# Video # तिसर्‍या इयत्तेतील धारा मेढे सांगते सहा भाषात संविधानाची प्रस्तावना

0
सुभाष बिंदवाल  |  रांजणी, ता. जामनेर । दि. 31 :  तिसर्‍या इयत्तेत असणारी धारा मेढे ही गुणी विद्यार्थीनी डॉ.बाबासाहेब आंबेडकरांनी लिहिलेल्या संविधानाची प्रास्ताविक एक दोन नव्हे तर तब्बल सहा भाषेत सांगत आहे.

धारा मेढे ही जळगावच्या भा.का.लाठी विद्यामंदिराची विद्यार्थीनी असून ती वयाच्या तिसर्‍या वर्षापासून संविधानाची प्रस्तावना तोंडपाठ सांगत आहे.धारा हि बालवाडीत असतांना तिने दोन ते तीन वेळा संविधानाचे प्रास्ताविक मराठीत इतर विद्यार्थ्यांकडून ऐकले. घरी आल्यावर तिच्या आईला ते म्हणून दाखविले. तिच्या वडिलांना हि बाब कळाली असता त्यांनी ती प्रत घरी आणली आणि धाराने ती प्रत न बघता संविधान तोंड पाठ म्हणून दाखविले. म्हणतात ना ‘बाळाचे पाय पाळण्यात दिसतात’ हेच लक्षात घेता तिने अनेक भाषेत संविधान म्हणावे या करिता तिच्या आई व वडिलांनी तिची तयारी सुरु केली.

हरहुन्नरी धारा

धाराला अध्यात्मची खूप आवड आहे. ती 2/3 वर्षाची असतांना नामजपाचे यंत्र लावल्यावर तो नामजप ऐकत शांत झोपत असे. घरातील व्यक्ती देवपूजा करीत असतांना ती टाळ्या वाजवत प्रतिसाद देत असे. गणपती सोत्र, मारुती सोत्र, गुरुस्मरण इ.तिला आवड आहे, उपजतच सात्विकतेची आवड असलेली धारा.शाळेतील प्रगती व गुणवत्ता यांचा विचार करता धाराला अभ्यासामध्ये खूपच रुची असून ती नियमित अभ्यास करूनच मग खेळते. याचे फळ म्हणून तिला इ.1 ली.व 2 री. मध्ये शेकडा 95 टक्के पेक्षा अधिक गुण मिळालेले असून तिची गुणवत्ता अधिकच उंचावत आहे. धारा वयाच्या तिसर्‍या वर्षापासूनच न चुकता शाळेच्या स्नेहसंमेलनात देशभक्तीपर गीते, धार्मिक गीते, सामाजिक विषयावरील नाटिका,प्रबोधनात्मक कार्यक्रम मध्ये तिचा हिरारीने सहभाग असतो.

दहा भाषेत संविधानाची तयारी

धाराचा अभ्यासाचा ओढा व पाठ करण्याची आकलन क्षमता लक्षात घेता तिच्या आई वडिलांनी वयाच्या 10 वर्षापर्यंत 10 भाषेत संविधान तोंडपाठ करण्याचा मान व्यक्त केला आहे. योगायोग असा कि धाराची जन्मतारीख 10 फेब्रुवारी 2010 हा अंक लक्षात घेता तिची तयारी सुरु झाली. प्रथमतः असे ठरले कि, धाराचे मराठीत संविधान पाठ झालेले आहे आता पुढे संस्कृत आणि हिंदी भाषेत पाठ घेऊ. हिंदी तिने लगेच पाठ करून घेतले पण संस्कृत भाषेत अशी अडचण होती कि संस्कृत भाषेचे उच्चार ती स्वतः घरी म्हणू शकत नव्हती, हि अडचण लक्षात घेता आर.आर.विद्यालयातील संस्कृत शिक्षक द्वारकाधीश जोशी यांना तिच्या वडिलांनी सांगितली धाराची पाठांतराची इच्छा लक्षात घेता श्री.जोशी सर यांनी विनाशुल्क धारा ला मी स्वत: घरी येऊन उच्चार शिकवेल असे सांगितले. याप्रमाणे श्री.जोशी सर यांनी नियमित 5 दिवस रोज 1/2 तास तिचा सराव घेतला.

धारा 7 दिवसातच संस्कृत मध्ये संविधान म्हणू लागली. अशा पद्धतीने मग तिच्या आईने व वडिलांनी घरीच तिच्याकडून इंग्लिश, गुजराथी, उर्दू ह्या भाषेत संविधान पाठ करून घेतले. तिचे आजपर्यंत मराठी, हिंदी, संस्कृत, गुजराथी, इंग्लिश, उर्दू मध्ये संविधान प्रास्ताविक पाठ झालेले आहे.

कौतुकाचा नी बक्षिसांचा वर्षाव

13 ऑगस्ट 2017 रोजी आर.आर.विद्यालयात संस्कृत दिनी धाराने संस्कृतमधून संविधान प्रास्ताविक सादर केले.22 जानेवारी 2017 रोजी रस्ता सुरक्षा अभियान सप्ताहाचा समारोप प्रसंगी धाराने संविधान सादर केल्याने ततकालीन पेलिस अधिक्षक डॉ.जालिंदर सुपेकर, मोक्षदा पाटील, नंदकुमार ठाकूर यांनी तिचे कौतुक करत तिला स्मृती चिन्ह व प्रमाणपत्र दिले. धारा दुसरीत गेल्यावर दि.26 नोहेंबर 2017 रोजी आर.आर.विद्यालय,एस.सी/ एस.टी. वेल्फेअर असो. बी.एस.एन.एल.ऑफिस येथे आ.राजूमामा भोळे व तत्कालनीन महापौर ललित कोल्हे यांनी तिचा सत्कार केला. जेष्ठ नागरिक संघ, मुक्ताईनगर, संविधान बचाव अभियान सुभाष चौक, चेतना व्यसनमुक्ती केंद्र, दिशा स्पर्धा परीक्षा केंद्र, बाल सुधार गृह, शिव कॉलनी तसेच विशेष उल्लेखनीय बाब म्हणजे संविधान जागर रली निमित्ताने स्टेशन रोड येथे जिल्हाधिकारी किशोरराजे निंबाळकर यांचे सोबत व जळगाव शहराचे इतर मान्यवर यांचे समोर संविधान प्रास्ताविक म्हणून सर्वांची वाहवा मिळविली.

दि.6 डिसेंबर 2017 रोजी धाराने स्वामी समर्थ विद्यालय,खूबचंद सागरमल विद्यालय,महाराणा प्रताप विद्यालय,आर.आर.विद्यालय, म.न.पा.शाळा.क्र.2, चौबे शाळा,अलफेज विद्यालय, दिशा व दर्जी परीक्षा केंद्र इ.ठिकाणी संविधान प्रास्ताविक सादर केले. .

दि.12 जानेवारी 2018 रोजी दिशा स्पर्धा केंद्रातर्फे शहरातील उल्लेखनीय कार्याचा ठसा उमटविणार्‍या महिलांचा गौरव करण्यात आला आणि 12 महिलांमध्ये फक्त धारा एकमेव बालिका होती हे विशेष !

चिंतामणी फौन्डेशन तर्फे बेटी बचाओ बेटी पढोओ या शासकिय कार्यक्रम अंतर्गत धारा हिस विशेष पुरस्कार आ.राजूमामा भोळे, फौन्डेशनच्या अध्यक्षा रुपाली वाघ यांच्या हस्ते देऊन गौरविण्यात आले. दि.8 मार्च 2018 रोजी जागतिक महिला दिनानिमित्त विविध क्षेत्रात कार्य करणार्‍या महिलांचा सत्कार करण्यात आला आणि विशेष असे कि,त्यात धारा हि होती. याप्रसंगी जि.प. अध्यक्षा सौ.उज्ज्वलाताई पाटील, स्रीरोग तज्ञ डॉ.सीमा पाटील, गटविकास अधिकारी सौ.मंजुश्रीताई गायकवाड आदी मान्यवर उपस्थित होते.

जागतिक महिला दिनानिमित्त महिला बाल कल्याण विभाग व जि.प.जळगाव यांच्या तर्फे महिलांचा सत्कार करण्यात आला. या कार्यक्रमात धाराने संविधान प्रास्ताविक म्हणत जि.प. अध्यक्षा उज्वला पाटील, उपाध्यक्ष मच्छिंद्र पाटील,महिला व बालकल्याण सभापती सौ.रजनीताई चव्हाण, मुख्य कार्यकारी अधिकारी श्री.दिवेकर यांनी धाराचा सत्कार केला.

धारा च्या या कामगिरी बद्दल तिला अनेक मेडल,प्रमाणपत्र,स्मृतीचिन्ह,रोख बक्षीस,पुस्तक स्वरुपात बक्षीस इ. मिळालेले आहे. धारा सध्या 6 भाषेत संविधान प्रस्तावना म्हणते व या पुढे आणखी इतर भाषेत संविधान पाठ करण्याचा तिचा मानस आहे.

धाराचे वडील प्रशांत मधुकर मेढे हे आर आर.विद्यालयात कार्यरत असून आई सौ.सानिका प्रशांत मेढे ह्या गृहिणी आहे, आजोबा मधुकर एस.मेढे हे से.निवृत्त गट विकास अधिकारी असून आजी माया एम.मेढे ह्या गृहिणी आहे. तर धारा ला दोन काका मनीष मेढे ( ग्रामसेवक) व सुनील मेढे (व्यवसायिक) असून काकू सौ.नूतन सु.मेढे व त्यांची कन्या कु.अक्षदा मेढे असा एकूण परिवार असून सर्व एकत्र कुटुंब पद्धतीने सोबत राहतात.

LEAVE A REPLY

*