जळगाव – Jalgaon – प्रतिनिधी :
बीएचआर संबंधी सुनिल झंवर यांच्या कार्यालयावर पुणे आर्थीक गुन्हे शाखेच्या पथकाने धाड टाकली होती. या धाडीत झंवरच्या कार्यालयातून वॉटरग्रेसची कागदपत्रे देखील आढळून आली.
त्यामुळे साई मार्केटिंग कंपनीच हा ठेका चालवित असल्याचे वृत्त प्रसिद्ध झाले होते. त्यामुळे वॉटरग्रेस कंपनीने मनपाची आर्थीक फसवणुक केल्याप्रकरणी आयुक्तांनी हप्तेखोर नगरसेवकांसह संबंधितांवर गुन्हे दाखल करावे अन्यथा मी आयुक्तांविरुद्ध तक्रार देवून गुन्हा दाखल करणार असल्याचा इशारा ऍड. विजय पाटील यांनी आयुक्तांकडे केली आहे.
वॉटरग्रेस कंपनीने साफसफाईचा ठेका साई मार्केटिंगला प्रत्यक्षात सोपविल्याचे समोर आले आहे. यासंबंधीची सर्व कागदपत्रे सुनिल झंवर याच्या कार्यालयातून हस्तगत करण्यात आली आहे.
तसेच कंपनीत काम करणार्यांचे एटीएम कार्ड देखील याठिकाणी आढळून आले आहे. तसेच मनपाचे नगरसेवक वॉटरग्रेस कंपनीकडून हप्तेवसूल करीत असल्याचे वृत्त दैनिकांमध्ये प्रकाशित झाले आहे. वॉटरग्रेस कंपनीने करारनाम्यातील अटी शर्तींचा भंग केला असल्याचे दिसून येत आहे.
सुनिल झंवर करीत होता बँकेचे खाते ऑपरेट
वॉटरग्रेसचे यूनियन बँकेत खाते असून ते खाते वापरण्याचा अधिकार असल्याबाबतचे पत्र बँकेला सादर करण्यात आले आहे. त्यामुळे कोट्यावधी रुपयांचे बँक खाते सुनिल झंवरच ऑपरेट करीत असल्याचे ऍड. पाटील यांनी दिलेल्या पत्रात नमूद केले आहे.
..तर आयुक्तांवरही गुन्हा दाखल करणार
वॉटरग्रेस कंपनीकडून याप्रकरणाचा खुलासा मागवावा, वॉटरग्रेस कपंनीची आणि सुनिल झंवर व बहुसंख्य नगरसेवकांना देण्यात येणार्या हफत्यांबाबत सखोल चौकशी करुन संबंधितांवर तात्काळ गुन्हे दाखल करा.
आयुक्तांनी गुन्हे दाखल न केल्यास मी तक्रारदार म्हणून तूम्ही प्रशासनातील जबाबदार अधिकारी म्हणून तुमच्यावर देखील गुन्हा दाखल केला जणार असल्याचे ऍड. विजय पाटील यांनी दिलेल्या पत्रात नमूद केले आहे.
