खंडणी प्रकरणातील दोषी पोलीस अधीक्षक मनोज लोहार यांना शनिवारी सुनावणार शिक्षा

0

जळगाव/चाळीसगाव ।  प्रतिनिधी :  चाळीसगाव येथील रहीवासी तथा जिल्हा परिषदेचे माजी सदस्य डॉ. उत्तमराव धनाजी महाजन यांना डांबून ठेवून त्यांच्याकडून 25 लाख रूपयांची खंडणी मागितल्याप्रकरणी तत्कालीन अप्पर पोलिस अधिक्षक मनोज लोहार तथा सध्या होमगार्डचे पोलीस अधीक्षक व धीरज यशवंत येवले यांना बुधवारी जिल्हा सत्र न्यायालयाने दोषी ठरवीले आहे. या प्रकरणाचा अंतिम निकालावर दि. 19 रोजी कामकाज होणार आहे. याप्रकरणातील तत्कालीन पोलिस निरीक्षक विश्वास निंबाळकर यांना मात्र न्यायालयाने दोषमुक्त ठरविले आहे.

मनोज लोहार हे 2009 साली चाळीसगावात अप्पर पोलिस अधिक्षक म्हणून कार्यरत असतांना 16 जलैला त्यांचेविरूध्द चाळीसगाव पोलिस ठाण्यात डॉ. महाजन यांना डांबून ठेवत त्यांचेकडून 25 लाखांची खंडणी मागीतल्याप्रकरणी गुन्हा दाखल करण्यात आला होता. या प्रकरणी 26 जून 2013 ला अप्पर पोलिस अधिक्षक लोहार यांचे विरूध्द तर 7 जून 2012 ला धिरज येवले व 17 जून 1012 ला तत्कालीन पोलिस उपनिरीक्षक विश्वासराव निंबाळकर यांचेविरूध्द न्यायालयात आरोपपत्र दाखल करण्यात आले होते. या खटल्यात संपूर्ण सुनावणीदरम्यान फिर्यादीसह एकूण 16 साक्षीदार न्यायालयात तपासण्यात आले .

अशी झाली होती घटना

मालेगाव येथे काँग्रेसपार्टीच्या अध्यक्षा सोनिया गांधी यांचा कार्यक्रम असल्याने चाळीसगाव येथील जिल्हा परिषदेचे माजी सदस्य डॉ. उत्तमराव धनाजी महाजन हे दि. 30 जुलै 2009 रोजी आपल्या काही कार्यकर्त्यांसह जाण्यासाठी आपल्या दवाखान्याजवळ उभे होते. यावेळी तत्कालीन पोलिस उपनिरीक्षक विश्वासराव निंबाळकर हे काही कर्मचार्‍यांसह डॉ. महाजन यांच्याजवळ आले आणि त्यांनी तुम्हाला अप्पर पोलिस निरीक्षक लोहार साहेबांनी बोलविले असल्याचा निरोप दिला. परंतु मी सोनिया गांधी यांच्या कार्यक्रमासाठी जात असून त्याठिकाणाहून आल्यानंतर लोहार यांना भेटण्यासाठी येणार असल्याचे डॉ. महाजन यांनी श्री. निंबाळकर यांना सांगितले. परंतु श्री. निंबाळकर यांनी काहीही ऐकून न घेता डॉ. महाजन यांना दुचाकीवर बसवून जबरदस्तीने अप्पर पोलिस अधिक्षकांच्या कार्यालयात घेवून गेले.

याठिकाणी डॉ. महाजन यांना मनोज लोहार यांनी डांबून ठेवत. धिरज येवले याच्या माध्यमातून डॉ. महाजन यांच्याकडे 60 लाखांची खंडणी मागितली. मात्र धीरज याने डॉ. महाजन यांच्यासोबत खंडणीच्या रकमेची 25 लाखांपर्यंत तडजोड केली. पैसे दिल्यानंतरच तुमची सुटका होणार असल्याने मनोज लोहार यांनी डॉ. महाजन यांना दि. 6 जून 2009 रोजी व दि. 1 जुलै 2009 रोजी दुपारी 4 वाजेपर्यंत डांबून ठेवले होते. याप्रकरणी दि. 16 रोजी डॉ. उत्तमराव महाजन यांच्या फिर्यादीवरुन तत्कालीन अप्पर पोलिस अधीक्षक मनोज लोहार, तत्कालीन अप्पर पोलिस निरीक्षक विश्वासराव निंबाळकर व धिरज येवले यांच्या विरुद्ध गुन्हा दाखल करण्यात आला होता.

पंटर धीरज येवले याने केली मध्यस्ताची भूमिका

मनोज लोहार यांनी डॉ. महाजन यांना डांबून ठेवत त्यांना तुमच्याबाबत अनेक तक्रारी तारांकीत असून तुझ्याविषयी विधानसभेत प्रश्न घ्यायला लावेल. तसेच तुमच्या संचालकांना कोठडीत टाकून सर्वांची पंधरा-पंधरा दिवसांची पोलिस कोठडी घेवून अर्वाच्च भाषेत बोलत त्यांना धमकी दिली. यावेळी मनोज लोहार यांचा पंटर धीरज येवले हा लोहार यांचा कार्यालयात येवून त्याने डॉ. महाजन यांच्याशी बोलत मी मध्यस्ती करुन तुमच्या तडजोड करुन देतो असे सांगत त्याने मध्यस्तीची भुमिका पार पाडली.

पोलीस अधीक्षकांकडे केली होती फॅक्सद्वारे तक्रार

डॉ. उत्तमराव महाजन यांचा मुलगा मनोज महाजन हा नागपूर येथून आल्यानंतर त्याने वडीलांबाबत घडलेल्या प्रकरणाची माहिती जाणून घेतली. त्यानंतर मनोज महाजन याने घडलेल्या प्रकरणाची तक्रार तत्कालीन पोलिस अधिक्षक संतोष रस्तोगी यांना फॅक्सद्वारे दिली.

तत्कालीन पोलिस अधिक्षकांनी दिले होते डॉ. महाजन यांना सोडण्याचे आदेश

वडीलांना खंडणीसाठी डांबून ठेवल्याची तक्रार मनोज महाजन यांने तत्कालीन पोलिस अधिक्षक संतोष रस्तोगी यांना दिल्यानंतर. पोलिस अधिक्षकांनी तात्काळ मनोज लोहार व विश्वासराव निंबाळकर यांच्यासोबत संपर्क साधत डॉ. महाजन यांना सोडण्याचे आदेश दिले.

कॅम्प लावून नोंदविले 30 जणांचे जबाब

तक्रार मिळाल्यानंतर तत्कालीन पोलिस निरीक्षक जगदिश आखरे, डॉ. महाजन त्यांचा मुलगा मनोज महाजन, विश्वासराव निंबाळकर यांची पोलिस अधिक्षकांनी बोलविले असता. त्याठिकाणी डॉ. महाजन यांनी खंडणी प्रकरणाची लेखी तक्रार दिली. यावेळी पोलिस अधिक्षकांनी याप्रकरणाचे चौकशी करण्याचे आदेश दिले. दरम्यान दि. 2 जुलै 2009 ते 4 जुलै 2009 पर्यंत चाळीसगाव येथे कॅम्प लावून 30 जणांचे जबाब याठिकाणी नोंदवून घेत त्याचा सविस्तर अहवाल पोलिस महासंचालकांना त्याच दिवशी पाठविला होता.

अप्पर पोलिस महासंचालक रश्मी शुक्ला यांच्या आदेशानंतर दाखल झाली फिर्याद

पोलिस महासंचालकांकडे अहवाल पाठविल्यानंतर तत्कालीन अप्पर पोलिस महासंचालिका रश्मी शुक्ला यांचे आदेश आले. त्यानंतर दि. 16 जुलै 2009 रोजी खंडणी प्रकरणी मनोज लोहार यांच्याविरुद्ध फिर्याद दाखल करण्यात आली होती आणि त्याचा प्रकरणाचा तपास सीआयडीकडे वर्ग करण्यात आला होता.

डॉ. महाजन, रस्तोगींसह 16 जणांची साक्ष ठरली महत्वपुर्ण

दोषारोपत्र दाखल झाल्यानंतर सुनावणीमध्ये मूळ फिर्यादी डॉ. उत्तमराव महाजन, तत्कालीन पोलिस अधिक्षक संतोष रस्तोगी, मनोज महाजन, नितीन जाधव, अनिल देशमुख, जगन्नाथ महाजन, गोकुळ सोनवणे, विनय पाटील, सोमनाथ मराठे, अनिल पाटील, डिगंबर माळी, जगदेव आखरे, मसाजी काळे, सुनिल गायकवाड, रुपराव देशमुख, नितीन मेटकर या 16 जणांची साक्ष महत्वपूर्ण ठरल्या. तर बचाओ पक्षातर्फे बबलू रॉय व शामराव चौधरी या दोन जणांच्या साक्षीदार तपासण्यात आले होते.

या कलमांअन्वये ठरवले दोषी

अप्पर पोलिस अधिक्षकांनी खंडणीसाठी डांबून ठेवण्यात आलेले प्रकरण सन 2009 मध्ये चर्चेचा विषय ठरले होते. या प्रकरणात मनोज लोहार व धीरज सोनवणे यांना भादवी कलम 343, 346, 348, 363 अ, 385 व 506 अन्वये दोषी ठरविण्यात आले होते. तर विश्वासराव निंबाळकर यांच्यावर लावण्यात आलेल्या भादवी कलम 504 व 166 हे न्यायालयात सिद्ध न झाल्यामुळे त्यांना न्यायालयाने दोष मुक्त केले. सरकारपक्षातर्फे जिल्हा सरकारी वकील अ‍ॅड. केतन ढाके, मूळ फीर्यादीतर्फे अ‍ॅड. अविनाश पाटील, अ‍ॅड. पंकज अत्रे, बचाव पक्षातर्फे मनोज लोहार यांच्याकडून अ‍ॅड. निलेश घाणेकर, अ‍ॅड. सुधिर कुळकर्णी, धीरज येवलेतर्फे अ‍ॅड. सागर चित्रे तर विश्वासराव निंबाळकर यांच्यातर्फे अ‍ॅड. आर. के. पाटील यांनी कामकाज पाहिले.

बहूचर्चीत प्रकरणाच्या कामकाजाकडे लक्ष

सन 2009 साली घडलेल्या खंडणी प्रकरणाचे आज न्यायालयात कामकाज झाले असता. न्यायालयाने मनोज लोहार व धीरज येवले यांना भादवी कलम 364 अ खाली दोषी ठरविले आहे. दरम्यान या प्रकरणाचा निकाल दि. 19 रोजी लाणार असून यातील आरोपींना न्यायालय कोणती शिक्षा सुनावते याकडे आता सर्वांचे लक्ष लागून आहे.या प्रकरणात तत्कालीन पोलिस अधीक्षक तथा आताचे पोलिस महानिरीक्षक संतोष रस्तोगी यांची महत्वाची भूमीका राहीली आहे. रस्तोगी यांनी या प्रकरणाची तक्रार आल्यानंतर लागलीच दखल घेत तब्बल तीन दिवस चाळीसगावात मुक्काम करून यात गुन्हा दाखल केला होता. रस्तोगी यांनी अप्पर पोलिस अधिक्षक लोहार यांची केलेली चौकशी या प्रकरणात तपासलेले सर्व कंगोरे तपासात महत्वपुर्ण ठरले आहेत.

दोषी ठरवताच घेतले ताब्यात

तत्कालीन पोलिस अधिक्षक मनोज लोहार व धीरज येवले या दोघांना न्यायालयाने दोषी ठरवल्यानंतर. आदेशाच्या आदेशानुसार दोघांना पोलिसांनी ताब्यात घेतले. त्यानंतर दोघांची कारागृहात रवानगी करण्यात आली. दरम्यान दि.19 रोजी होणार्‍या अंतिम सुनावणीसाठी त्यांना पुन्हा न्यायालयात हजर करण्यात येणार आहे.

जन्मठेप, मृत्यूदंडाची आहे तरतूद

मनोज लोहार तसेच धीरज येवले यांच्या विरुद्ध भादवी 364 अ या कलामान्वये गुन्हा दाखल आहे. त्यात बुधवारी न्यायालयाने त्यांना दोषी देखील ठरविले आहे. दरम्यान भादवी 364 अ मध्ये संबंधित आरोपी दोषी आढळल्यास त्याला जन्मठेप तसेच मृत्यूदंड व दंडाची शिक्षा देण्याची तरतुद आहे.

खटला अंतिम निर्णयापर्यंत पोहचला!

पोलीस खात्यात काम करतांना अनेक कठीण प्रसंग येतात. आपल्याच एका पोलीस अधिकार्‍याला एखाद्या प्रकरणात न्यायालय दोषी ठरवते. तेव्हा दु:ख होते. मात्र लोहार प्रकरणात गुन्ह्याची एक कायदेशीर प्रक्रिया आज या खटल्याच्या निमित्ताने अंतिम निर्णयापर्यंत येवून पोहचली आहे.
– संतोष रस्तोगी तत्कालीन पोलीस अधीक्षक व सध्याचे सहपोलीस आयुक्त, मुंबई

LEAVE A REPLY

*