Type to search

धुळे

धुळ्यात बनावट पिस्तूल जप्त

Share

धुळे । शहरातील देवपूर परिसरात असलेल्या शनिमंदिर जवळील नाहटा कॉम्लेक्समधील बंद दुकानातून मतदारांना पैसे वाटप करण्यात येत होते. पैसे वाटणार्‍यांकडे सुमारे 30 ते 40 लाख रूपये होते. शिवाय त्यांच्या जवळ एक पिस्तुल सदृष्य वस्तू देखील सापडली आहे. हा प्रकार लोकसंग्रामचे उमेदवार अनिल गोटे यांनी उघडकीस आणला. पोलिसांना बोलाविल्यानंतर पैसे वाटप करणारे तरूण पोलिस आल्यानंतर पळून गेले, अशी माहिती उमेदवार अनिल गोटे यांनी दिली.

वस्तुस्थिती पोलिसांनी पाहिली आहे, त्यांनीच फिर्याद दाखल करावी, असेही गोटे यांनी सांगितले. दरम्यान, आचारसंहिता पथकाचे प्रमख सागर सोनवणे आणि त्यांच्या सहकार्‍यांनी ही कारवाई केल्याचे पोलिसांनी सांगितले.

शहरात विधानसभेसाठी मतदान होत असतांना देवपुरातील शनिनगर जवळ असलेल्या नहाटा मेडीकल मधून मतदारांना पैसे वाटप केले जात असल्याची माहिती उमेदवार अनिल गोटे यांना मिळाली. काही कार्यकर्त्यांना घेऊन अनिल गोटे नहाटा मेडीकलवर पोहचले. याबाबत अनिल गोटे यांनी सांगितले की, मेडीकल मध्ये सागर कांबळे, महेश मुणोत, चंद्रकांत महाजन यांच्यासह सुमारे दहा ते बारा तरूण होते. त्यांच्या जवळ 30 ते 40 लाख रूपये होते. माझ्यासोबत कार्यकर्ते पाहिल्यानंतर पैसे वाटप करणारे तरूण सैरभैर पळत सुटले. त्यावेळी रस्त्यावरून चालणार्‍या काही महिलांना त्यांनी पायदळी तुडविले आहे. त्या महिला गंभीर जखमी झाल्या आहेत. त्यातील एका महिलेची प्रकृती गंभीर आहे.

पोलिसांनी तेथून पैसे आणि पिस्तुल सदृष्य वस्तु ताब्यात घेतली आहे. त्या तरूणांच्या विरोधात पोलिसांनीच गुन्हा नोंदवून कारवाई केली पाहिजे, अशी मागणीही अनिल गोटे यांनी केली आहे. दरम्यान, या प्रकरणी देवपूर पोलिसांनी सांगितले की, पोलिस उपअधीक्षक सचिन हिरे यांना ही माहिती मिळाली होती. त्याच्या सुचनेनुसार आचारसंहिता पथकाने ही कारवाई केली आहे. त्यात पन्नास हजार रूपये आणि पिस्तुल सदृष्य वस्तु सापडली आहे. या प्रकरणी कुणालाही अटक करण्यात आलेली नाही, असेही पोलिसांनी सांगितले.

Tags:

You Might also Like

Leave a Comment

Your email address will not be published. Required fields are marked *

*

error: Content is protected !!