राज्यात वाहनांच्या तपासणीसाठी विशेष मोहीम

0

योग्य कार्यवाही न झाल्यास प्रादेशिक परिवहन कार्यालय प्रमुखांवर शिस्तभंगाची कारवाई

अहमदनगर (प्रतिनिधी)- योग्यता प्रमाणपत्रासाठी आलेल्या वाहनांची काटेकोटपणे तपासणी होत नसल्याचे निदर्शनास आल्याने परिवहन विभागाने कडक पावले उचलण्याचा निर्णय घेतला आहे. 8 ते 23 ऑक्टोबर या कालावधीत योग्यता प्रमाणपत्र नसलेली तसेच योग्यता प्रमाणपत्र असूनही रस्त्यावर चालण्यास धोकादायक वाहनांची राज्यभर तपासणी केली जाणार आहे. तसेच याबाबत योग्यप्रकारे कार्यवाही न झाल्यास संबंधित प्रादेशिक परिवहन कार्यालय प्रमुखांवर शिस्तभंगाच्या कारवाईचा इशारा देण्यात आला आहे.

प्रादेशिक व उपप्रादेशिक परिवहन कार्यालयांकडून वाहनांची तपासणी करून ठराविक कालावधीसाठी योग्यता प्रमाणपत्र दिले जाते. पण ही तपासणी काटेकोरपणे न केल्याचे आढळून आल्याने 37 वाहन निरीक्षकांना सेवेतून निलंबित करण्याचा निर्णय शासनाने शुक्रवारी घेतला. त्याचबरोबर उच्च न्यायालयाने यासंदभार्तील एका जनहित याचिकेमध्ये योग्यता प्रमाणपत्र नसलेल्या वाहनांवर परिवहन विभागामार्फत सध्या करण्यात येत असलेल्या कारवाईबाबत 7 सप्टेंबर रोजीच्या आदेशात असमाधान व्यक्त केले आहे. यापार्श्वभूमीवर परिवहन विभागाने वाहनांची विशेष तपासणी मोहीम राबविण्याचा निर्णय घेतला आहे. त्यानुसार राज्यात 8 ते 23 ऑक्टोबरदरम्यान ही मोहीम राबविली जाईल. या मोहिमेमध्ये वाहनास वैध योग्यता प्रमाणपत्र असूनही वाहन सदोष आहे, असे आढळल्यास या वाहनाचे प्रमाणपत्र निलंबित केले जाईल.

योग्यता प्रमाणपत्र नसलेली वाहने जवळच्या दुरूस्ती केंद्रांमध्ये अटकावून ठेवली जातील. ही वाहने रस्त्यावर चालण्यासाठी योग्य करून संबंधित वाहन मालकाने अधिकाजयांसमोर सादर करावी लागतील. त्यानंतर तपासणी करून वाहनांच्या योग्यता प्रमाणपत्राचे नुतणीकरण केले जाईल. क्षेत्रीय कार्यालयांमधील वायुवेग पथकांनी परिवहन संवगार्तील वाहनांच्या तपासणीमध्ये योग्यता प्रमाणपत्र नसणे अथवा योग्यता प्रमाणपत्र असूनही वाहन रस्त्यावर चालण्यास धोकादायक असणे याबाबत कार्यवाही करण्याबाबत आदेश देण्यात आले आहेत. या सुचनांची योग्यप्रकारे कार्यवाही न झाल्यास कार्यालयप्रमुख शिस्तभंगाच्या कारवाईस पात्र राहतील, असेही शासन आदेशात स्पष्ट करण्यात आले आहे.

 

महाराष्ट्रासह आठ राज्यांना वादळाचा धोका

0
अहमदनगर (प्रतिनिधी) – देशातील अनेक राज्यांमध्ये डेई वादळाने धडक दिली आहे. या वादळाचा सर्वाधिक फटका देशातील महाराष्ट्रासह आठ राज्यांना बसणार असून या राज्यांमध्ये रेड अ‍ॅलर्ट जारी करण्यात आला आहे. केंद्रीय हवामान विभागाने हा इशारा दिला आहे. ओडिशामध्ये हाहाकार माजविल्यानंतर डेई वादळाने देशातील अर्ध्याअधिक राज्यांमध्ये धडक दिली आहे. त्यामुळे हवामानात बदल झाला असून अतिवृष्टी होणार असल्याने देशातील आठ राज्यांमध्ये अ‍ॅलर्ट जारी करण्यात आला आहे.

वादळामुळे दिल्लीतील वातावरणही बदलून गेले असून जोरदार पाऊस झाला. शिवाय सिमल्यापासून हैदराबादपर्यंत अनेक शहरांमध्ये पावसाने जोरदार हजेरी लावल्याने येथील नागरिकांची तारांबळ उडाली. डेईमुळे दिल्ली, पश्चिम बंगाल, छत्तीसगड, आंध्रप्रदेश, मध्यप्रदेश आणि महाराष्ट्रात जोरदार पाऊस झाला. आज पुन्हा महाराष्ट्रासह ओडिशा, तेलंगणा, झारखंड, छत्तीसगड, मध्यप्रदेश आणि कर्नाटकमध्ये मुसळधार पाऊस होण्याची शक्यता हवामान खात्याने वर्तवली आहे.

दरम्यान, नगर जिल्ह्यात पावसाची प्रतिक्षा असून गेल्या आठवड्यात जिल्ह्याच्या काही भागात पाऊस झाला आहे. मात्र, रब्बीच्या पेरण्यासाठी अजून दमदार पावसाची अपेक्षा असून शेतकर्‍यांच्या नजरा पावसाकडे लागल्या आहेत. परतीच्या पावसाने पाठ फिरविल्यास जिल्ह्यात दुष्काळाची परिस्थिती निर्माण होणार आहे.

नगरमधील मानाच्या मंडळांचा विसर्जन मिरवणुकीवर बहिष्कार

0

डीजे बंदी : पोलिसांनी मात्र कसली कंबर

अहमदनगर (प्रतिनिधी) – जिल्ह्यातील सार्वजनिक गणेश विसर्जन मिरवणूक डीजेमुक्त व्हावी, यासाठी पोलीस अधीक्षकांनी जिल्हाभर कंबर कसली आहे. नगर शहरात डीजे सिस्टम येऊ नयेत, यासाठी शहराकडे येणार्‍या रस्त्यांवर शनिवारी नाकाबंदी करण्यात आली. मात्र डीजेसाठी आग्रह धरणार्‍या नगर शहरातील मानाच्या मंडळांनी बहिष्काराचे अस्त्र उपसले आहे. प्रशासनावर दडपशाहीचा आरोप करून 14 मानाच्या मंडळांचे गणपती विसर्जनासाठी बाहेर काढणार नाहीत, असे मंडळ पदाधिकार्‍यांनी उशिरा रात्री जाहीर केले. आहे. त्यामुळे विसर्जन मिरवणूकीवर प्रश्‍नचिन्ह लागले आहे.

पोलीस अधीक्षकांनी शहरातील डीजेला प्रतिबंध करण्यासाठी स्थानिक गुन्हे शाखेच्या पोलीस निरीक्षकांच्या नेतृत्वाखाली 20 पोलीस कर्मचार्‍यांचे पथकच नेमले आहे. हे पथक शहरात डीजेंवर लक्ष ठेवून आहे. या पथकाला डीजे सिस्टम दिसल्यास थेट जप्त करण्याचे आदेश पोलीस अधीक्षकांनी दिले आहेत. दरम्यान, शिवसेनेसह शहरातील काही गणेश मंडळाच्या पदाधिकार्‍यांनी विर्सजन मिरवणुकीत डीजे वाजविणारच, अशी भूमिका घेतली होती. उच्च न्यायालयाने घालून दिलेल्या निकषांनुसार डीजे वाजविण्यास परवानगी द्यावी, अशी शिवसेनेचे शहरप्रमुख दिलीप सातपुते यांनी केली.

तर नगरमधील संभाजी कदम, अविनाश घुले, संजय घुले, ओंकार गिरवले, बाळासाहेब बोराटे डीजे वाजविण्यास परवानगी मिळावी, यासाठी रात्री उशीरापर्यंत कोतवाली पोलीस ठाण्यात ठाण मांडून होते. उशिरा रात्रीपर्यंत सन्मानजनक तोडगा निघाला नाही. विसर्जन मिरवणूकीत 75 डेसिबल आवाजात डिजे वाजवू द्यावा, अशी मंडळ पदाधिकार्‍यांची मागणी होती. प्रशासन आपल्या भुमिकेवर ठाम राहील्याने अखेर मानाच्या 14 मंडळांनी अखेर विसर्जन मिरवणूकीत सहभागी न होण्याचे जाहीर केले. विशाल गणपतीचा यात समावेश नाही. यावेळी मंडळ पदाधिकार्‍यांनी शासनाच्या या निर्णयामुळे आर्थिक नुकसान झाल्याचाही आरोप केला. रविवारी विसर्जनासाठी श्रींची मूर्ती मंडपाबाहेर काढायची नाही, असा निर्णय या मंडळांनी घेतला आहे. दरम्यान, मानाच्या मंडळांच्या या निर्णयाला शिवसेनेने पाठींबा दिला आहे. त्यामुळे रविवारी मिरवणूकीवर काय घडणार, याकडे नगरकरांचे लक्ष लागून आहे.

दरम्यान, बाप्पांना निरोप देण्यासाठी संपूर्ण जिल्हा सज्ज झाला आहे. जिल्ह्यात 3 हजार 296 सार्वजनिक गणेश मंडळे आहेत. त्यात 168 खाजगी गणेश मंडळे आहेत. यात 2 हजार 831 गणेश मंडळे विसर्जन मिरवणुकीत सहभागी होणार आहे. उच्च न्यायालयाने यावर्षी विसर्जन मिरवणुकीत डीजे वाजविण्यास बंदीच घातली आहे. याची सर्व जबाबदारी पोलीस अधीक्षक आणि जिल्हाधिकारी यांच्यावर सोपविण्यात आली आहे. उच्च न्यायालयाच्या या आदेशामुळे गणेश मंडळांमध्ये चांगलेच पडसाद उमटले आहेत. काहींनी या आदेशावर नाराजी व्यक्त केली आहे. परंतु प्रशासकीय पातळीवर या आदेशांची चोख अंमलबजावणी व्हावी, यासाठी जिल्हा पोलीस अधीक्षक रंजनकुमार शर्मा यांनी कंबर कसली आहे. जिल्ह्यातील सर्व पोलीस ठाण्यांना डीजेमुक्त मिरवणुकींसाठी आदेश पोलीस अधीक्षक कार्यालयाने सायंकाळी उशिरा काढले होते.

शहरात नाकाबंदी
शहरातील काही गणेश मंडळे बाहेरून डीजे सिस्टम आणतात. त्यांना बाहेरच रोखण्यासाठी शहराकडे येणार्‍या सातही रस्त्यांवर पोलिसांनी नाका बंदी लावली होती. पोलीस अधिकारी, दोन कर्मचारी आणि पाच गृहरक्षक दलाच्या जवानांचा यात समावेश आहे. शहरात डीजे शोधण्यासाठी पोलीस अधीक्षकांचे पथक कार्यरत आहे. स्थानिक गुन्हे शाखेचे पोलीस निरीक्षक यांच्या नेतृत्वाखाली 20 कर्मचार्‍यांचे हे पथक आहे. यावर्षी मंडळांनी पदाधिकारी बदलून परवानगी घेतली आहे. त्यावर देखील पोलिसांचे लक्ष आहे.

चौकीतून नियोजन
विसर्जन मार्गवर पोलिस प्रशासाने 167 सीसीटिव्ही बसविले आहे. तसेच विसर्जनाची पहाणी करण्यासाठी 3 ड्रेन कॅमेरे देखील ठेवण्यात आले होते. सीसीटिव्हीचे सर्व फुटेज चितळे रोड येथील पोलिस चौकी व एसपी ऑफिसच्या कन्ट्रोल रूमला लिंक असणार आहे. तेथे बसल्या जागी मिरवणुकीची हालचाल टिपली जाणार आहेे. विसर्जन मिरवणूक मार्गावर मोठा पोलिस बंदोबस्त असणार आहे.

पोलीसांचा तगडा बंदोबस्त
मिरवणुकीत 3 आयपीस दर्जाचे अधिकारी, 4 पोलीस उपअधिक्षक, 57 पोलीस निरिक्षक आणि सहाय्यक पोलीस निरिक्षक, दीड हजार पोलीस कर्मचारी, यासह एसआरपी, आरसीपी, दंगलनियंत्रण पथक, स्ट्रायकिंग फोर्सची प्रत्येक एक तुकडी, 1 हजार स्वयंसेवक, 290 होमगार्ड, डीजे प्रतिबंधक स्कॉड तैनात करण्यात आला आहे.

मानाचे गणपती मंडळ
संगम तरूण मंडळ, माळीवाडा तरूण मंडळ, आदिनाथ तरूण मंडळ, दोस्ती तरूण मंडळ, नवजवान तरूण मंडळ, महालक्ष्मी तरूण मंडळ, कपिलेश्‍वर तरूण मंडळ, नवरत्न तरूण मंडळ, समझोता तरूण मंडळ, शिवशंकर तरूण मंडळ, आनंद तरूण मंडळ, शिवसेना मंडळ, दोस्ती तरूण मंडळ अशी 14 मंडळे विसर्जन मिरवणूकीत सहभागी होणार नाहीत.

शाकाहार दिनानिमित्त 1 ऑक्टोंबरला सामाजिक रॅली

0
जळगाव । जागतिक शाकाहार दिन 1 ऑक्टोंबर रोजी म्हणून पाळला जात असतो. या दिनानिमीत्त सर्व समाजाला एकत्र घेवून शाकाहाराबाबत जनजागृती करण्यासाठी सामुहिक रॅली व सभेचे आयोजन करण्याचा निर्णय श्री. जैन युवा फाऊंडेशनच्या बैठकीत घेण्यात आला.

शहरातील सागर भवन येथे आर. सी. बाफना ज्वेलर्सचे संचालक आर. सी. बाफना यांच्या अध्यक्षतेखाली बैठकीचे आयोजन करण्यात आले होते. यावेळी प्रमुख पाहुणे म्हणून कस्तूरचंद बाफना, कंवरलाल संघवी, अनिल देसर्डा, दिलीप गांधी, भवानी मंदिर संस्थानचे पुजारी महेश त्रिपाठी, यजुर्वेंद्र महाजन उपस्थित होते.

यावेळी बैठकीत मान्यवरांनी आपले मनोगत व्यक्त करुन जागतिक शाकाहार दिनामित्त आयोजीत करण्यात आलेल्या रॅलीबाबत आपली भुमिका मांडली. रॅलीला शिवतीर्थ मैदानापासून सुरुवात होणार आहे. त्यानंतर रॅली चित्राचौक, टॉवर चौक, नेहरु चौकामार्गे खान्देश सेंट्रलमॉल समारोप होवून त्याठिकाणी सभेचे आयोजन करण्यात आले आहे.

रॅलीमध्ये शाकाहार एक्सप्रेस, पोस्टर यासह सजीव आरासच्या माध्यमातून जनजागृती करण्याचा निर्णय बैठकीत घेण्यात आला. तसेच या रॅलीत शहरातील शाळांमधील विद्यार्थी देखील सहभागी होणार असून सर्व समाजातील नागरिकांनी सहभागी होण्याचे आवाहन आयोजकांतर्फे करण्यात आले आहे. बैठकीला रोटरी कल्बचे सदस्य व पदाधिकारी यांच्यासह सर्व समाजातील मान्यवर मोठ्या संख्येने उपस्थित होते.

जळगावात गणरायाच्या विसर्जनासाठी प्रशासन सज्ज!

0
जळगाव । अनंत चतुर्दशीच्या दिवशी होणार्‍या गणेश मूर्ती विसर्जनानिमित्त महापालिका प्रशासनाची तयारी पूर्ण झाली आहे. शहरातील मेहरुण तलावावर विसर्जनाची व्यवस्था करण्यात आली असून महानगरपालिकेतर्फे तलावावर बॅरीगेटस, बोट, तराफे, लाईटस्, क्रेनची व्यवस्था करण्यात आली आहे. तसेच सुरक्षेच्या दृष्टीने विसर्जन मार्गावर तगडा पोलीसबंदोबस्त देखील तैनात करण्यात येणार आहे.

लाडक्या गणरायाला निरोप देण्यासाठी सार्वजनिक मंडळे सज्ज झाली असून प्रशासकीय यंत्रणेकडून देखील विसर्जनाची व्यवस्था करण्यात आली आहे. मेहरुण तलावावरील गणेश घाटा

वर 5 फुटापर्यंत मुर्तीचे विसर्जन तर 5 फुट पेक्षा उंच असलेल्या मूर्तींचे सेंट टेरेसा स्कुलच्या मागील बाजूने व्यवस्था करण्यात आली आहे. मोठ्या मुर्त्यांचे विसर्जन करण्यासाठी तलावात 15 फुट खोल 50 फुट रुंदीचा खड्डा खोदण्यात आला आहे. तसेच तलाव काठावर भराव टाकून सपाटीकरण करण्यात आले. वाहनतळासह भाविकांच्या गर्दीचे सुनियंत्रण करण्यासाठी तलाव परिसरात बॅरीकेटींग करण्यात आली आहेत. विसर्जन मिरणुकीचे आपतक वाहिनीवर लाईव्ह प्रक्षेपण करण्यात येणार आहे.

विसर्जन मार्गावर रांगोळीच्या पायघड्या
सालाबादाप्रमाणे यंदाही विसर्जन मिरवणुकीच्या मार्गावर श्रीराम रांगोळी गृपतर्फे रांगोळी, गुलालाच्या पायघडया व मार्गात येणार्‍या चौकात सप्तरंगी रांगोळी काढण्यात येणार आहे. विसर्जन मार्गावर रांगोळी काढण्यासाठी श्रीराम गृपच्या 50 ते 60 कलावंत रांगोळी रेखाटणार असून सकाळी 6 ते 11 वाजेपर्यंत नेहरु चौकापासून शनिपेठ पोलीस चौकी पर्यंत विसर्जन मार्गावर रांगोळी काढण्यात येणार असल्याचे कुमुद नारखेडे यांनी कळविले आहे.

निर्माल्य संकलनासाठी व्यवस्था
मेहरुण तलाव परिसरात निर्माल्य संकलनासाठी मनपा प्रशासनातर्फे 8 मोठ्या नविन कचरा कुंड्या आणि 8 निर्माल्य कलश ठेवण्यात आले आहेत. त्यामुळे भाविकांनी पुजेचे साहित्य तलावात न टाकता कुंड्यांमध्ये टाकून प्रदुषणमुक्त विसर्जनासाठी सहकार्य करण्याचे आवाहन प्रशासनातर्फे करण्यात आले आहे.

मेहरुण तलावावर लखलखाट
मेहरुण तलावावर रात्रीच्या वेळेस भाविकांना गणरायाचे विसर्जन करणे सोयीचे होण्याच्या दृष्टीने 4 विद्युत मनोरे तर 4 हायमास्ट लाईट बसविण्यात आले आहेत. तीन फेजचे असलेले मोठे दोन जनरेटर ठेवण्यात आले आहे. कोर्ट चौक ते मेहरुण तलावापर्यंत जवळपास 200 लाईट लावण्यात आले आहे. तसेच 500 मीटर रेंजचे सर्च लाईट, 2 आपत्कालीन बलुन लाईटची व्यवस्था करण्यात आली आहे. यासाठी विद्युत विभागातील कर्मचारी आणि पाच अभियंते कार्यरत आहेत.

पाच हजार पोलिसांचा ताफा सज्ज
गणेश विसर्जन मिरवणुकीसाठी इतर जिल्ह्यातून पोलिसांची कुमक दाखल झाली असून जवळपास 5 हजार पोलिसांचा विसर्जन मिरवणुकीसाठी ताफा सज्ज झाला आहे. गणेश विसर्जन मिरवणुकीवर नजर ठेवण्यासाठी सीआयडीचे 5 अधिकारी जळगावात दाखल झाले आहे. पोलिस अधिक्षक-1, अप्पर पोलिस अधिक्षक -2, उपविभागीय पोलिस अधिकारी-9 ,पोलिस निरीक्षक 32, सहाय्यक पोलिस निरीक्षक 53, उपनिरीक्षक 58, कर्मचारी पुरुष -1850, कर्मचारी महिला-180, होमगार्ड पुरुष-1200, होमगार्ड महिला 200, एसआरपीएफ प्लाटुन-1, आरसीपी प्लाटुन- 6, स्टायकिंग फोर्स -10, शीघ्र कृती दल-2 प्लाटून (राखीव) यासह बाहेरील जिल्ह्यातील पोलिस निरीक्षक, अधिकारी व कर्मचारी विसर्जन मिरवणुकीवेळी तैनात राहणार आहे.

धर्माधिकारी प्रतिष्ठानतर्फे निर्माल्य संकलन
शहरात गणपती विसर्जनाला दि.23 रोजी डॉ.नानासाहेब धर्माधिकारी प्रतिष्ठानच्या वतीने निर्माल्य संकलन मोहीम राबविण्यात येणार आहे. या एकत्रित केलेल्या निर्माल्यापासून खत निर्मिती करून प्रतिष्ठानने केलेल्या वृक्षलागवड व संवर्धन या उपक्रमामार्फत लावलेल्या झाडांना वापरण्यात येणार आहे.

या मोहीमेची सुरूवात दि.23 रोजी सकाळी 7 वाजता होणार असून मनपा आयुक्त चंद्रकांत डांगे यांच्याहस्ते उद्घाटन होणार आहे. गणपती उत्सवामध्ये आरास सजावटीसाठी हार, फुले व इतर साहित्याचा वापर मोठ्या प्रमाणात केला जातो. तरी शहरातील सर्व सार्वजनिक मंडळ व नागरीकांनी सहकार्य करावे व निर्माल्य श्रीसदस्यांकडे जमा करावे असे आवाहन प्रतिष्ठान तर्फे करण्यात आले आहे.

याठिकाणी होणार निर्माल्य संकलन
शहरात सागर पार्क, एचडीएफसी बँक- आरटीओ ऑफिस जवळ, गणेश कॉलनी – खाजिमिया रोड, सिंधी कॉलनी, रथ चौक – नेरी नाका याठिकाणी निर्माल्य संकलन केले जाणार आहे. तरी घराघरात स्थापन केलेल्या गणेश भक्तांनी तसेच लहान मंडळांनी या संकलन केंद्राकडे व मोठ्या मंडळांकडे निर्माल्य जमा करावेत, मोठ्या मंडळांकडे जमा केलेले निर्माल्य प्रतिष्ठानचे सदस्य त्यांचेकडून जमा करणार आहेत.

चोवीस तास संकलनाचे काम
अनंत चतुर्दशीला सकाळी 7 वाजता सुरू झालेली निर्माल्य संकलन मोहीम दुसर्‍या दिवशी सकाळी 7 वाजेपर्यंत चोवीस तास अखंड सुरू राहणार आहे. यासाठी 700 श्रीसदस्य आपली सेवा देणार असून ते सकाळी 7 ते 3, 3 ते 11 व रात्री 11 ते दुसर्‍या दिवशी 7 वाजेपर्यंत तीन शिप्टमध्ये निर्माल्य संकलनाचे काम करणार आहेत.

मदतीसाठी 120 पोहणार्‍यांसह आठ तराफे तयार
मेहरुण तलावावर विसर्जनासाठी प्रशासनाने पूर्ण तयारी केली असून तलावाच्या काठावर जेसीबीच्या माध्यमातून सफाटीकरण करण्यात आले आहे. विसर्जनासाठी 8 तराफे, 4 क्रेन, 2 बोट आणि 120 पट्टीचे पोहणार्‍या युवकांची व्यवस्था प्रशासनाने केली आहे. यात शोध व बचाव पथकात 18 मनपा कर्मचार्‍यांचा समावेश आहे. 3 वन्यजीव, 3 सर्पमित्रांची नियुक्ती करण्यात आली आहे.

अत्याधुनिक वैद्यकीय सेवा उपलब्ध करुन देण्यावर भर! – डॉ.खैरे

0
जळगाव । जिल्हा सामान्य रुग्णालय हे वैद्यकीय महाविद्यालयाकडे हस्तांतरीत झालेले आहे. याठिकाणी दररोज हजारो रुग्ण उपचार घेण्यासाठी येत असून या रुग्णांना वैद्यकीय महाविद्यालयात अधिकाअधिक चांगल्या आरोग्य सेवा देण्याचे मत वैद्यकीय महाविद्यालयाचे अधिष्ठाता डॉ.भास्कर खैरे यांनी व्यक्त केले.

औद्योगिक वसाहतीतील दै.‘देशदूत’च्या मुख्य कार्यालयातील गणरायाची वैद्यकीय महाविद्यालय व रुग्णालयाचे अधिष्ठाता डॉ.भास्कर खैरे यांच्या हस्ते आरती करण्यात आली. आरती केल्यानंतर डॉ.खैरे यांनी दै.‘देशदूत परिवारा’शी दिलखुलास संवाद साधला. यावेळी बोलतांना अधिष्ठात डॉ.खैरे म्हणाले की,

गेल्या सहा महिन्यांपूर्वी जिल्ह्यात वैद्यकीय महाविद्यालयाला मंजुरी मिळाली त्यानंतर याचवर्षी एमबीबीएसच्या प्रथम वर्षाला 100 जागांसाठी प्रवेश देण्यात असून त्याचा प्रथम वर्षाचा अभ्यासक्रमाला सुरुवात झाली आहे. दरम्यान द्वितीय वर्षाच्या प्रवेशाची तयारीचे नियोजन करण्यात येत आहे. तसेच जिल्ह्याला मेडीकल हब मंजूर झाले असल्याने त्याच्या कामाला लवकरच सुरुवात होणार असल्याचे महाविद्यालयाचे अधिष्ठाता डॉ.खैरे यांनी सांगितले.

महाविद्यालयीन जिवनातील गणशोत्सव अविस्मरणीय
अंबाईजोगाई येथे महाविद्यलयात असतांना गणेशोत्सवात विद्यार्थी व शिक्षक दररोज घरुन मोदक घेवून यायचे. तसेच सर्व गोळा झालेले मोदकाचा प्रसाद संपूर्ण महाविद्यालयात वाटप करीत असल्याने महाविद्यालयीन जीवनातील गणेशोत्सव अविस्मरणीय असा होता.

जळगावात श्रींच्या दर्शनासाठी अलोट गर्दी

0

जळगाव । आपल्या लाडक्या बाप्पाचे उद्या विसर्जन होणार आहे. शहरातील गणेश मंडळांनी साकारलेली आरास व गणरायाच्या दर्शनासाठी शेवटच्या दिवशी भाविकांनी अलोट गर्दी केली होती.

शहरातील सार्वजनिक मंडळांनी गणेशाच्या स्थापनेसह विविध आरास साकारलेल्या आहे. पहिल्या दिवसापासून गणेश मंडळांनी साकारलेल्या आरास बघण्यासाठी भाविकांची मोठ्या प्रमाणात गर्दी होत होती. गणेश विसर्जन उद्यावर येवून ठेपली असल्याने आपल्या लाडक्या गणरायाचे दर्शन घेण्यासाठी व मंडळांनी साकारलेल्या आरास बघण्यासाठी सायंकाळपासूनच भाविकांची रिघ लागलेली दिसून आली.

वाहतुकीच्या मार्गात बदल
नवीपेठ, नेहरुचौकात सायंकाळनंतर मोठ्या प्रमाणात भाविकांची गर्दी होत असल्याने टॉवरचौकापासून ते नेहरु चौकापर्यंतची वाहतुक बंद करण्यात करुन ती रेल्वे स्टेशन व चित्राचौका मार्गे वळवून वाहतुकीच्या मार्गात बदल करण्यात आला होता.

गर्दीने गजबजले रस्ते
आरास पाहण्यासाठी भाविक सायंकाळनंतर घराबाहेर निघत असतात. मोठ्या प्रमाणात गर्दी होत असल्याने रात्री उशीरापर्यंत शहरातील मुख्य रस्ते गर्दीने गजबजले असल्याचे दिसून आले.

मंडळाबाहेर लांबच लांब रांगा
शेवटच्या दिवशी गणेश दर्शनासाठी सायंकाळपासूनच भाविकांची मोठ्या प्रमाणात गर्दी केली, त्यामुळे आरास बघण्यासाठी मंडळांबाहेर भाविकांच्या लांबच लांब रांगा लागलेल्या दिसून आल्या.

Social Media

26,100FansLike
5,154FollowersFollow
1,139SubscribersSubscribe
error: Content is protected !!