Type to search

Breaking News आवर्जून वाचाच जळगाव देश विदेश मुख्य बातम्या

जळगावची प्रांजल पाटील बनली तिरुअनंतपुरमची उपजिल्हाधिकारी

Share

तिरुवअनंतपुरम। देशातील पहिल्या दृष्टिहीन महिला आयएएस अधिकारी प्रांजल पाटील यांनी सोमवारी तिरुवअनंतपुरम येथे उपजिल्हाधिकारीपदाची सूत्रे हाती घेतली. प्रांजल पाटील या महाराष्ट्रातील जळगाव जिल्ह्यातील बोदवड तालुक्यातील रहिवासी आहेत. प्रांजल या केरळ कॅडरमध्ये नियुक्त होणार्‍या पहिल्या दृष्टिहीन आयएएस अधिकारी आहेत.

जळगावच्या रहिवासी असलेल्या प्रांजल पाटील यांची दृष्टी जन्मापासूनच कमकुवत होती. वयाच्या सहाव्या वर्षी त्यांची दृष्टी पूर्णपणे गेली. मात्र, त्यांनी जिद्द सोडली नाही. आयुष्यात काही तरी करायचे ही खूणगाठ त्यांनी मनाशी बांधली होती. याच निर्धाराने त्या यशाच्या मार्गाकडे वाटचाल करत राहिल्या. त्यांनी आपल्या पहिल्याच प्रयत्नात लोकसेवा आयोगाच्या परिक्षेत 773 वे स्थान मिळवले.

प्रांजल पाटील यांनी मुंबईतील दादर येथील श्रीमती कमला मेहता शाळेतून शिक्षण घेतले आहे. प्रांजल यांच्यासारख्या मुलांसाठी ही शाळा आहे. ब्रेल लिपीत या शाळेत शिकवलं जातं. प्रांजल यांनी येथूनच दहावीपर्यंतचं शिक्षण घेतलं. त्यानंतर चंदाबाई कॉलेजमधून त्यांनी कला शाखेतून बारावीपर्यंतचं शिक्षण घेतलं. बारावीला त्या 85 टक्के मिळवून उत्तीर्ण झाल्या. पुढील शिक्षणासाठी त्या मुंबईतील सेंट झेवियर्स कॉलेजमध्ये गेली.

पदवीचं शिक्षण घेत असतानाच, प्रांजल पाटील आणि त्यांच्या एका मित्रानं पहिल्यांदाच युपीएससीसंबंधी एक लेख वाचला. त्यानंतर प्रांजल यांनी युपीएससी परीक्षेसंदर्भातील माहिती गोळा करण्यास सुरुवात केली. त्यावेळी त्यांनी आयएएस अधिकारी व्हायचं आहे हे कुणालाही सांगितलं नाही, पण त्यांनी मनाशी खूणगाठ बांधली होती. पदवीचं शिक्षण घेतल्यानंतर त्या दिल्लीत पोहोचल्या. जेएनयू विद्यापीठातून त्यांनी एमएचं शिक्षण घेतलं. त्याचदरम्यान प्रांजल यांनी दृष्टिहीन लोकांसाठी असलेल्या जॉब अ‍ॅक्सेस विथ स्पीच या विशेष सॉफ्टवेअरची मदत घेतली.

आज त्यांच्या परिश्रमाला यश आले
असून जळगावची एक महिला अधिकारी तिरुअनंतपुरम येथे उपजिल्हाधिकारी म्हणून रुजु झाली आहे.

Tags:

Leave a Comment

Your email address will not be published. Required fields are marked *

*

error: Content is protected !!