Type to search

maharashtra आवर्जून वाचाच जळगाव मुख्य बातम्या

#Video # आषाढी आली.. सवे घेवूनी भक्त मेळा ! मुक्ताई निघाली पंढरीला!!

Share

मुक्ताईनगर | प्रतिनिधी  :     वाट पाहे निढळी ठेवूनिया हात !
                                       पंढरीचा वाटे माझे लागले चित्त !!
                                       कई आता देखेन माझा मायबाप!!

जगन्नियंता परमात्मा कटेवर हात ठेवून भक्तांची वाट पाहत असल्याने भेटीसाठी चित्त आतुर झालेल्या हजारोंच्या संख्येने आलेल्या वारकर्यानी रणरणत्या उन्हांची तमा न बाळगता आदिशक्ती संत मुक्ताबाई समाधीस्थळावरून निघालेला आषाढी वारी पालखी सोहळ्यासोबत प्रस्थान ठेवले.

श्री संत मुक्ताबाई समाधीस्थळ श्री क्षेत्र कोथळी – मुक्ताईनगर येथून शेकडो वर्षापासून अखंडित पणे आषाढी एकादशीस विठूरायाचे भेटीसाठी जाणार्या संत मुक्ताबाई पालखी सोहळा मुक्ताईनगर ते श्री क्षेत्र पंढरपूर वारीने ” मुक्ताबाई मुक्ताबाई ! आदिशक्ती मुक्ताबाई !!जयघोषात सकाळी 11वा.विधिवत पादूका पूजनाने पालखी प्रस्थान ठेवले.

तत्पूर्वी कालपासून राज्यभरातील भाविक मोठ्या संख्येने दाखल झाले होते.पहाटे मंगल काकडा भजनानंदात संत मुक्ताबाई महापूजा अभिषेक पुंडलिकराव पवार चापोरा यांनी सपत्निक केला. मुक्ताबाई संस्थानचे मानकरी भैय्यासाहेब रविंद्र पाटील यांनी पादूकांना मंगल अभिषेक व आरती केली. वारकरी भाविक भजन गात पावली खेळत तल्लीन झाले होते. मंदिर परिसरात केळीचे खांब ,आंब्याची तोरणे लावल्याने मंगलमय वातावरण तयार झाले होते.

ठीक 11वा.नैवेद्य देवून महाआरती करण्यात आली.मुक्ताबाई मुक्ताबाई जयघोषात पादूका पालखीत ठेवून सोहळा मंदिर परिक्रमा करित मार्गस्थ होत प्रस्थान पार पाडले.

यावेळी संस्थान विश्वस्त पंजाबराव दादा पाटील पांडूरंग पाटील सोहळा प्रमुख रविंद्र महाराज हरणे , … माजी मंत्री आ.एकनाथराव खडसे खा.रक्षाताई खडसे पोलीस निरीक्षक सुरेश शिंदे बाजार समिती सभापती निवृत्ती पाटील पंचायत समितीचे सभापती शुभांगी भोलाणे विकास पाटील यु डी पाटील जगदीश पाटील सम्राट पाटील व्यवस्थापक विनायकराव हरणे पाटील उध्दव महाराज जुनारे मुक्ताईनगर पंकज महाराज पाटील नितीन महाराज विशाल महाराज विजय महाराज रतिराम महाराज वाल्मिक महाराज अंबादास महाराज विनोद सोनवणे योगेश कोलते सदा पाटील पुजारी व्यवहारे सर आदी उपस्थित होते पुंडलिकराव दामोदर पवार चापोरा यांनी संस्थांनमध्ये व वासुदेव निवृत्ती महाजन यांनी नवीन गावात अन्नदान केले.

ठिकाणी जल्लोषात स्वागत मुक्ताईनगर शहरात पालखी सोहळ्याचे आगमन होताच ठिकाणे फटाके उडवून सोहळ्याचे स्वागत झाले नगराध्यक्ष नजमा तडवी मुख्याधिकारी श्याम गोसावी यांनी सीमेवर पालखी पूजन केले शहरातून मिरवणुकीने जात असताना भाविकांना पाणी वाटप ठीकठिकाणी झाले. सोहळा नविन मुक्ताबाई मंदिरात दुपारी विसावा घेवून सातोड गावात येताच जल्लोषात स्वागत झाले भावराव पाटील शेषराव पाटील सातोड यांनी आदरातिथ्य केले .

व्यसनमुक्तीचा जागर

सोहळ्यात व्यसनमुक्तीचा संदेश देत आज दिवसभरात 27युवकांनी व्यसनमुक्तीची शपथ घेवून संकल्प केला की मानवी जीवनाचे महत्त्व वारकरी संप्रदाय विचारातून कळल्याने आदिशक्ती मुक्ताबाई साक्ष ठेवून मी सर्व व्यसनाचा त्याग करीत आहे व.ईतरांना प्रेरीत करित राहील अशी शपथ रविंद्र महाराज यांनी दिली.

Leave a Comment

Your email address will not be published. Required fields are marked *

*

error: Content is protected !!