देवपूरात एकाचरात्री तीन ठिकाणी घरफोडी

धुळे – Dhule – प्रतिनिधी :

शहरासह जिल्ह्यात चोरट्यांनी धुमाकुळ घातला असून काल देवपूरात एकाच रात्री चोरट्यांनी तीन ठिकाणी घरफोडी केली.रोख रक्कमेसह दोन लाखांचा मुद्येमाल लंपास केला आहे.

याबरोबर तीन ठिकाणी एमटीएम देखील फोडल्याचे समोर आले आहे. एकाच दिवशी घडलेल्या या घटनांमुळे नागरिकांमध्ये भितीचे वातावरण निर्माण झाले आहे.

देवपूरातील गोंदुर रोडवरील बोरसे नगरजवळील बँक कॉलनीतील प्लॉट नं. 28 मध्ये जयंत विष्णु कुलकर्णी (वय 59) हे राहतात. त्यांच्या घर बंद असल्याची संधी साधत चोरट्यांनी घराचा कडीकोयंडा तोडून आत प्रवेश केला.

घरातून 2 हजार रूपये रोख, 36 हजार रूपये किंमतीची 12 ग्रॅमची सोनसाखळी, 8 हजारांची 6 ग्रॅमची सोन्याची अंगठी, 15 हजार रूपये किंमतीच्या चांदीच्या देवपुजेच्या वस्तु असा एकुण 71 हजारांचा ऐवज चोरून नेला.

तसेच चोरट्यांनी बिजली नगरातील प्लॉट नं. 16 कैलास सुरेश माळी यांच्याकडे घरफोडी केली. घरातून 67 हजार रूपये किंमतीचे सोन्याचे व चांदीचे दागिने चोरून नेले.

त्यानंतर चोरट्यांनी त्यांच्या घराच्या दुसर्‍या मजल्यावर राहणार्‍या अतूल संजय निकम यांच्या घरातून 70 हजारांची रोकड लंपास केली.

याप्रकरणी जयंत कुलकर्णी यांच्या फिर्यादीवरून अज्ञात चोरट्यांवर पश्चिम देवपूर पोलिसात गुन्हा दाखल करण्यात आला आहे. तपास उपनिरीक्षक एम.एच.सैय्यद करीत आहेत.