लॉकडाउनमध्ये संयमाने साजरे केले आनंद सोहळे!

आयुष्यात असा लॉकडाऊन वैगेरे काही होईल याचा विचार हि मी कधी स्वप्नात केला नव्हता. अशात काही दिवसान आधी बायको बाळंतपणासाठी माहेरी गेली होती. मी हि दि. २५ मार्चला तिकडे जाणार होतो. परंतु दि. २३ मार्चला लॉकडाऊन जाहीर झाला आणि सर्व ‘जैसे थे’ झाला. अनेक पर्यंत करून देखील मला तिला भेटता आले नाही. माझ्या गैरहजेरीतच माझ्या मुलीचा जन्म झाला. तिला फक्त व्हिडिओ काँँलनेच पाहू शकलो याची खंत आयुष्यभर वाटत राहील. पुढे मग मे महिन्याचा पहिल्या आठवड्यात पोलिसांकडून रीतसर परवानगी घेऊन मी मुलीला व बायकोला भेटण्यासाठी गेलो.

अविनाश वाघ, मालपुर

करोना आणि त्यामुळे होणारे लॉकडाऊन यांचा परिणाम माझ्या सह अनेकांच्या जीवनावर झाला आहे. यापूर्वी जेवण्यासाठी आणि झोपेसाठी केवळ घराचा उपयोग होत होता. परंतु लॉकडाऊनमध्ये सारे गणित बदलेले पाहायला मिळाले. कधी नव्हे तो इतका वेळ कुटुंबीयांसोबत घालवण्यासाठी मिळाला. त्यात आई-बाबांचा जन्म वाढदिवस कधी नव्हे तो एकता खास पद्धतीने साजरा करता आला. सालाबादाप्रमाणे बाहेर खानावळीत न जाता स्वतःच्या हाताने बनवून खाऊ घालण्याचा योग या निमित्ताने आला. तसेच राम नवमी, हनुमान जयंती, गुढीपाडवा अश्या सणांची तयारी मोठ्या उत्साहात आई-बाबा व घरातील भावंडांसह केली. माझ्यासह घरातील प्रत्येकाचा सहभाग व उत्साह या काळात द्विगुणीत झाला होता. कधी नव्हे तो असा एकत्र राहण्याचा योग लॉकडाऊनच्या निम्मिताने जुळून आला होता.

साबिक देशमुख, नाशिक

मार्च ते मे हे खरे तर आपल्याकडे लग्नाचा सिझन असतो. अनेकांचे विवाह आधी पासूनच ठरले असतात परंतु अनपेक्षित लॉकडाऊनमुळे अनेकांच्या स्वप्नांवर पाणी फिरले असाच काहीसा अनुभव माझ्या घरात आला. मावशीच्या मुलीचा विवाह एप्रिल महिन्यात निश्चित करण्यात आला होता परंतु लॉकडाऊनमुळे विवाहास परवानगी न मिळाल्यामुळे आमच्या घरातील तो पहिला विवाह अगदी घरगुती पद्धतीने साजरा करण्यात आला. तो अनुभव माझ्यासह घरच्यांसाठी अनोखा होता.

वेदांत पाटील, मुंबई