Type to search

धुळे

तप्त उन्हाने धुळेकर हैराण

Share

धुळे । दि.20। प्रतिनिधी :  जिल्ह्यात कालपासून उन्हाचा तडाखा वाढला असून अंग भाजून निघणार्‍या तप्त उन्ह, छळा आणि उकाड्यामुळे धुळेकर हैराण झाले आहे. दुपारच्या वेळेस घराबाहेर देखील निघणे कठीण झाले असून शहरातील रस्त्यांवर शुकशुकाट दिसून येत आहे. दरम्यान आज दि. 20 रोजी 42.6 अंश सेल्सिअस इतक्या तापमानाची नोंद करण्यात आली आहे. हवामान खात्याने दि.19 ते 25 या कालावधीत जिल्ह्याचे तापमान 45 अंशांपर्यंत जाण्याचा इशारा दिला आहे. त्यामुळे नागरिकांना काळजी घेण्याचे आवाहन करण्यात आले आहे.

शहरासह जिल्ह्यात मे गेल्या काही दिवसांपासून तापमान 40 अशांवर स्थिरावले होते. त्यामुळे तप्त उन्हाच्या तडाख्यापासुन नागरिकांना दिलासा मिळाला होता. परंतू दि. 19 मे पासून जिल्ह्याचे कमाल तापमान 45 अंशांपर्यंत पोहचेल, असा अंदाज हवामान खात्याने वर्तविला आहे. त्याची परिणती नागरिकांना आता अनुभवण्यास मिळत आहे. काल 41.6 अंश सेल्सिअस तापमानाची नोंद झाली. तर आज 42.6 अंश सेल्सिअस तापमानाची नोंद झाली आहे. त्यामुळे घराबाहेर पडतांना तप्त उन्हाच्या झळा बसत आहेत.

अंगावरील कपड्यांचाही उष्णतेमुळे चटका बसतो. तप्त झळामुळे अंग भाजून निघत आहे. उन्हाच्या तडाख्यामुळे पंखा, कुरलही गरम हवाच देत आहे. त्यामुळे घामाच्या धारा निघत आहेत. सायंकाळी आठ वाजेपर्यंत उकाडा जाणवत आहे. पुन्हा तापमान वाढल्याने नागरिक सकाळीच व्यवहार उरकून घेत आहे. दुपारी बारा वाजेनंतर रस्ते व चौकातील वाहतूक पूर्णपणे मंदावलेली दिसत आहे. बाहेर फिरतांना नागरिक तोंडाला व डोक्याला पूर्णपणे पांढरे रुमाल व गॉगल घालुनच बाहेर पडतांना दिसत आहे.

दुपारच्या वेळी तर शहरातील रस्त्यावर शुकशुकाट दिसत आहे. रस्ते तापल्याने रस्त्यावरुन चालतानाही वाफा लागत असल्याचे जाणवत आहे. दरम्यान हवामान तज्ज्ञांनी तापमान वाढीचा इशारा दिला असला तरी धुळेकरांनी 45 अंशांपर्यंतचे तापमान गेल्या महिन्यात अनुभवले आहे. आता पुन्हा तापमान 45 अंशांपर्यंत जाण्याची शक्यता आहे. त्यामुळे नागरिकांनी घरा बाहेर पडतांना विशेष काळजी घ्यावी,असे आवाहन करण्यात आले आहे.

शितपेयांना मागणी

तप्त उन्हामुळे अंगाची काहीली होत आहे. त्यामुळे थंड पाण्यासह शितपेयांना चांगलीच मागणी वाढली आहे. त्यात ताक, मठ्ठा, उसाचा रस, बर्फ गोला, लिंबु शरबत, ज्युस या शिय पेयांना मागणी वाढली आहे. शहरात ठिकठिकाणी शितपेयांची दुकानांवर चांगलीच गर्दी दिसून येत आहे.

अशी घ्या काळजी…

काय करावे

तहान लागलेली नसली तरी जास्तीत जास्त पाणी प्यावे, बाहेर जातांना गॉगल, छत्री, टोपी, बुट व चप्पलचा वापर करावा, प्रवास करतांना पाण्याची बॉटल सोबत घ्यावी, उन्हात काम करतांना टोपी किंवा छत्रीचा वापर करावा. तसेच ओल्या कपड्याने डोक, मान, चेहरा झाकावा, शरिरात पाण्याचे प्रमाण कमी होत असल्याने ओआरएस, घरी बनविण्यात आलेली लस्सी, तोरणी, लिंबू पाणी, ताक आदीचा वापर नियमित करावा, अशक्तपणा, स्थुलपणा, डोकुदखी, सतत येणारा घाम इत्यादी उन्हाचा चटका बसण्याची चिन्हे ओळखावीत व चक्कर येत असल्यास तात्काळ डॉकरांचा सल्ला घ्यावा, घर थंड ठेवण्यासाठी पदडे, शटर, सनशेडचा वापर करावा तसेच खिडक्या उघड्या ठेवण्यात याव्यात, पंखे, ओले कपडे यांचा वापर करण्यात यावा, थंड पाण्याने वेळोवेळी स्नान करावे,

काय करु नये

लहान मुले किंवा पाळीव प्राण्यांना बंद असलेल्या व पार्क केलेल्या वाहनात ठेवू नये, दुपारी 12 ते 3 या कालावधीत उन्हात जाण्याचे टाळावे व उन्हातून आल्यानंतर लगेच फ्रीजमधलं पाणी पिऊ नका. कडद, घट्ट, जाड कपडे घालण्याचे टाळावे, शारीरिक श्रमाचे कामे टाळावे, उन्हाच्या कालावधीत स्वयंपाक करण्याचे टाळण्यात यावे. तसेच मोकळ्या हवेसाठी स्वयंपाक घराचे दारे व खिडक्या उघड्या ठेवण्यात यावी, शरिरात पाण्याचे प्रमाण कमी करण्यास कारणीभूत असलेला चहा, कॉफी, मंद व कार्बोनेटेट थंड पेय याचा वापर करावा, मासे, मटण, तेलकट पदार्थ, शिळे अन्न खाणे टाळावे, असे आवाहन केले आहे.

Leave a Comment

Your email address will not be published. Required fields are marked *

*

error: Content is protected !!