स्वप्नांमागील संकेत

स्वप्नांमागील संकेत

Bhavishyavedh

आपण झोपल्यानंतर अनेक गोष्टी आपल्याला स्वप्नात दिसतात. काही स्वप्नांमुळे आपण सुखावून जातो, तर काही स्वप्ने आपल्याला चिंतेत टाकणारी असतात. अनेकदा झोप मोड झाली की, आपण स्वप्नात काय पाहत होतो, याचे आपल्याला विस्मरण होते. तर काही स्वप्न कायम लक्षात राहणारी असतात. आपल्याला स्वप्नात काय दिसेल, याचा काही नेम नसतो आणि ते आपल्या हातातही नसते. काही स्वप्नांमुळे भीती वाटते. तर, काही वेळा स्वप्नात दिसणार्‍या गोष्टींमागे काहीतरी विशिष्ट संकेत असल्याचे मानले जाते. अनेक पुराण कथांमध्ये भगवंताने भक्ताला स्वप्नात दृष्टांत दिल्याच्या कथा आपण वाचतो. त्यामुळे आपण स्वप्नात नेमके काय पाहिले, यालाही महत्त्व प्राप्त होते. काही वेळा आपल्या स्वप्नात जंगल, प्राणी दिसतात. काही वेळा आपण उंचावरून खाली पडतोय, असा भास होतो. स्वप्नात जंगल सफारी, हिंस्र प्राणी दिसणे, यामागे नेमके काय संकेत असतात, यावरून आपण काय अंदाज लावावेत, जाणून घेऊया......

जंगल सफारीचे स्वप्न - एखादी गोष्ट आपण ठरवली, तरी ती आपण स्वप्नात पाहू शकत नाही. तर अनेकदा आपल्या दिवसभरातील घटनांचा, मनातील मागोवा स्वप्नात दिसत असतो. समुद्रशास्त्रानुसार, स्वप्नात जंगली प्राणी दिसणे, आपल्यातील उग्र आणि रागीट स्वभाव दर्शवतो. जंगली प्राणी स्वप्नात दिसल्यास एखाद्या गोष्टीचा आपल्याला प्रचंड राग आला आहे, असा संकेत यातून मिळू शकतो. याचाच दुसरा अर्थ एखाद्या गोष्टीमुळे आपल्या पदरी निराशा पडण्याची शक्यता आहे किंवा वास्तविक जगात एखाद्या गोष्टीमुळे/घटनेमुळे आपण घाबरून गेलो आहोत, असाही संकेत यातून मिळू शकतो.

प्राण्याची शिकार - काही स्वप्नं रंजक असतात, तर काही स्वप्नांमुळे आपण घाबरून जातो. वास्तविक जीवनात त्या घटना घडणार नाहीत ना, याचा विचार आपण करत बसतो. मात्र, आपण स्वप्नात एका जंगली प्राण्याची, हिंस्र प्राण्याची शिकार होत असताना दिसत असल्यास आपल्या मनातील लालसा दिवसेंदिवस वाढत चालली आहे, असा त्यामागील संकेत असू शकतो. ज्या गोष्टीची लालसा मनात आहे, ती गोष्ट तितक्या प्रकर्षाने आपणास हवीच असते, असेही नाही, असे सांगितले जाते. याचाच दुसरा अर्थ व्यवसाय, समाजातील व्यक्तींशी आपण खोटे बोलत आहात, असा होऊ शकतो. आपला मित्रांशी वाद होण्याचा संकेतही यातून मिळतो, असे शास्त्र सांगते.

जंगली प्राण्याचा हल्ला -एखाद्या जंगली प्राण्याने आपल्यावर हल्ला केला आहे, असे स्वप्न पडले, तर नजीकच्या काळात आपल्याला एखाद्या मोठ्या समस्येला तोंड द्यावे लागू शकते, असा संकेत यातून मिळतो. याचा दुसरा अर्थ म्हणजे आपल्याला भेडसावणार्‍या एखाद्या समस्येचा प्रभाव आपल्या कौटुंबिक जीव आणि व्यवसायावर पडत आहे, असे मानले जाते. याशिवाय आपल्या कुटुंबातील अथवा जवळील व्यक्ती आपल्याला फसवू शकते, असा संकेतही यातून निघू शकतो, असे शास्त्र सांगते.

स्वप्नात झेब्रा दिसला - आपणास स्वप्नात झेब्रा दिसला, तर आपण आनंदी व्हायला हवे. स्वप्नात झेब्रा दिसणे, हा शुभ संकेत मानला गेला आहे. याचा अर्थ आपल्याला खासगी जीवनात किंवा व्यवसायात लवकरच शुभ वार्ता मिळणार असल्याचा हा संकेत असू शकतो. या शुभ वार्तेमुळे आपल्याला मोठा लाभ मिळण्याची शक्यता असू शकते. काही नवीन माणसे जोडली जावीत आणि त्यामुळे आपला उत्साह, आनंद द्विगुणीत होऊ शकतो, असेही सांगितले जाते.

स्वप्नात सिंह दिसणे - आपल्याला स्वप्नात सिंह दिसल्यास घाबरून जाण्याचे कारण नाही. झेब्र्यप्रमाणे स्वप्नात सिंह दिसणे, शुभ मानले गेले आहे. याचा अर्थ आपल्याला आपल्या कामांमध्ये उत्तम यश मिळणार आहे. अनेक दिवसांपासून प्रलंबित असलेली कामे पूर्णत्वास जाणार आहेत. सरकारी कामे सुरळीत पार पडतील. न्यायालयीन खटल्यात आपला विजय होईल, असा यामागील संकेत असू शकतो. स्वप्नात सिंह आणि सिंहीण जोडीने दिसल्यास दाम्पत्य जीवनात सुख, समाधान येणार असल्याचे सांगितले जाते.

गज दर्शन - स्वप्नात हिंस्र प्राणी दिसल्यास घाबरून जाण्याचे काही कारण नाही. मात्र, यातून निश्चित काहीतरी संकेत मिळत असतात. स्वप्नात हत्ती दिसणे शुभ मानले गेले आहे. काही ज्योतिषांच्या म्हणण्याप्रमाणे स्वप्नात गज दर्शन होणे, याचा अर्थ लवकरच आपल्याला मोठी धनप्राप्ती होणार आहे. गज हे लक्ष्मीचे प्रतीक मानले जाते. स्वप्नात गज दर्शन होणे म्हणजे लक्ष्मी देवीची आपल्यावर कृपा असून, आपल्याला मोठ्या प्रमाणात पैसा मिळू शकतो, असा त्यामागील संकेत असल्याचे सांगण्यात येते.

Related Stories

No stories found.