जळगाव – Jalgaon – प्रतिनिधी :
जळगाव जिल्हा परिषदेत कॉग्रेस आणि राष्ट्रवादी काँग्रेसच्या एका सदस्याच्या जोरावर भाजपची सत्ता आहे.
जिल्हा परिषदेतील फेरबदलाबाबत चर्चा करण्यासाठी काँग्रेस, राष्ट्रवादी आणि शिवसेनेचे गटनेते भेटायला आले होते. त्यानुसार चर्चा झाली. महाविकास आघाडीचे 32 आणि माझे काही सहा ते आठ समर्थक आहेत. त्यामुळे बहुमत आहेच. त्यामुळे इकडून तिकडे आणण्याची गरज नाही. तसे ते सूचवायला आले. परंतू मी त्यांना 8 ते 15 दिवस थांबायला सांगितले आहे. नंतर मग बघू असे गट नेत्यांना मी यावेळी सांगितले आहे.
एकनाथराव खडसे, नेते, राष्ट्रवादी काँग्रेस
मात्र आता, सांगली, जळगाव मनपा पाठोपाठ जि.प.त फेरबदल करुन महाविकास आघाडीची स्थापन करण्याच्या हालचालींना वेग आला आहे.
दरम्यान, जि.प.तील काँग्रेस, राष्ट्रवादी आणि शिवसेनेच्या गटनेत्यांनी राष्ट्रवादीचे नेते माजी मंत्री एकनाथराव खडसे यांची जळगावातील मुक्ताई निवासस्थानी भेट घेतली. या भेटीमुळे राजकीय गोटात खळबळ उडाली आहे.
राज्यात शिवसेना, काँग्रेस आणि राष्ट्रवादी काँग्रेस या तीन पक्षाच्या महाविकास आघाडीचे सरकार आहे. त्यामुळे महाविकास आघाडीतर्फे स्थानिक स्वराज्य संस्थांमध्ये करेक्ट कार्यक्रम लावण्यासाठी हालचाली सुरु आहेत.
सांगली महापालिकेपाठोपाठ जळगाव मनपात बहुमतात असलेल्या भाजपला पायउतार व्हावे लागले असून, आता शिवसेनेची सत्ता आहे. दरम्यान, जळगाव जिल्हा परिषदेतही राजकीय भूकंप घडवून आणण्यासाठी त्या पध्दतीने जोरदार प्रयत्न सुरु आहे.
फेरबदलावर चर्चा
जिल्हा परिषदेत भाजपला धक्का देण्यासाठी जोरदार हालचाली सुरु आहेत. त्या अनुषंगाने काँग्रेसचे गटनेते प्रभाकर सोनवणे, राष्ट्रवादीचे गटनेत शशिकांत साळुंखे, शिवसेनेचे गटनेते रावसाहेब पाटील, रवींद्र पाटील यांनी राष्ट्रवादीचे नेते एकनाथराव खडसे यांची मुक्ताई निवासस्थानी भेट घेवून जि.प.तील फेरबदलाबाबत चर्चा केली. यावेळी माजी आमदार गुरुमुख जगवाणी, अशोक लाडवंजारी, अशोक पाटील, सुनील माळी, डॉ.अभिषेक ठाकूर, गोटू चौधरी उपस्थित होते.
15 दिवसांत जि.प.त राजकीय भूकंप
जिल्हा परिषदेत पक्षीय बलाबल नुसार भाजप 33, शिवसेना 13, राष्ट्रवादी 15, काँग्रेस 04 असे पक्षीय बलाबल आहे. एकूण 67 सदस्य असलेतरी शिवसेनेचे एक आणि राष्ट्रवादीचे एक अशा दोन सदस्यांवर अपात्रतेची कारवाई केली गेली आहे.
त्यामुळे आता, 65 सदस्य असून, बहुमतासाठी 34 च्या संख्याबळाची आवश्यता आहे. भाजपतील 33 जि.प. सदस्यांपैकी आठ सदस्य हे खडसे समर्थक आहेत. त्यामुळे जि.प.त. येत्या 15 दिवसांत राजकीय भूकंप होण्याचे संकेत देण्यात आले आहे.