बेलापूर |वार्ताहर| Belapur
भारतीय स्वातंत्र्याचा अमृत महोत्सव आणि बेलापूर बुद्रुक ग्रामपंचायतीचा शताब्दी महोत्सव धुमधडाक्यात साजरा करणार्‍या ग्रामपंचायतीची ग्रामसभा पुरेशी गणसंख्या नसल्याने तहकुब करावी लागली. नियमाप्रमाणे पुरेसा अवधी देऊन जनजागृती करुन ही सभा घेण्याची मागणी विरोधी गटाने केली आहे.
विरोधी सदस्य माजी सरपंच भरत साळुंके, माजी उपसरपंच रवींद्र खटोड, माजी सदस्य व बेलापूर सेवा संस्थेचे चेअरमन सुधीर नवले, ऐनतपूर सहकारी सोसायटीचे चेअरमन चंद्रकांत नाईक यांनी पंचायतीच्या प्रशासन व कार्यपद्धतीवर आक्षेप घेतला. ग्रामपंचायतीच्या कारभारावर ग्रामस्थांनी प्रश्न विचारु नयेत तसेच आपल्या समस्या मांडू नयेत, यासाठी जनजागृतीची जाणीवपूर्वक टाळाटाळ करुन सभा बोलावण्यात आल्याने सभेला पुरेशी उपस्थिती नसल्याचा आरोप त्यांनी केला.
पुढील तहकुब सभा वाड्या वस्त्यांवर लाऊस्पिकर फिरविणे, फलकांवर जाहिरात करणे, सात दिवस अगोदर पदाधिकार्‍यांना अजेंडा पाठवून नंतरच घेण्यात यावी, अशी मागणी भरत साळुंके, रवींद्र खटोड, सुधीर नवले व चंद्रकांत नाईक यांनी केली आहे.
