<p><strong>धुळे - Dhule - प्रतिनिधी :</strong></p><p>सुरत- नागपूर महामार्गावरील मोराणे शिवारातील भरदिवसा पिकअप वाहनाने जाणार्या पिता-पुत्राला अडवून मारहाण करण्यात आली. </p>.<p>त्यांना जबरीने स्कार्पिओ वाहनात बसवून त्यांच्याकडील 14 हजार रूपये रोख व मोबाईल लुटून नेला. तसेच त्यांची दोन लाख रूपये किंमतीचे पिकअप वाहनही पळवून नेले. दि. 1 रोजी सकाळी ही घटना घडली. याप्रकरणी चौघांवर तालुका पोलिसात गुन्हा दाखल झाला आहे.</p><p>प्रेम रामचंद्र मोटवानी (वय 43 रा. आनंदमंगल सोसायटी, रामनगर मागे, सुरत, गुजरात) हे मुलगा भावेश यांच्यासह दि. 1 डिसेंंबर रोजी पिकअप वाहनाने (क्र. एमएच 18 एए 4002) जात होते.</p><p> त्यादरम्यान सकाळी सात वाजेच्या सुमारास इच्छापुर्ती गणपती मंदिराजवळ अचानक त्यांच्या पिकअप वाहनाला एका स्कार्पिओ वाहन (क्र. एमएच 39 सी 8836) अडवे लावून थांबविले.</p>.<p>स्कार्पिओतून चार अज्ञात इसम उतरले. त्यांनी मोटवानी यांच्यासह मुलगा भावेश यास मारहाण केली. </p><p>त्यांना जबरीने स्कॉर्पिओ वाहनात बसवून मोटवानी यांच्याकडील 14 हजार रूपये रोख व पाच हजारांचा मोबाईल जबरीने लुटून नेला. तसेच दोन लाख रूपये किंमतीचे पिकअप वाहन देखील पळवून नेले.</p><p>दरम्यान घटनेनंतर मोटवानी यांनी पिकअप वाहनाचा शोध घेतला. मात्र ते मिळून आल्याने त्यांनी काल धुळे तालुका पोलिसात फिर्याद दिली.</p><p> त्यानुसार अज्ञात चार इसमाविरोधात गुन्हा दाखल करण्यात आला आहे. तपास सपोनि आर.एस. काळे हे करीत आहेत.</p>
