मुंबई | प्रतिनिधी
रिलायन्स रिटेलमध्ये गुंतवणूकदारांची संख्या दिवसेंदिवस वाढत चालली आहे. नुकतेच दुबईच्या पीआयएफ कंपनीने रिलायन्स इंडस्ट्रीजची सहाय्यक कंपनी रिलायन्स रिटेल व्हेंचर लिमिटेड (आरआरव्हीएल) मध्ये 2.04% इक्विटीसाठी 9,555 कोटी रुपयांच्या गुंतवणूकीची घोषणा केली.
या रिलायन्स रिटेलच्या प्री-मनी इक्विटीचे मूल्य या करारात 4.587 लाख कोटी रुपये आहे. प्री-मनी इक्विटी मागील गुंतवणूकीपेक्षा सुमारे 30 हजार कोटी अधिक आहे.
रिलायन्स रिटेलमध्ये गुंतवणूकीची प्रक्रिया 9 सप्टेंबरपासून सिल्व्हर लेकपासून सुरू झाली, त्यानंतर केकेआर, जनरल अँटालॅंटिक, मुबाडला, जीआयसी, टीपीजी आणि एडीआयए या जागतिक गुंतवणूक निधीची गुंतवणूक झाली आहे.
पीआयएफ कराराव्यतिरिक्त, रिलायन्स रिटेलमध्ये 10% पेक्षा अधिक इक्विटीसाठी 9 गुंतवणूकीद्वारे आतापर्यंत 47,265 हजार कोटींपेक्षा जास्त गुंतवणूक झाली आहे.
रिलायन्स इंडस्ट्रीजचे अध्यक्ष व व्यवस्थापकीय संचालक मुकेश अंबानी यांनी या कराराबाबत आनंद व्यक्त करताना म्हटले आहे की, सौदी अरेबियाबरोबर आमचे दीर्घकाळचे संबंध आहेत. पीआयएफ सौदी अरेबियाच्या आर्थिक विकासात महत्त्वपूर्ण भूमिका बजावत आहे. रिलायन्स रिटेलमधील मी एक महत्त्वाचा भागीदार म्हणून पीआयएफचे स्वागत करतो.
130 कोटी भारतीयांचे आणि लाखो लहान व्यापाऱ्यांचे जीवन समृद्ध करण्यासाठी आणि रिटेल क्षेत्रामध्ये बदल घडवून आणण्याच्या महत्वाकांक्षी योजनेसाठी पीआयएफच्या सतत पाठिंब्याची अपेक्षा व्यक्त करत असल्याचे अंबानी म्हणाले.
रिलायन्स रिटेल लिमिटेडचे देशभरात पसरलेल्या 12 हजाराहून अधिक स्टोअरमध्ये वर्षाकाठी 64 कोटी खरेदीदार आहेत. हा भारतातील सर्वात मोठा आणि वेगवान वाढणारा रिटेल व्यवसाय आहे. किरकोळ जागतिक आणि देशांतर्गत कंपन्या, लघुउद्योग, किरकोळ व्यापारी आणि शेतकरी स्वस्त दरात ग्राहकांची सेवा देण्यासाठी आणि कोट्यावधी रोजगार निर्मितीसाठी ही कंपनी विकसित करण्याचा प्रयत्न करीत असल्याचे कंपनीकडून सांगण्यात आले आहे.
रिलायन्स रिटेलने आपल्या नवीन वाणिज्य धोरणाचा भाग म्हणून छोट्या आणि असंघटित व्यापा-यां चे डिजीटलीकरण करणे सुरू केले आहे. या नेटवर्कशी 2 कोटी व्यापाऱ्यांना जोडण्याचे कंपनीचे उद्दीष्ट आहे. हे नेटवर्क व्यापाऱ्यांना चांगल्या तंत्रज्ञानासह ग्राहकांना चांगल्या किंमतीवर सेवा देण्यास सक्षम करेल असा विश्वास कंपनीकडून व्यक्त करण्यात आला आहे.
