श्रीगोंदा (प्रतिनिधी) – शासनामार्फत कोरोना प्रादुर्भावाच्या पार्श्वभूमीवर प्रधानमंत्री गरीब कल्याण योजना लागू करण्यात आली आहे. सार्वजनिक वितरण व्यवस्थेतील सध्याच्या ई-पॉस मशिनवर कार्यरत असलेल्या अंत्योदय कुटूंब लाभार्थी यांना प्रतिकार्ड 26 किलो गहू व 9 किलो तांदूळ असे एकूण 35 किलो धान्य देणेत येणार आहे. तसेच प्राधान्य कुटूंब लाभार्थ्यांना प्रति व्यक्ती 3 किलो गहू व 2 किलो तांदूळ देणेत येणार आहे.
सदर दोन्ही योजनेसाठी पात्र लाभार्थी यांना गहू 2 रुपये किलो व तांदूळ 3 रुपये किलो असा दर राहील. तसेच अंत्योदय कार्ड धारकांना 1 किलो साखर रु 20 प्रमाणे, तर 1 किलो डाळ रु 45 प्रमाणे देय राहील .याप्रमाणेच रास्त भाव दुकानदार यांनी वाटप करावे यापेक्षा कमी धान्य दिल्यास कारवाई करण्यात येणार असल्याचे तहसिलदार महेंद्र माळी यांनी प्रसिद्धी पत्रकात म्हंटले आहे.
तसेच सबंधित लाभार्थ्यांनी कोरोना प्रादुर्भावाच्या पार्श्वभूमीवर रास्तभाव दूकानामध्ये गर्दी न करता प्रत्येक ग्राहकाच्या मध्ये 1 मीटर अंतर ठेवून तोंडाला मास्क लावावे तसेच सामाजिक अंतराचे पालन करुन धान्याची उचल करावी. असे तहसीलदार श्रीगोंदा यांचे वतीने आवाहन करण्यात येत आहे.
