धावत्या बसमधून दोन विद्यार्थी पडले : प्रकृती चिंताजनक

0

योगेश पाटील |पारोळा : भडगाव- शिरसमणी येथून पारोळाकडे येणारी शाळकरी व महाविद्यालयीन विद्यार्थी, विद्यार्थीनीना घेऊन येणार्‍या बसचा दरवाजा तुटल्याने दोन विद्यार्थी खाली पडून गंभीर जखमी झाल्याची घटना घडली.

भडगाव- टिटवी-शिरसमणी-हणमंतखेडेमार्गे सकाळी 9:30 ची पारोळा येणारी बस क्र 0108 ह्या बसमध्ये शिरसमणी येथून शंभर ते दिडशे शाळकरी, महाविद्यालयीन विद्यार्थी, विद्यार्थीनी तसेच इतर प्रवासी घेऊन येत असतांना मेहु-टेहु गावाजवळ भरधाव बसचा दरवाजावर दाब येऊन तुटल्याने जुगराज मोहन माळी (वय 20) रा. शिरसमणी, शिक्षण टी. वाय., भटुसिंग कैलास राठोड (वय 20) शिक्षण एस. वाय., हे किसान महाविद्यालयाचे विद्यार्थी खाली पडल्याने दोघाच्या डोक्याला व हाता- पायाला जबर मार लागला.

मात्र चालकांला काही एक न कळाल्याने बस मधील विद्यार्थीनी आरडा ओरड केल्यानंतर बस चालकाने घटनेपासुन शंभर फुटावर बस थांबवली. जखमीना ताबडतोब डॉ हर्षल माने यांच्या रुग्णालयात दाखल करण्यात येवून जखमीवर उपचार केला. घटनेचे गांभीर्य ओळखून महामंडळाचे चालक, वाहक हॉस्पीटलला बस आणून तेथून पोबारा झाले.

विद्यार्थीनींचा संताप

शिरसमणी येथून सकाळी 6 वाजता व त्यानंतर 9.30 वाजता बस असते सकाळी 9.30 वाजेची महामंडळाची बस ही शाळा आणि कॉलेजमध्ये शिक्षण घेणार्‍या विद्यार्थ्यांसाठी सोईची असल्याकारणाने 150े विद्यार्थी या बसमध्ये प्रवास करीत असल्याची खळबजनक माहिती विद्यार्थ्यांनी दिली अनेक वेळा महामंडळाकडे बस वाढवून व नियमीत करण्याचे निवेदन देवून ही त्या निवेदनाकडे दुर्लक्ष केले म्हणून ही घटना घडल्याचा आरोप करुन कॉलेजच्या वेळेनुसार अजुन एक बस ताबडतोब सुरु करुन या बसच्या चालक-वाहकावर ताबडतोब करवाई करावी. अन्यथा तीव्र आंदोलन छेडण्याचा इशारा संतप्त विद्यार्थी-विद्यार्थीनीनी दिला आहे.

अधिकार्‍यांची उशीरा भेट

दरम्यान भडगाव शिरसमणी ते पारोळा ह्या बसचा दरवाजा तुटून दोन महाविद्यालयीन विद्यार्थी पडल्याने ते जखमी झाले. यांची माहिती जि. प. सदस्य डॉ हर्षल माने यांनी अधिकार्‍यांना कळवली मात्र दोन तासानंतर महामंडळाचे अधिकार्‍यांनी भेट दिली.

विद्यार्थी आक्रमक

घटनेचे गांभीर्य ओळखून महामंडळाच्या अधिकार्‍यांनी येण्यास उशीर केल्याने कृष्णा हॉस्पीटल येथे महामंडळाचे अधिकारी येताच विद्यार्थी व विद्यार्थीनीनी संताप व्यक्त करीत गोधळ घातला त्या वेळी पोलिसांनी त्यांना हटकून लावले.

एक हजार रुपायांची मदत

एस. टी. महामंडळाचे डेपो मॅनेजर श्रीमती देवरे, विभागीय अधिकारी घुले, ए टी आय. बी.एल वाघ यांच्यासह अधिकार्‍यांनी कृष्णा हॉस्पीटलमध्ये जखमी विद्यार्थीना भेट देऊन तातडीने प्रत्येकी एक हजार रुपयांची रोख मदत करण्यात आली.

अपघाताचे वृत्त समजतातच कृष्णा हॉस्पीटलमध्ये जखमी झालेले विद्यार्थ्यांना बघण्यासाठी सरपंच सुदाम पाटील, उपसरपंच चेतन पाटील, संजय महाजन, धिरज महाजन, संतोष महाजन, माजी सरपंच बालु पाटील, यांच्यासह त्याच्या नातेवाईकांनी व विद्यार्थ्यांनी एकच गर्दी केली होती. याबाबत पारोळा पोलिसात उशीरापर्यंत गुन्हा नोंद करण्याचे काम सुरु असल्याचे समजते.

मंगरूळ गटातील रस्त्यावर असलेल्या गावांना जादा बसेस सोडून विद्यार्थ्याच्या प्रश्न मार्गी लावावा तसे न झाल्यास आठ दिवसात बस स्थानकात रास्ता रोको करण्याचा इशारा शिवसेनेचे जि. प. सदस्य डाँ हर्षल माने यांनी दिला आहे.

LEAVE A REPLY

*