पाकचे F-16 पाडणाऱ्या अभिनंदन यांची सूरतगडमध्ये पोस्टिंग

0
नवी दिल्ली :  पाकिस्तानचे F-16 फायटर विमान पाडणारे विंग कमांडर अभिनंदन वर्थमान यांची सूरतगडच्या एअर फोर्स तळावर पोस्टिंग करण्यात आली आहे.

सूरतगड राजस्थानमध्ये आहे. बालाकोट एअरस्ट्राइकनंतर २७ फेब्रुवारीच्या सकाळी काश्मीरमध्ये झालेल्या डॉगफाइटमध्ये अभिनंदन यांनी पाकचे F-16 पाडले. त्याचवेळी त्यांचे मिग-२१ बायसनही कोसळले. अभिनंदन पाकिस्तानी सैन्याच्या हाती लागले. ६० तासानंतर त्यांची सुटका करण्यात आली होती.

अभिनंदन शनिवारी सूरतगड एअर फोर्स तळावर रुजू झाले. टाइम्स ऑफ इंडियाने हे वृत्त दिल आहे. अभिनंदन यांची राजस्थानमध्ये पोस्टिंगची ही पहिली वेळ नाही. यापूर्वी ते बिकानेरमध्येही तैनात होते. अभिनंदन यांचे वडिलही हवाई दलात होते. वडिलांची पोस्टिंग राजस्थानमध्ये असताना अभिनंदन यांनी त्यांचे शिक्षण राजस्थानमध्ये घेतले आहे.

हवाई दलाच्या वैमानिकांच्या पोस्टिंगचा विषय गोपनीय असतो. फक्त आम्ही विंग कमांडर अभिनंदन यांची राजस्थानध्ये पोस्टिंग झाली आहे एवढेच सांगू शकतो. त्या व्यतिरिक्त काहीही सांगता येणार नाही असे हवाई दलाच्या एका अधिकाऱ्याने सांगितले. सूरतगडमध्ये मिग-२१ बायसनचा बेस आहे.

अभिनंदन कॉकपीटमध्ये परतणार की, नाही ते अजून स्पष्ट झालेले नाही. विंग कमांडर यांच्या प्रकरणाकडे थो़डया वेगळया अंगाने पाहिले जाऊ शकते असे टाइम्स ऑफ इंडियाने सूरतगडमधील सूत्रांच्या हवाल्याने म्हटले आहे. पाकिस्तानातून परतल्यानंतर अभिनंदन यांची ही पहिली पोस्टिंग आहे.

LEAVE A REPLY

*