मॉडेलची कार्यक्षमता आणि अचूकता वाढविण्यासाठीचे तंत्रज्ञान विकसित केले आहे.

या संशोधनाद्वारे सादर तंत्रज्ञान हे कोणत्याही प्रकारची माहिती वा छायाचित्रांची तपासणी अधिक अचूक व योग्य पद्धतीने मशीन लर्निंगद्वारे विश्लेशित करण्यासाठी उपयुक्त असल्याचे सिद्ध झाले आहे.

. मशीन लर्निंग मॉडेल्सची चाचणी करताना प्राथमिक माहिती डेटामध्ये असणारे अडथळे शोधून त्याला पर्यायी चाचणी पद्धतीचा वापर करीत मॉडेल्सची कार्यक्षमता वाढविण्याचा प्रयत्न याद्वारे केला जातो.

सदर संशोधनाद्वारे निर्मित झालेली हि नाविन्यपूर्ण पद्धत पेटंट म्हणून नोंदणी करण्यासाठीचा प्रस्ताव या प्राध्यापकांनी ऑस्ट्रेलियन सरकारच्या पेटंट विभागाकडे दाखल केला होता. या विभागाद्वारे झालेल्या कठोर परीक्षणाअंती त्यास इनोव्हेशन श्रेणीत पेटंट म्हणून मान्यता देण्यात आली आहे.

ग्रामीण भागातील संशोधकांनी केलेल्या संशोधनाला अंतरराष्ट्रीय स्तरावर मान्यता मिळाल्याने शिरपूरचे नाव पुन्हा एकदा जगभरातील संशोधक व संशोधन क्षेत्रात पुढे आले आहे. सदर संशोधनासाठी या प्राध्यापकांना व्हीएतनाम येथील दुय ट्यान विद्यापीठातील माहिती व तंत्रज्ञान विभागाचे अधिष्ठाता व जेष्ठ शास्रज्ञ डॉ. आनंद नायर यांचे मार्गदर्शन मिळालेे.

प्राध्यापकांनी मिळविलेल्या या उल्लेखनीय यशाबद्दल शिरपूर एज्यूकेशन सोसायटीचे अध्यक्ष आ. अमरिशभाई पटेल, कार्याध्यक्ष भूपेशभाई पटेल, सर्व संचालक, प्राचार्य डॉ. जे. बी. पाटील, उपप्राचार्य डॉ.प्रमोद देवरे, विभाग प्रमुख प्रा. सुहास शुक्ल, प्रा. डॉ.नितीन पाटील, प्रा. जी. व्ही. तपकिरे, प्रा. प्रवीण सरोदे, प्रा. डॉ. व्ही. एस. पाटील, ट्रेनिंग अँड प्लेसमेंट विभाग प्रमुख मिल्केश जैन, जनसंपर्क अधिकारी डॉ. प्रशांत महाजन, महाविद्यालयातील शिक्षक व शिक्षकेतर कर्मचारी यांनी कौतूक केले.

. यांनी केले संशोधन

आर. सी. पटेल अभियांत्रिकी महाविद्यालयात सहाय्यक प्राध्यापक म्हणून कार्यरत असलेले प्रा. डॉ. तुषार जावरे, प्रा. रवींद्र बडगुजर, प्रा. डॉ. महेश डेम्बराणी, प्रा. डॉ. प्रशांत पाटील, प्रा.डॉ.नवीन हासवाणी, प्रा.जितेंद्र पाटील, प्रा. विनोद पाटील व प्रा. शीतल पाटील यांनी मशीन लर्निंग या विषयावर संशोधन केले आहे.