सराफाला लुटणार्‍या टोळीचा पर्दाफाश

जळगाव । प्रतिनिधी jalgaon

मुक्ताईनगर (Muktainagar) तालुक्यातील उचंदा येथील सराफा व्यावसायिकाला धारदार शस्त्राने मारहाण करून लुटल्याची घटना दि.30 नोव्हेंबर रोजी नरवेल फाट्याजवळ घडली होती. व्यावसायिकाजवळील सोने-चांदीच्या दागिन्यांसह रोकड असा एकूण 17 लाख 80 हजारांचा ऐवज लुटून पोबारा केला होता. लुटणार्‍या टोळीचा स्थानिक गुन्हे शाखेच्या पथकाने पर्दाफाश केला असून सहा सराईत गुन्हेगारांना अटक केली. त्यांनी या घटने व्यतिरीक्त आणखी चार दरोड्यांची कबुली दिली.

त्यांच्याकडून सुमारे 12 लाख 80 हजारांचा मुद्देमाल हस्तगत केली असल्याची माहिती पोलीस अधीक्षक एम.राजकुमार (Superintendent of Police M. Rajkumar), अप्पर पोलीस अधीक्षक चंद्रकांत गवळी (Upper Superintendent of Police Chandrakant Gawli) यांनी पत्रकार परिषदेत दिली.

मुक्ताईनगर तालुक्यातील उचंदा येथे निलेश वसंत सोनार (वय 32, रा.नरवेल ता.मुक्ताईनगर) यांचे सोने-चांदीचे दुकान (Gold and silver shop) आहे. ते दररोज दुकानातील दागिने आणि पैसे घरी घेऊन जात असतात. दि.30 नोव्हेंबर रोजी सायंकाळी ते नेहमी प्रमाणे दुकान बंद करून दुकानातील सर्व सोने-चांदीचे दागिने आणि रोकड घेऊन घरी आपल्या दुचाकीवरून परत जात होते. नरवेल फाट्याजवळ एका पल्सरवर चेह-यावर रुमाल बांधून आलेल्या तिघांनी कोणत्यातरी धारदार शस्त्राने व दगडाने मारहान करुन निलेश सोनार यांच्याकडील 9 लाख रुपये किंमतीचे 300 ग्रॅम वजनाचे सोन्याचे दागिने, 80 हजार रुपये किंमतीचे 2 किलोचे चांदीचे दागिने आणि 80 हजार रुपये रोख असा एकूण 10 लाख 60 हजाराचा ऐवज बळजबरीने लुटून नेले. हा झटापटीत चोरट्यांनी निलेश सोनार यांच्या हाताला आणि पायाला चाकूसारख्या शस्त्राने वार केल्यामुळे ते जखमी झाले होते.

आणखी चार गुन्हे उघडकीस

संशयितांनी जामनेर, एमआयडीसी पोलीस ठाण्यातील दोन, पाचोरा पोलीस ठाण्याच्या हद्दीत दरोड्याचे गुन्हे दाखल आहे. यामध्ये आकाश दिलीप पवार, सागर कंजर, सुनिल जाधव, विशाल विजयसिंग बागडे रा. कंजरवाडा, दीपक शर्मा रा. कुसुबा ता.जळगाव यांच्या मदतीने केल्याची कबुली दिली. त्यांच्याकडून सर्व गुन्ह्यींमधील 12 लाख 80 हजारांचा मुद्देमाल व 2 दुचाकी हस्तगत करण्यात आल्या आहे.

पथकाकडून रात्री केला जात होता तपास

घटना घडल्यानंतर लागलीच एलसीबीचे निरीक्षक किसनराव नजन पाटील हे पथकासह रवाना झाले होते. तीन दिवस सलग मागोवा घेत 5 पथकांनी वेगवेगळ्या मार्गाने गुन्ह्याचा तपास केला. यामध्ये विशेषतः सर्व पथके रात्रीच्या वेळी कार्य करीत होते. गुप्त माहिती आणि काही पुराव्यांच्या आधारे पोलिसांनी टोळीला जेरबंद केले. यामध्ये सुप्रीम कॉलनीतील तिघांना घरून अटक करण्यात आली तर एक रायपूर कंडारी ता.जळगाव आणि एकाला उचंदा येथून अटक करण्यात आली.

म्हणूनच राहिला मुद्देमाल शाबूत

एलसीबीने संशयितांना ताब्यात घेतल्यानंतर त्यांच्याकुटुंबियांकडून मुद्देमालाच विल्हेवाट लावली जावू नये म्हणून प्रत्येक संशयिताच्या घराबाहेर दोन पोलिसांचा पाहरा लावण्यात आला होता. त्यामुळे संशयितांसह त्यांच्या कुटुंबियांच्या हालचालींवर पोलिसांची बारीक लक्ष होते. याचमुळे संशयितांनी लुटेलला मुद्देमाल शाबूत राहिला आहे.

या पथकाची कामगिरी

एलसीबीचे निरीक्षक किसनराव नजनपाटील यांच्या मार्गदर्शनाखाली पोलीस उपनिरीक्षक अमोल देवढे, उपनिरीक्षक गणेश चौभे, सहाय्यक फौजदार रवि नरवाडे, अनिल जाधव, युनुस शेख, हवालदार विजयसिंग पाटील, संजय हिवरकर, राजेश गेंडे, सुनिल दामोदरे, सुधाकर अंभोरे, जयंत चौधरी, अशरफ शेख, संदिप पाटील, दिपक पाटील, अक्रम शेख, महेश महाजन, संदिप सावळे, पोना किशोर राठोड, रणजित जाधव, नितीन बाविस्कर, प्रितम पाटील, विजय पाटील, संतोष मायकल, नंदलाल पाटील, भगवान पाटील, श्रीकृष्ण देशमुख, किरण धनगर, प्रमोद लाडवंजारी, रविंद्र पाटील, परेश महाजन, पोकॉ विनोद पाटील, ईश्वर पाटील, दिपक शिंदे, उमेश गोसावी, रमेश जाधव, राजेंद्र पवार, भारत पाटील, दर्शन ढाकणे, अशोक पाटील, मुरलीधर बारी, प्रमोद ठाकुर तसेच मुक्ताईनगर पो.स्टे.चे उपनिरीक्षक प्रदिप शेवाळे, पोहेकॉ गणेश मनोरे, पोना मोतीलाल बोरसे, धर्मेंद्र ठाकूर, राहुल महाजन, प्रशांत चौधरी, सतिष भारुडे, लतिफ तडवी अशांनी गुन्हा उघड केला आहे.