भंडारदरा, कोतुळ |वार्ताहर| Bhandardara
उत्तर नगर जिल्ह्याची जिवनदायिनी असलेल्या भंडारदरा आणि मुळा धरणाच्या पाणलोटात काल शुक्रवारी सायंकाळपासून पावसाने जोर धरला असल्याने शेतकर्‍यांना हायसे वाटले आहे. दरम्यान, या पावसामुळे भंडारदरा पाणलोटातील धबधबे सक्रिय झाले असून ओढे नाले खळखळू लागले आहेत. त्यामुळे आज धरणात नवीन पाण्याची आवक सुरू होणार आहे.
तसेच हरिश्चंद्र गड, आंबित मध्येही गुरूवारच्या तुलनेत शुक्रवारी सायंकाळपासून सरींनी जोर धरल्याने मुळा नदीतील विसर्ग वाढल्याने 600 दलघफू क्षमतेचे पिंपळगाव खांड धरण रात्री निम्मे भरले आहे. यापूर्वी आंबित धरण ओव्हरफ्लो झाले आहे.
या दोन्ही धरणाच्या पाणलोटात मान्सून सक्रिय झाल्यानंतर पावसाचा जोर नसल्याने पाणलोटासह लाभक्षेत्रात काहीसे काळजीचे वातावरण होते. पण आता पावसाने जोर धरल्याने शेतीकामांनी वेग घेतला आहे. भंडारदरासह पाणलोटात काल सकाळपासून रिपरिप सुरू होती. या पावसाची नोंद 5 मिमी गझाली. सायंकाळनंतर पावसाने जोर धरल्याने पाणलोटातील डोंगरदर्‍यांमधील धबधबे सक्रिय होऊ लागल्याने ओढे नाले खळखळू लागले आहे.
काल सकाळी संपलेल्या 24 तासांत पडलेला पाऊस (मिमी)- भंडारदरा 18, घाटघर 21, पांजरे 21, रतनवाडी 18, वाकी 17. काल सायंकाळी भंडारदरातील पाणीसाठा 5198 दलघफू होता. विद्युत गृह क्रमांक 1 मधून 840 क्युसेकने विसर्ग सुरू आहे.
