Type to search

maharashtra आवर्जून वाचाच गणेशोत्सव धुळे

बाप्पांच्या स्वागतासाठी धुळेनगरी सज्ज

Share
धुळे ।  प्रतिनिधी :  गणेश चतुर्थीला दि. 13 सप्टेंबर रोजी विघ्नहर्ता गणेशाची स्थापना करण्यात येणार आहे. त्यामुळे गणरायाच्या स्वागतासाठी धुळेनगरी सज्ज झाली आहे.

घरोघरी सजावट करण्यात आली आहे. प्रमुख गणेश मंडळांनी गणेश मूर्तीची आधीच नोंदणी करुन ठेवली आहे. उद्या दि.13 रोजी फक्त औपचारिकता म्हणून मिरवणुकीद्वारे गणपतीची मूर्ती ढोल-ताशांच्या निनादात स्थापन करण्यात येणार आहे. तर आज गणेश चतुर्थीच्या पूर्वसंध्येला पुजेच्या साहित्यासह सजावटीचे साहित्य खरेदीसाठी बाजारपेठेत गर्दी झाली होती.

गेल्या काही दिवसांपासून गणेशोत्सवाच्या तयारीला वेग देण्यात आला आहे. गणेश मंडळांनी उत्सवाची तयारी पूर्ण केली असून विघ्नहर्त्यांच्या स्वागतासाठी धुळेनगरी सज्ज झाली आहे. उद्या गणेश चतुर्थीला लाडक्या गणरायाची स्थापना करण्यात येणार आहे. अकरा दिवसांच्या गणेशोत्सवाला प्रारंभ होणार आहे. या पार्श्वभूमीवर चौकाचौकात मंडप सजले असून गणेश मंडळांनी उत्सवाची तयारी पूर्ण केली आहे. आरास, देखावे तयार करण्याला वेग देण्यात आला आहे.

उत्सवाच्या पूर्वसंध्येला  बाजारपेठेत गणेशमूर्तींसह पुजेचे साहित्य, सजावटीचे साहित्य खरेदीसाठी गर्दी झाली होती. शहरातील फुलवाला चौक, संतोषीमाता चौक, दत्तमंदीर यासह अन्य ठिकाणी गणेश मूर्ती विक्रेत्यांनी तात्पुरती दुकाने थाटली आहेत. बाजारपेठेत विविध आकारातील रंगातील गणेशमूर्ती विक्रीसाठी उपलब्ध आहेत. त्यात मुंबईच्या लालबागच्या राजापासून ते दगडूशेठ हलवाई, कृष्णावतार, छत्रपती शिवाजी महाराजांच्या वेशातील गणेशमूर्तीचा समावेश आहे.

शिवाय जास्वंद फुल, पान, शंख, चौरंग, सूर्यफुल अशा प्रकरातील विविधारंगी गणेश मूर्तीही विक्रीसाठी उपलब्ध आहेत. 50 रुपयांपासून ते 31 हजारांपर्यत गणेश मूर्ती बाजारपेठेत विक्रीसाठी दाखल झाल्या आहेत.शहरातील वर्दळीच्या रस्त्यांवर विक्रेत्यांनी दुकाने थाटल्यामुळे वाहतूक व्यवस्था विस्कळीत झाली आहे. त्यामुळे ठिकठिकाणी बॅरिकेट्स लावून वाहतूक व्यवस्था अन्य मार्गाने वळविण्यात आली आहे. ठिकठिकाणी शहर वाहतूक शाखेचे कर्मचारी बंदोबस्तासाठी तैनात करण्यात आले आहे.

आकर्षक मूर्ती

बाजारपेठेत गणरायाच्या मूर्ती विविध आकर्षक लूकमध्ये विक्रीस दखल झालेल्या आहेत. त्यात हातांनी मंत्र लिहीणारे बाप्पा, नॅनोवर बसलेले, स्कूटर चालविणारे आदी रुपांचा समावेश आहे. तसेच गणेशाचे साहित्य बाजारपेठेत दाखल झाले आहे. त्यात आसन शंभर ते दोन हजार रुपये, मखर तीस ते पाच हजार, दागिने फेटा तीस ते दीडशे, उपरणे शंभर ते पाचशे, कमान सत्तर ते दोनशे, चमकीची माळा पंचवीस ते सत्तर, चायनीस माळा पन्नास ते एक हजार रुपयांना उपलब्ध आहेत. त्याचबरोबर खास फेटा, नक्षीकाम केलेले उपरणे, विविध प्रकारचे मोत्यांच घर, मुकुट असे सुंदर दागिने विक्रीस आले आहेत.

Leave a Comment

Your email address will not be published. Required fields are marked *

*

error: Content is protected !!