नातेवाईकांचा हॉस्पिटलसमोर ठिय्या, डॉक्टरविरूध्द मनुष्यवधाचा गुन्हा दाखल करण्याची मागणी
कोपरगाव (तालुका प्रतिनिधी) – येथील आत्मा मालिक रुग्णालय संचालित, एव्हर हेल्दी हॉस्पिटल प्रा. लि. यांच्या डॉक्टरांकडून हृदयाचे छिद्र बंद करण्याच्या शस्त्रक्रियेनंतर चार वर्षांच्या बालकाचा मृत्यू झाल्याची घटना शनिवारी घडली. या घटनेनंतर बालकाच्या संतप्त नातेवाईकांनी रुग्णालयास घेराव घालून एव्हरहेल्दी हॉस्पिटल प्रा. लि. च्या संबंधित डॉक्टरांवर मनुष्यवधाचा गुन्हा दाखल करण्याची मागणी केली. डॉक्टरांनी ऑपरेशन विषयी आपल्याला काहीच माहिती दिली नसल्याचा आरोप नातेवाईकांकडून करण्यात आला आहे. तर शस्त्रक्रियेपूर्वी आपण सर्व माहिती दिल्याचा दावा डॉक्टरांनी केला आहे.
याबाबतची माहिती अशी, औरंगाबाद जिल्ह्यातील कन्नड तालुक्यातील बिपखेडा येथील नानासाहेब जाधव यांचा मुलगा रोशन जाधव (वय 4) याच्या हृदयाला छिद्र असल्याने त्याला आत्मा मालिक रुग्णालयद्वारा संचालित, एव्हरहेल्दी हॉस्पिटल प्रा. लि. येथे घेऊन आले होते. येथील डॉक्टरांनी त्याची तपासणी करून सोमवारी 25 नोव्हेंबर रोजी दाखल केले होते. हृदयाचे छिद्र बंद करण्याची शस्त्रक्रिया करण्यासाठी शुक्रवारी 29 नोव्हेंबर रोजी रात्री साडे आठला रोशन याला शस्त्रक्रिया कक्षामध्ये नेण्यात आले. त्यानंतर तेथे साधारण सात ते आठ तास म्हणजे शनिवारी पहाटेपर्यंत शस्त्रक्रिया सुरू होती. ऑपरेशन झाल्यानंतर रोशन याचा काही वेळाने मृत्यू झाला. ही बाब डॉक्टरांनी नातेवाईकांना कळविल्याचे रोशन याचे नातेवाईक कचरू महाले यांनी दिली.
याबाबत माहिती देताना कचरू महाले म्हणाले, कृपया लहान मुलाच्या हृदयाला होल असल्यास त्वरित कळवा. विना ऑपरेशन (डिवाइसद्वारे) मोफत इलाज आत्मा मालिक हॉस्पिटल संचालितद्वारा, एव्हरहेल्दी हॉस्पिटल प्रा. लि. ही सोशल मीडियावरील जाहिरात वाचूनच रोशन याला आत्मा मालिक हॉस्पिटलमध्ये उपचारासाठी आणले होते. शुक्रवारी रोशन यांच्यावर शस्त्रक्रिया करण्यात आली. दरम्यान प्रकृती अत्यवस्थ होऊन त्यांचा मृत्यू झाला. या घटनेमुळे संतप्त झालेल्या नातेवाईकांनी रुग्णालयात घेराव घालून रुग्णाच्या मृत्यूस कारणीभूत आत्मा मालिक द्वारा संचालित, एव्हरहेल्दी हॉस्पिटल प्रा. लि. चे डॉक्टर जबाबदार असल्याचा आरोप केला.
नातेवाइकांचा गोंधळ सुरू असताना, घटनास्थळी पोलीस निरीक्षक राकेश माणगावकर यांच्यासह पोलीस दाखल झाले. त्यांनी नातेवाईकांना शांत राहण्याचे आवाहन केले. तुमची काही तक्रार असेल तर पोलीस स्टेशनला नोंदवा, आम्ही कारवाई करण्यास तयार आहोत असे सांगून परिस्थिती नियंत्रणात आणली. मयत रोशनचे वडील नानासाहेब जाधव म्हणाले, फॉर्मवर सह्या करा अगदी मोफत शस्त्रक्रिया करू, असे सांगितले होते. त्यामुळे आम्ही सहमती दर्शवली.
संबंधित डॉक्टरांशी संपर्क साधला असता त्यांनी रोशन याच्या नातेवाईकांना आपण सर्व कल्पना दिली होती असे सांगितले. मात्र आपल्या मुलाचा मृत्यू डॉक्टरांच्या हलगर्जीमुळे झाल्याचा आरोप वडील नानासाहेब यांनी केला. हॉस्पिटलचे फुटेज तपासून, दोषींवर कारवाईची मागणी यावेळी कुटुंबीयांनी केली. पोलिस निरीक्षक राकेश माणगावकर यांनी सांगितले, रोशन याचा मृतदेह शवविच्छेदनासाठी घाटी रुग्णालय औरंगाबाद येथे पाठवून दिला आहे. या प्रकरणी कोपरगाव शहर पोलिसात अकस्मात मृत्यूची नोंद करण्यात आली असून घाटी रुग्णालयाकडून शवविच्छेदनाचा अहवाल प्राप्त होताच पुढील कारवाई करण्यात येईल. डॉक्टरांबाबत नातेवाईकांचा काही आक्षेप असल्यास त्याचीही तक्रार नोंदवून घेण्यात येईल.
सरकारी योजनांचा लाभ उठविणे या दृष्टिकोनातून नामांकित व गुडविल प्राप्त हॉस्पिटल करार बेसिसवर चालविण्यास घेऊन त्याद्वारे आपले उखळ पांढरे करण्याचा एक मोठा व्यवसाय सध्या सर्वत्र सुरू आहे. आत्मा मालिक संचालितद्वारा, एव्हरहेल्दी हॉस्पिटल प्रा. लि. ही संस्था कार्यरत आहे.