Type to search

Breaking News maharashtra आवर्जून वाचाच जळगाव मुख्य बातम्या

महिनाभराचाच साठा; अमळनेरकरांना सहा दिवसाआड पाणी

Share
राजेंद्र पोतदार | अमळनेर :  पाणी पुरवठा करणारे स्त्रोतच आटल्याने अमळनेर शहराला महिनाभर पुरेल इतकाच पाणीसाठा उपलब्ध आहे. या भीषण परिस्थितीमुळे ऐन सखाराम महाराज यात्रौत्सवात अमळनेरकरांना तीन ऐवजी सहा दिवसाआड पाणी देण्याचा कटू निर्णय नगरपालिका प्रशासनाला घ्यावा लागला आहे. सध्या करण्यात येणार्‍या दरडोई 135 लिटर ऐवजी 70 लिटर म्हणजे निम्मेच पाणी अमळनेरकरांना मिळू शकणार आहे.

शहराला करण्यात येणार्‍या पाणीपुरवठ्याचा जळोद येथील तापी नदीवरील डोह आटल्यामुळे 3 दिवसा ऐवजी 6 दिवसाआड पाणी पुरवठा करण्याचा निर्णय पालिका प्रशासनाने घेतला असल्याची माहिती नगराध्यक्षा सौ.पुष्पलता पाटील व मुख्याधिकारी शोभा बाविस्कर यांनी दिली. पालिकेतर्फे दरवर्षी उन्हाळ्यात 105 कि.मी.वरून हतनूर धरणातून 3 वेळा आवर्तन घेण्यात येते. मात्र दुष्काळी परिस्थितीमुळे धरणाची पातळी खालावल्याने या वर्षी फक्त दोनच आवर्तन मंजूर झाले होते. ते 5 फेब्रुवारी व 5 एप्रिलला घेण्यात आले.

सध्या शहराला मुबलक प्रमाणात दरडोई 135 लिटर प्रमाणे 3 दिवसाआड नियमित पाणी पुरवठा करण्यात येत होता. आवर्तनाद्वारे मिळालेल्या पाण्यासोबतच मुख्य पाणीपुरवठ्याचे स्त्रोत असलेल्या जळोद येथील तापी नदीत 12 बोअर करण्यात आले. तर या ठिकाणाहून 9 कि.मी. वर असलेल्या कलाली डोहातून चारी खोदून पाणी आणले गेले होते. कलाली येथील डोहात 65 अश्व शक्तीचे 3 पंप 24 तास पाणी उचलत होते. हे तिन्ही पंप तरंगते असल्याने यातील 1 पंप डोहात गाळात फसला तर दुसरा नादुरस्त झाल्याने त्याला अहमदाबाद येथे दुरूस्तीला आजच रवाना करण्यात आला आहे.

शहराला 1 वेळेसाठी सुमारे 1 कोटी 35 लाख लिटर पाणी लागते. कलालीचे पंप दर तासाला 2 लाख लिटर पाणी घेते तर जळोद येथील 340 अश्वशक्तीचे पंप दर तासाला 5 लाख 2 हजार लिटर पाणी घेते. सतत 24 तास पंप चालल्यावर शहरासाठी पुरवठा करण्यासाठी 1 कोटी 35 लाख लिटर पाणी उपलब्ध होवून संपूर्ण शहराला सुरळीत व पुरेसा पाणी पुरवठा करता येवू शकतो, अशी माहिती नगराध्यक्षा सौ.पुष्पलता पाटील यांनी देशदूतशी बोलतांना दिली.
ही सर्व कसरत फेब्रुवारी ते एप्रिल अखेर पाणी पुरवठा कर्मचारी व प्रशासनाने लीलया पार पाडल्यामुळेच शहराला 3 दिवसाआड नियमित पाणी पुरवठा करता येणे शक्य झाले आहे. जिल्ह्यात एकमेव अमळनेर पालिकाच भर उन्हाळ्यात सर्वत्र पाणी टंचाई असतांना मुबलक पाणी देवू शकली आहे.

या कामी आमच्या आघाडीचे नगरसेवक व माजी आ.साहेबराव पाटील, पाणी पुरवठा कर्मचार्‍यांच्या मेहनतीमुळेच शक्य झाले आहे. आता कलाली डोहात पाणी आहे मात्र हा डोह अनेक वर्षापासूनच असल्याने त्यात प्रचंड गाळ आहे. हा डोह 5 कि. मी. लांब तर 200 मिटर रूंद एव्हढा विस्तिर्ण आहे. यातून पंपाद्वारे परिसरातील शेतकरी शेतीसाठीही पाणी उचलत असतात. या डोहात 50 वर्षात पहिल्यांदाच पाणी पातळी कमालीची घटली आहे. डोहातून पाणी उचलण्यासाठीचा पंप मध्यभागी असता तर मुबलक पाणी उपलब्ध होवू शकले असते मात्र पंप काठावर असल्याने कमी पाणी उपलब्ध होते.

हतनूर धरणाचे आवर्तन मिळणार नाही व कलाली डोहातून अपेक्षीत पाणी मिळत नाही तर मूळ स्त्रोत असलेल्या जळोद येथील डोह 3 मिटर रूंद 2 मिटर खोल व 1100 मिटर लांब इतका विस्तिर्ण असूनही या डोहातील पाणीसाठा तप्त उन्हातील बाष्पी भवनामुळे खोल जावून आटत असल्याने या संपूर्ण मे महिन्यात 25 मे पर्यंतच पाणी शहराला मिळू शकेल अशी कठीण परिस्थिती निर्माण झाल्यामुळेच ऐन संत सखाराम महाराज यात्रोत्सवाच्या कालावधीत शहराचा पाणी पुरवठा 3 दिवसा ऐवजी 6 दिवसा आड करण्याचा निर्णय पालिका प्रशासनाने घेतला आहे. दि 1 मे पासून महिन्यात फक्त 4 वेळाच पाणी पुरवठा होणार आहे, त्यातही दरडोई 70 लिटर प्रमाणे म्हणजे निम्याने पाणी मिळणार आहे.

त्यामुळे नागरिकांनी पुरेसा पाणीसाठा करून पाणी टंचाईवर मात करण्यासाठी पाण्याचा वापर काटकसरीने करावा व पालिका प्रशासनाला सहकार्य करावे असे आवाहन नगराध्यक्षा सौ पुष्पलता पाटील व आघाडीचे नेते माजी आ.साहेबराव पाटील व नगरसेवकांनी केले आहे.

Leave a Comment

Your email address will not be published. Required fields are marked *

*

error: Content is protected !!