Type to search

मतदानाचा टक्का अन् यशापयशाचे गणित

maharashtra जळगाव राजकीय

मतदानाचा टक्का अन् यशापयशाचे गणित

Share
गेल्या महिनाभरापासून सुरु असलेली लोकसभा निवडणुकीची धामधूम आज मतदानानंतर संपली. प्रशासन, स्वयंसेवी संस्था, राजकीय पक्षांनी जनजागृती करुनही जिल्ह्यातील मतदानाचा टक्का काही वाढला नाही. जळगाव मतदारसंघात 58 तर रावेर मतदारसंघात 62 टक्के मतदान झाल्याचा अंदाज आहे. 2014 साली झाले तेव्हढेच मतदान यावेळी झाले आहे. पुलवामा हल्ला, सर्जिकल स्टाईकच्या पार्श्वभूमीवर पंतप्रधान नरेंद्र मोदींना पुन्हा पंतप्रधान करण्यासाठी मतदान करण्याचे जोरदार आवाहन भाजपाने केले होते, मात्र ते प्रत्यक्षात उतरलेले दिसून आले नाही. मतदारांचा हा अनुत्साह कोणाच्या पथ्यावर पडतो याची आकडेमोड आता सुरु झाली असून जो-तो आपापल्या परीने गणिते लावतो आहे. महिनाभरानंतर मतदारराजाचा कौल समोर येणार आहे. गेल्यावेळी जिल्ह्यातून विजयी झालेल्या दोन्ही खासदारांना सुमारे अडीच-तीन लाखांचे मतधिक्क्य होते. यावेळी ते काही हजारांवर येण्याची शक्यताही मतदानाच्या आकड्यांवरुन वर्तवली जात आहे.

जळगाव जिल्हा भाजपाचा बालेकिल्ला आहेच मात्र आता भाजपाला वेगळ्या विरोधकांची गरज उरली नसून पक्षांतर्गत गटबाजीच भविष्यात भाजपाला अडचणीची ठरणार असल्याचे या निवडणुकीतून उधोरेखीत झाले आहे. रावेर हा आ.एकनाथराव खडसे यांचा गड आहे, त्याचा पाडाव करणे सहज सोपी बाब नाही मात्र काँग्रेसच्या डॉ.उल्हास पाटील यांनी बर्‍यापैकी लढत देण्याचा प्रयत्न केला. जळगाव मतदारसंघात सोपी असणारी लढत भाजपाने स्वतःच अवघड करुन अटी-तटीवर आणून ठेवली. उमेदवारीचा घोळ, पक्षांतर्गत लाथाळ्या यामुळे पक्षाची बेअब्रु झाली ती वेगळीच.

राष्ट्रवादीने निवडणूक जाहीर होण्याआधीच गुलाबराव देवकर यांची उमेदवारी जाहीर केली. देवकरांबरोबरच अन्य काही जण इच्छुक होते मात्र उमेदवारी जाहीर होताच देवकरांनी मोठ्या कौशल्याने परिस्थिती हाताळली व सर्वांना सोबत घेऊन ते निवडणुकीला सामोरे गेले. भाजपाच्या उमेदवारीचा घोळ सुरु असेपर्यंत देवकरांची प्रचाराची पहिली फेरीही संपली होती. त्यामुळे प्रचारात ते शेवटपर्यंत पुढेच दिसले तर भाजपा मात्र चाचपडत असल्याचे जाणवले. एकीकडे देवकर पक्षाचे पदाधिकारी व घटक पक्षांच्या विश्वासावर निर्धास्त वाटत होते तर भाजपा मात्र घटक पक्ष शिवसेनेबरोबरच आपल्या पदाधिकार्‍यांच्या बाबतही साशंकच दिसली. या निवडणुकीत काँग्रेस आणि राष्ट्रवादीकडे गमावण्यासारखे काहीही नव्हते मात्र भाजपावर वर्चस्व कायम ठेवण्याचे दडपण होते. जळगावात देवकरांनी लोकसभेच्या निवडणुकीत स्थानिक मुद्दे खुबीने मांडले, पालकमंत्रीपदाच्या कार्यकाळातील कामांची माळ जपली. तर भाजपाने मोदी एके मोदी हाच हुकूमाचा एक्का वापरला. पुलवामा हल्ला, सर्जिकल स्टाईकनंतर देशभरात पंतप्रधान मोदींबद्दल जबरदस्त आकर्षण निर्माण झाले होते, तरुणाई त्यांच्या प्रेमात पडली होती. देशभक्ती आणि मोदी हे समानार्थी शब्द झाले होते. भाजपाच्या प्रचारासाठी आलेल्या प्रदेश नेत्यांनीही काँग्रेसवर टिका करत मोदींची देशभक्ती, देशाची अस्मिता, सुरक्षितता याच भावनिक बाबींनी मतदारांना साद घातली. देश टिकवायचा असेल तर मोदींशिवाय पर्याय नाही, असे ठासून सांगत मोठ्या प्रमाणात मतदान करण्याचे आवाहन सार्‍याच नेत्यांनी केले होते. मात्र प्रत्यक्षात यंदाचा मतदानाचा टक्का पाहता मतदारांना मोदी हाच एकमेव मुद्दा असल्याचे पटलेले दिसत नाही.

मतदारसंघनिहाय मतदानाची टक्केवारी पाहता बरेच कयास लावता येतील. दोन्ही उमेदवार चाळीसगाव तालुक्यातले असूनही तेथील मतदानाची टक्केवारी 55 पेक्षा अधिक नाही. जळगाव ग्रामीण ही देवकरांची कर्मभूमी असूनही तेथील मतदान 56 टक्के आहे. या मतदारसंघात शिवसेनेचे प्राबल्य असूनही त्यांना मतदानाचा टक्का वाढवता आलेला नाही. भाजपा जिल्हाध्यक्ष, सहयोगी आमदारांच्या अमळनेर मतदारसंघात पन्नाशीच्या आत मतदान झाले. तालुक्यांमध्ये दोन्ही उमेदवारांनी थोड्याफार फरकाने सारखी मते घेतली तरी जळगाव शहरात भाजपाला मोठे मतधिक्क्य मिळेल, अशी भाजपाची रणनिती होती. जळगाव महापालिकेत भाजपाचे 57 तर शिवसेनेचे 14 नगरसेवक आहेत. शिवसेनाही भाजपासोबतच होती. नगरसेवकांना मोठ्या प्रमाणात मतदान करुन घेण्यात यश आलेले नाही. शहराच्या मतदानाची टक्केवारी सर्वात कमी 46-47 टक्के आहे. शिवसेनेला जास्तीचे महत्त्व देण्याच्या नादात भाजपाच्या धुरिणांनी निवडणुकीची सूत्रेच शिवसेनेच्या शिरावर देऊन टाकल्याचे दिसून आले. जळगाव ग्रामीण आणि पाचोरा मतदारसंघात असे चित्र असल्याची चर्चा होती, त्यामुळे भाजपाचा मूळ कार्यकर्ताच काहीसा दूर सारला गेल्याचे दिसले. जळगाव मतदारसंघात आ.खडसेंना मानणारा एक वर्ग आहे, येथे भाजपाने खडसेंचा उपयोग करुन घेतला असता तरी लढत सोपी होऊ शकली असती.

निवडणूक जाहीर होईपर्यंत, अगदी देवकरांची उमेदवारी जाहीर होऊनही जळगाव मतदारसंघात भाजपाचीच एकतर्फी हवा होती, मात्र नेत्यांनी ती अटी-तटीवर नेऊन ठेवल्याचे दिसले. दुसरीकडे रावेर मतदारसंघात तुलनेने सोपी लढत असूनही आ.खडसे यांनी कोणतीच रिस्क न घेता निवडणुकीचे नियोजन केले. जळगावात राष्ट्रवादीची ताकद आहे तसे रावेरमध्ये काँग्रेसचे जाळे नाही. मात्र तेेथे भाजपाने सावध पावले टाकत प्रतिस्पर्ध्याला तुल्यबळ समजत लढत दिली. रावेर, भुसावळ पट्ट्यात अल्पसंख्यांक मतदारांची संख्या मोठी आहे. नेहमी मतदानाच्या शेवटच्या टप्प्यात मतदानासाठी येणारा हा वर्ग यावेळी सकाळी-सकाळीच मतदान केंद्रांवर दिसला. हे मतदान कोणाकडे जाते, हे पाहणेही औत्सुक्याचे ठरावे. गेल्यावेळी मोदी लाट होती हे भल्याभल्यांना निकालानंतर उमगले, आता तर मोदींचा निर्विवाद प्रभाव होताच त्यामुळे यावेळच्या निकालाकडे सर्वांचेच लक्ष लागून आहे. लोकसभेच्या या निकालातच विधानसभेची बिजे असणार असल्यानेही या निकालाला जास्तीचे महत्त्व आहे.

Tags:

You Might also Like

Leave a Comment

Your email address will not be published. Required fields are marked *

*

error: Content is protected !!