रस्त्यावर आंदोलन नाही : साखळीपध्दतीने व चुलबंद आंदोलन : मराठा क्रांती मोर्चा

0
पुणे / औरगांबाद : आपल्या न्याय मागण्यांसाठी मराठा क्रांती मोर्चाने काल दि. 9 ऑगस्ट रोजी राज्य बंदचे आवाहन केले होते. हे आंदोलन शांततेते करण्यात आले. परंतू काही समाजकंटकांनी मराठा समाजाला बदनाम करण्यासाठी ही तोडफोड केली आहे. अशा समाजकंटकांना यापुढे मराठा क्रांती मोर्चातील सदस्यच पकडून पोलिसांच्या स्वाधिन करतील.

काल राज्यात झालेल्या तोडफोडीच्या घटना व औरंगाबाद येथे एमआयडीसीत झालेली कंपन्यांची तोडफोड पाहता यापुढे रस्त्यावर उतरून आंदोलन करण्यात येणार नाही. त्याऐवजी साखळी पध्दतीने व चुलबंद पध्दतीने मागण्या मान्य होईपर्यंत आंदोलन चालणार असल्याची माहिती पुणे व औरंगाबाद येथे झालेल्या मराठा क्रांती मोर्चाच्या समन्वयकांनी घेतलेल्या पत्रकार परिषदेत दिली.

आम्ही शांततेने आंदोलन करण्याचा निर्णय घेतला होता. काही ठिकाणी रास्ता रोको, रेल रोको आणि ठिय्या आंदोलन करण्यात आले. पुण्याच्या बैठकीत तसे ठरलेही होते. पण आंदोलनाला बाह्यशक्तींमुळे गालबोट लागले. आम्ही एक वाजता पुणे जिल्हाधिकाऱ्यांना निवेदन दिले. त्यानंतर राष्ट्रगीत म्हणून आम्ही सर्वांना घरी जाण्यास सांगितले. आम्ही तेथून गेल्यानंतर हा गोंधळ झाला. एका चांगल्या आंदोलनाला गालबोट लावण्याचा प्रयत्न झाला.

आंदोलनावेळी जो हिंसाचार घडला त्याचा आम्ही निषेध करतो. आता यापुढे रस्त्यावर न उतरता तालुका व जिल्हास्तरावर चक्री उपोषण केले जाईल.

त्याचबरोबर आत्मक्लेश म्हणून १५ ऑगस्ट रोजी आम्ही चूलबंद आंदोलन करणार आहोत. मागण्या मान्य होईपर्यंत आम्ही उपोषण करणार असल्याचे त्यांनी स्पष्ट केले. मराठा आरक्षण आंदोलनाला बदनाम करण्याचा प्रयत्न सुरू आहे. आम्ही शांतता बाळगण्याचे आवाहन करत होतो. पुणे जिल्हाधिकारी कार्यालयात आमच्याकडून जे नुकसान झाले त्याची आम्ही जबाबदारी स्वीकारतो व त्याची भरपाई करून देऊ, असेही समन्वय समितीने स्पष्ट केले

LEAVE A REPLY

*