Type to search

maharashtra धुळे

आत्महत्त्येच्या प्रयत्नानंतर अखेर मिळाले पीककर्ज!

Share
कापडणे । पीककर्ज मिळण्यासाठी हेलपाडे घालणार्‍या शेतकर्‍यास, तब्बल चार महिण्यापासुन येथील बँक ऑफ महाराष्ट्रतर्फे उडवाउडवीची उत्तरे मिळत होती. घायकुतीस येत संतप्त झालेल्या शेतकर्‍याने काल (दि.16) विष प्राशन करण्याचा प्रयत्न केला. सबंधित शेतकर्‍याने हा आत्महत्येचा संतप्त पवित्रा घेतल्याने बॅकेने काल सायंकाळीच पीककर्ज अदा केले. संतप्त झालेल्या शेतकर्‍याने हा पवित्रा घेतल्यानंतर सेम डे पीककर्ज देणे जर सहज शक्य होते तर चालवलेली ससेहोलपट कशासाठी असा माफक सवाल शेतकरी वर्गातुन विचारला जात आहे. या पार्श्वभूमीवर मनसेच्या वरिष्ठ पदाधिकार्‍यांनी आज(दि.17) येथील बॅक गाठत अधिकार्‍यांना कालच्या घटनेवरुन चांगलेच धारेवर धरले. पीककर्जासाठी आत्महत्येचा विचार मनात येईपर्यत बळीराजाची ससेहोलपट करण्याच्या या जिवघेण्या धोरणाची चौकशी करण्याची मागणी यावेळी करण्यात आली.

येथील शेतकरी हिंमत किसन माळी यांनी पीक कर्ज मिळावे म्हणून गेल्या जानेवारी महिन्यापासून आपल्या कागदपत्रांची फाईल बँकेत जमा केली होती. प्रत्येक आठवड्यास बँकेत हेलपाटे मारत असतांना प्रत्येक वेळेस उडवाउडवीची उत्तरे देऊन बँक अधिकारी माघारी फिरवतात, असा आरोप या शेतकर्‍याने करत काल(दि.16) आत्महत्येचा प्रयत्न केला. धुळे जिल्ह्यात गेल्या चार वर्षांपासून भीषण दुष्काळी परिस्थिती निर्माण झाल्याने शेतकरी वर्गापुढे जगावे की मरावे असा प्रश्न निर्माण झाला आहे. अशातच कापडणे गावात एकमेव राष्ट्रीयकृत बँक असल्याने शेतकर्‍यांची गळचेपी होणे ही बाब नेहमीचीच.

संबंधित शेतकरी हिंमत माळी व त्यांचा मुलगा भागवत हिंमत माळी हे बँकेत जाऊन आमचे कर्ज प्रकरण मंजूर झाले की नाही अशी विचारणा करत व बॅक अधिकारी प्रत्येक वेळेस काहीही सबब दाखवून त्यांना माघारी फिरवित ही बाब नेहमीचीच झाली होती.

पीक कर्ज मंजूर होत नाही म्हणून संतप्त झालेले शेतकरी हिंमत किसन माळी यांनी (दि.16) दुपारी साडे बारा वाजेला बॅक गाठत बँकेच्या अधिकार्‍यांना विचारणा केली. तुमचे प्रकरण मंजुरीसाठी वरती पाठविण्यात आले आहे, तुमचे कर्ज प्रकरण मंजूर करणे आमच्या हातात नाही आमचे अधिकार बँकेने काढून घेतले आहेत असे नेहमीप्रमाणे सांगण्यात आले. यावेळी संतप्त शेतकरी हिंमत किसन माळी यांनी खिशातुन आणलेली विषाची बाटली काढत बँक अधिकांर्‍यासमोरच विष पिण्याचा प्रयत्न केला. यावेळी उपस्थित काही तरुणांनी प्रसंगावधान राखत संबंधित शेतकर्‍याकडून विषाची बाटली हिसकावून घेतली व पुढील अनर्थ टळला. यावेळी हिंमत माळी यांनी रडत रडत आपली व्यथा मांडली.

हिंमत माळी यांच्याकडे मुंबई आग्रा महामार्गालगत शेती आहे. सततच्या दुष्काळी परिस्थितीमुळे शेतात काहीही पिकले नाही म्हणूनच पीक कर्ज काढायची वेळ आली. मात्र बँक अधिकारी गेल्या चार ते पाच महिन्यापासून फिरवत असल्याने व आर्थिक अडचणीत सापडलेले हिंमत माळी यांनी हे टोकाचे पाऊल उचलले होते. जर हे पीककर्ज मंजुर करणे सबंधित बॅक अधिकार्‍यांच्या हातात नव्हते तर या शेतकर्‍यांने हा गंभीर पवित्रा घेतल्यानंतर लागलीच पीककर्ज कसे अदा करता आले असा सवाल ग्रामस्थांतुन विचारला जात आहे. या घटनेच्या पार्श्वभूमीवर मनसेच्या वरिष्ठ पदाधिकार्‍यांनी आज(दि.17) येथील बॅक गाठत अधिकार्‍यांना कालच्या घटनेवरुन चांगलेच धारेवर धरले, यावेळी मनसेचे जिल्हाध्यक्ष अविनाश मोरे, मनसे शहर अध्यक्ष डॉ. मनीष जाखेटे, शिंदखेडा तालुका अध्यक्ष नंदू पाटील, बंटी सोनवणे आदी उपस्थित होते.

Tags:

You Might also Like

Leave a Comment

Your email address will not be published. Required fields are marked *

*

error: Content is protected !!