<p><strong>धुळे - Dhule - प्रतिनिधी :</strong></p><p>देवपूरातील मुंबई-आग्रा महामार्गाच्या सर्व्हीस रोडवर भरधाव कारच्या धडकेत जि.प. कर्मचारी जागीच ठार झाल्याची घटना आज सकाळी घडली.याप्रकरणी देवपूर पोलिसात कार चालकावर गुन्हा दाखल करण्यात आला आहे.</p>.<p>सुरेंद्र रामचंद्र फुलपगारे (वय 54 रा. प्लॉट नं. 75, भगवती नगर, देवपूर, धुळे) असे त्याचे नाव आहे. ते जिल्हा परिषदेतील लेखा विभागात कार्यरत होते. </p><p>आज सकाळी ते दोंडाईचा येथून बसने धुळ्यात आले. बसमधून उतरल्यानंतर ते सर्व्हीस रोडने अक्षता मंगल कार्यालयाजवळून भोई सोसायटीकडे वळण रस्त्याने पायी जात होते.</p>.<p>त्यादरम्यान आठ वाजेच्या सुमारास त्यांना समोरून येणार्या भरधाव कारने (क्र. एमएच 18 बीसी 1672) जोरदार धडक दिली.</p><p>त्यात गंभीर जखमी होवून त्यांचा जागीच मृत्यू झाला. अपघातनंतर चालक कार सोडून पसार झाला. घटनेची माहिती मिळताच जि.प कर्मचार्यांनी व नातेवाईकांनी घटनास्थळी गर्दी केली होती.</p><p>याप्रकरणी निलश कृष्णा नगराळे याने देवपूर पोलिसात दिलेल्या फिर्यादीवरून अपघातास कारणीभूत ठरल्याप्रकरणी कार चालकाविरूध्द गुन्हा करण्यात आला आहे. पोलिसांनी अपघातग्रस्त कार जप्त केली आहे.</p>
